ރައްޔިތުންގެ މަޖިލިސް އިންތިހާބުގައި ވާދަކުރެއްވުމަށް މިހާތަނަށް ފޯމް ހުށަހަޅާފައި ވަނީ 40 ކެންޑިޑޭޓުން ކަމަށާއި މިއަދު ފޯމް ހުށަހާޅާ ކެންޑިޑޭޓުންގެ އަދަދު ގިނަ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އީސީގެ ނައިބު ރައީސް އިސްމާއިލް ހަބީބު މައުލޫމާތު ދެއްވަމުން "އަދަދު" އަށް ވިދާޅުވީ ކެންޑިޑޭޓުންގެ ފޯމް ހުށަހެޅުމުގެ މުއްދަތު ފެބްރުއަރީ 14، ގައި ހަމަވާއިރު މިއަދު 19 ކެންޑިޑޭޓަކު ފޯމު ހުށަހަޅާފައިވާ ކަމަށެވެ.
"މިއަދު ވަރަށް ގިނަ ބޭފުޅުން އެބަ ވަޑައިގަންނަވާ ފޯމް ހުށަހަޅުއްވަން. މިއަދު މިހާތަނަށް 19 ފޯމް ވަނީ ހުށަހަޅާފައި. އިއްޔެއާ ހަމައަށް ހުށަހަޅާފައި ވަނީ 21 ކެންޑިޑޭޓެއްގެ ފޯމު. އަޅުގަނޑުމެން އެދެނީ ލަސް ނުކުރައްވާ ވީހާވެސް އަވަހަށް ފޯމް ހުށަހެޅުއްވަމަށް. އިންތިހާބު ލަސްވި ނަމަވެސް ފޯމު ހުށަހެޅުމުގެ މުއްދަތު އަޅުގަނޑުމެންނަށް އިތުރު ނުކުރެވޭނެ" ހަބީބް ވިދާޅުވި އެވެ.
މިހެން ނަމަވެސް ބައެއް ކެނޑިޑޭޓުންނަށް، ހާއްސަކޮށް ކެމްޕެއިން އެކައުންޓު ހުޅުވުމުގައި ދަތިތައް ދިމާވަމުން އަންނަ ކަމަށް މައުލޫމާތު ލިބެ އެވެ. ހަބީބު ވިދާޅުވީ މި ދަތިތައް ހައްލުކުރަން މޯލްޑިވްސް އިސްލާމިކް ބޭންކް (އެމްއައިބީ) އިން ފުރިހަމަ އެއްބާރުލުން ދޭނެ ކަމަށް އެ ބޭންކުން ބުނެފައިވާ ކަމަށާއި، މިގޮތުން އެކައުންޓް ހުޅުވުމުގައި ދިމާވާ ދަތިތަކަށް މިހާރު ފަސޭހަވެގެންދާނެ ކަމަށެވެ.
އިންތިހާބުގައި ވާދަކުރާ ކެންޑިޑޭޓުންގެ ފޯމްތައް ބަލައިގަތުމަށް ދަރުބާރު ގޭގައި 16 ކައުންޓަރުން އަންނަނީ ހިދުމަތް ދެމުންނެވެ. މަޖިލިސް އިންތިހާބުގައި ވާދަ ކުރުމަށް ފޯމު ބަލައިގަތުމަށް ހަމަޖެހިފައިވަނީ މި މަހުގެ 14 ވާ ބުދަ ދުވަހުގެ 14:00 ގެ ނިޔަލަށް ކަމަށް އީސީން ބުނެ އެވެ. އަދި މުއްދަތު އިތުރުކޮށް ނުދޭނެ ކަމަށް އެ ކޮމިޝަނުން ހާމަކޮށްފައިވެ އެވެ.
މަޖިލިސް އިންތިހާބު ރޯދަ މަހާ ދިމާވާތީ ރޯދައިގެ ފަހުން އިންތިހާބު ބޭއްވުމަށް އިދިކޮޅު އެމްޑީޕީ އާއި ޑިމޮކްރެޓްސް އިން މަސައްކަތް ކުރަމުން އަންނައިރު، ގާނޫނަށް ގެންނަން ޖެހޭ ބަދަލުތައް ގެނައުމަށް މަޖިލީހަށް ބިލެއް ވެސް ވަނީ ހުށަހަޅާފަ އެވެ.
މަޖިލިސް އިންތިހާބުގައި ސިޔާސީ ޕާޓީތަކާއި، އަމިއްލަ ގޮތުން ވާދަކުރާ ކެންޑިޑޭޓުންގެ އިތުރުން ކުރީގެ ރައީސް ޔާމީންއަށް ތާއީދު ކުރައްވާ ކެންޑިޑޭޓުންވެސް ވާދަކުރައްވަ އެވެ.
