މިހާރު ޓޫރިސްޓުން އަންނަ އަދަދުން މި އަހަރުގެ ނިޔަލަށް 2.3 މިލިއަން ޓޫރިސްޓުން ގެނެވޭނެ ކަމުގެ އުއްމީދު ބޮޑު ކަމަށް ޓޫރިޒަމް މިނިސްޓަރި އިބްރާހިމް ފައިސަލް މިއަދު ވިދާޅުވެއްޖެ އެވެ.
މި އަހަރަށް ފާސްކޮށްފައިވާ ބަޖެޓުގައި ސަރުކާރުން ކަނޑައެޅި އަމާޒަކީ އަހަރުގެ ތެރޭގައި ދެ މިލިއަން ޓޫރިސްޓުން ރާއްޖެ ގެންނާށެވެ.
ނަމަވެސް "ޔޫތު ހެކް 2024" އިފްތިތާހުކުރަން ބޭއްވި ރަސްމިއްޔާތުގައި ފައިސަލް ވިދާޅުވީ ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ ތެރޭގައި ހިމެނޭ އިންޑިއާ އާއި ޗައިނާ މާކެޓު މިހާރު ހުރި ވަރުގައި ހިފެހެއްޓިއްޖެ ނަމަ 2.3 މިލިއަން ޓޫރިސްޓުން އަންނާނެ ކަމަށެވެ.
"ޗައިނާ އަދި އިންޑިއަން މާކެޓު އެހުރިވަރުގައި ހިފެހެއްޓިއްޖެ ކަމަށްވާ ނަމަ އަޅުގަނޑަށް ފެނޭ ގާތްގަނޑަކަށް ޓޫރިސްޓު އެރައިވަލް 2024 ގައި ނިންމާލެވިދާނެކަމަށް 2.3 މިލިއަންގައި. އެހެންވެއްޖެ ކަމަށްވާ ނަމަ އެއީ ވަރަށް ބޮޑު ކުރިއެރުމަކަށް ވާނެ. އެކަމުގައި އަޅުގަނޑުމެން މިދަނީ މަސައްކަތްތަކެއް ވެސް ކުރަމުން." އޭނާ ވިދާޅުވި އެވެ.
އެންމެ ފަހުން ޓޫރިޒަމް މިނިސްޓްރީން އާންމުކުރި ތަފާސްހިސާބުތަކުން ދައްކާ ގޮތުގައި މި އަހަރުގެ ފުރަތަމަ 29 ދުވަހުގެ ތެރޭގައި 174,400 ޓޫރިސްޓުން ޒިޔާރަތްކޮށްފި އެވެ. މިއީ ކުރީ އަހަރުގެ މި މުއްދަތަށް ވުރެ 11.9 ޕަސެންޓު އިތުރު އަދަދެކެވެ. އަދި އޭގެ ކުރީ އަހަރު، 2022، އަށް ވުރެ 48 ޕަސެންޓު އިތުރު އަދަދެކެވެ.
އެންމެ ގިނައިން ޓޫރިސްޓުން އަންނަ ފަސް ގައުމު
- ރަޝިއާ - 18،561
- އިޓަލީ - 18،111
- ޗައިނާ - 16،529
- ޔޫކޭ - 14،588
- އިންޑިއާ - 13،989
ޓޫރިޒަމް މިނިސްޓަރު ނަން ގަތް ޗައިނާ އާއި އިންޑިއާއަކީ ވޭތުވި އަހަރުތަކުގައި ރާއްޖެއަށް އެންމެ ގިނައިން ޓޫރިސްޓުން އައި ދެ ގައުމެވެ. މިހާރު ޗައިނާ މާކެޓު މައްޗަށް ޖެހިލާފައިވާއިރު، އިންޑިއާއިން އަންނަ ޓޫރިސްޓުންގެ އަދަދު ވަނީ ކޮންމެވެސް ވަރަކަށް މަޑުޖެހިލާފަ އެވެ.
އިންޑިއާއިން އަންނަ ޓޫރިސްޓުންގެ އަދަދު މަދުކަމަށް ތަފާސްހިސާބުތަކުން ދައްކަނީ ރާއްޖެ ބޮއިކޮޓު ކުރަން އެ ގައުމުން ކެމްޕެއިނެއް ހިންގަމުންދާ ދަނޑިވަޅެއްގަ އެވެ. އެކަމަކު މި ކެމްޕެއިންގެ މާ ބޮޑު އަސަރެއް ޓޫރިޒަމަށް އަދި ނުކުރާ ކަމަށް ދިވެހި ޓްރެވަލް އެޖެންސީތަކާއި ޓުވާ އޮޕަރޭޓަރުންގެ ޖަމިއްޔާ، މަޓާޓޯއިން ބުނެފައިވެ އެވެ.
