ގެދޮރުވެރިޔާ ސްކީމާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅި ޝަކުވާތައް ބެލުމަށް އެ ކޮމިޝަނުން ހިންގި ތަހުގީގުގެ ތަފްސީލުތައް ލިބުމުން ގާނޫނީ ލަފާ ހޯދުމަށް ފަހު ފުލެޓުތައް ދޫކުރަން ފަށާނެ ކަމަށް ހައުސިން މިނިސްޓްރީން ބުނެފި އެވެ.
އޭސީސީން މި މައްސަލައިގެ މައުލޫމާތު ދޭން ބޭއްވި ނޫސްވެރިންގެ ބައްދަލުވުމެއްގައި ބުނި ގޮތުގައި ފްލެޓުތަކުގެ ދާއިމީ ލިސްޓުގައި ޝަރުތު ފުރިހަމަވެ، އެއްވެސް މައްސަލައެއް ފާހަގަކުރެވިފައި ނުވާ ފޯމުތަކުގެ ނިސްބަތަކީ 20.7 ޕަސެންޓެވެ. އަދި ޝަރުތު ފުރިހަމަވީީ ނަމަވެސް މައްސަލަ ހުރި ފޯމުތަކުގެ ނިސްބަތަކީ 19.7 ޕަސެންޓެވެ. އަދި ފުލެޓު ދޭން ނިންމި މީހުންގެ ތެރެއިން 60 ޕަސެންޓު މީހުންގެ ޝަރުތުހަމަނުވާ ކަމަށްވެސް އޭސީސީއިން ބުނެފައިވެ އެވެ.
މި މައްސަލާގައި ހައުސިން މިނިސްޓްރީން މިއަދު ނެރުނު ނޫސްބަޔާނެއްގައި ބުނެފައިވަނީ، ގެދޮރުވެރިޔާ ސްކީމާ ގުޅޭގޮތުން އޭސީސީއިން ކުރިއަށް ގެންދިޔަ ތަހުގީގުގެ ފުރަތަހަ މަރުހަލާ ނިންމާ، ކޮމިޝަނުން ހޯދި ހޯދުންތައް މި މަހުގެ ފުރަތަމަ ދުވަހު އެ މިނިސްޓްރީއާ ހިއްސާކޮށްފައިވާ ކަމަށެވެ.
އޭސީސީގެ ހޯދުންތަކާ ގުޅޭގޮތުން މި މަހުގެ ހަތަރެއްގައި އެ މިނިސްޓްރީން ބައްދަލުކޮށް މަޝްވަރާކޮށްފައިވާ ކަމަށްވެސް ބަޔާނުގައި ބުނެފައިވެ އެވެ.
"ތަހުގީގާ ގުޅޭ އިތުރު ތަފުސީލު މި މިނިސްޓްރީއާ ހިއްސާކުރައްވާނެ ކަމަށް އެ ކޮމިޝަނުން ވިދާޅުވި، އެ މައުލޫމާޔު ލިބުމުން މި މައްސަލައާ ގުޅޭ ގާނޫނީ ލަފާ ހޯދާ ފުލެޓުތައް ކަނޑައެޅުމުގެ މަސައްކަތް ކުރިއަށް ގެންދާނެ ވާހަކަ ދަންނަވަން" ބަޔާން ނިންމާލަމުން މިނިސްޓްރީން ބުނެފައިވެ އެވެ.
މިނިސްޓްރީން މިފަދަ ބަޔާނެއް ނެރެފައި މިވަނީ އޭސީސީގެ ހޯދުންތަކުން ޝަރުތު ހަމަވާކަން ހާމަވި ފްލެޓުގެ ހައްގުވެރިންނަށް އިތުރަށް ލަސް ކުރުމުކާއި ނުލައި ފްލެޓުތައް ދޫކުރުމަށް ގޮވާލައި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަނީ މިއަދު ރައްޔިތުންގެ މަޖިލީހަށް މައްސަލައެއް ވެސް ހުށަހަޅާފައި ވަނިކޮށެވެ.
"އެކި ސަބަބުތަކަށްޓަކައި ފްލެޓުތައް ދޫކުރުން މަސައްކަތް ލަސްވުމުގެ ސަބަބުން ފްލެޓޫގެ ހައްގުވެރިންނަށް ނުހަނު ގެއްލުން ލިބޭ. ފްލެޓުތަކުގައި ދިރިއުޅެވެން ދެން ކުލީގެ ގޮތުގައި އާމްދަނީއަށް ލިބޭ ބޮޑު އެއްޗެއް ހޭދަ ކުރަން ޖެހޭ. އާއިލާގެ ހުރިހާ މެމްބަރުންނާއެކު ކުދި ކުދި ތަންކޮޅުގައި އުޅެންޖެހިފައިވާ އެތައް އާއިލާއެއް އެބަ ތިބި،" އީވާ ހުށަހެޅި މައްސަލާގައިވެ އެވެ.
އޭސީސީގެ ތަހުގީގުން ހޯދި ހޯދުންތައް އާއްމުކުރަން ބޭއްވި ނޫސްވެރިންގެ ބައްދަލުވުމުގައި އެ ކޮމިޝަނުން ވަނީ ވަކި ބަޔަކަށް ފްލެޓްތައް ދޫކުރުމަށް މަސައްކަތް ކުރިތޯ ބަލަން ވަކި ތަހުގީގެއް ހިންގަން ފަށާނެ ކަމަށްވެސް ބުނެފަ އެވެ.
ކޮމިޝަނުގެ ރައީސް އާދަމް ޝާމިލް ވިދާޅުވީ އޭރުގެ ހައުސިން މިނިސްޓްރީން ޝަރުތު ހަމަނުވާ ބަޔަކަށް ފްލެޓް ދިނުމަށް ނިންމުމުގައި ވަކި ބަޔަކަށް ނާޖާއިޒު ފައިދާ ހޯދުމަށް މަސައްކަތް ކުރުން ފަދަ ކޮރަޕްޝަނުގެ އަމަލެއް ހިމެނޭ ކަން ނުވަތަ ނޫން ކަން ބެލުމަށް ވަކި ޖިނާއީ ތަހުގީގެއް ހިންގާނެ ކަމަށެވެ.
އަދި، ފޯމު ފުރިއިރު ދޮގު މައުލޫމާތު ފޯމުގައި ލިޔުނު މައްސަލާގައި ދައުލަތުގެ އިދާރާއަކަށް ދޮގު މައުލޫމާތު ދިން ކަމުގެ ތުހުމަތުތަކުގެ މައްސަލައެއް ގޮތަށް ފުލުހުންނާ ގުޅިގެން ތަހުގީގު ކުރެވޭނެ ކަމަށް ވެސް އޭނާ ވިދާޅުވި އެވެ.
