ސިޔާސީ ތޫފާނުގައި އަންނަ ރޯޅީގައި އިސްލާމިކް މިނިސްޓްރީ ބަލިކޮށް ނުލެވޭނެ ކަމަށް އަލުން މިނިސްޓަރު ކަމަށް އައްޔަން ކުރި ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ޝަހީމަށް ރުހުން ނެތް ކަމަށް ރައްޔިތުންގެ މަޖިލީހުން ނިންމުމުން، އަލުން އެ މަގާމަށް ޝަހީމު އައްޔަން ކުރުމުން މަރުހަބާ ދެންނެވުމަށް ބޭއްވި ޖަލްސާގައި ވާހަކަފުޅު ދައްކަވަމުން ޝަހީމް ވިދާޅުވީ، އެ މިނިސްޓްރީއަކީ އިސްލާމްދީނާއި ދިވެހި ގައުމުގެ ހިދުމަތުގައި މުހިންމު މަސައްކަތްތަކެއް ކުރަމުންދާ މިނިސްޓްރީއެއް ކަމަށެވެ.
"ސިޔާސީ މާހައުލުގައި އުޅޭއިރު މިކަހަލަ ކަންކަމާ ދިމާވާނެ، އެކަމުގައި ހިތުގައި އެއްވެސް ނުތަނަވަސްކަމެއް ނެތް، ހަގީގީ އިތުބާރަކީ މުޅިން ތަފާތު އިތުބާރެއް، އެއީ ރައްޔިތުންގެ ފަރާތުން ލިބޭ ލޯތްބާއި އިހުތިރާމް،" ޝަހީމް ވިދާޅުވި އެވެ.
ޝަހީމް ވިދާޅުވީ ސޯޝަލް މީޑީޔާގައި އާންމުން ބަންޑުން ކުރަމުން ދިޔަ ޝުއޫރުތަކުން އޭނާއަށް ހިތްވަރު ލިބިގެން ދިޔަ ކަމަށެވެ. އަދި، ރުހުން ނެތް ކަމުގެ ވޯޓު ނެގުނު ގަޑިއަކީ މިނިސްޓްރީގެ އެކްޝަން ޕްލޭން އިފްތިތާހުކުރި ވަގުތާ އިއްތިފާގު ވުމުން އުފާކުރައްވާ ކަމަށް ވެސް އޭނާ ވިދާޅުވި އެވެ.
"މިނިސްޓްރީގެ މުވައްޒަފުން ވޭތުވެދިޔަ ދެ މަސް ދުވަހު ވަރަށް ބުރަކޮށް މަސައްކަތް ކުރަމުންދިޔައީ މަސައްކަތް ކުރާނެ ގޮތެއް ކަނޑައެޅުމަށްޓަކައި، އިއްޔެ އެކަމުގެ ޕްލޭން އިފްތިތާހު ކުރި ވަގުތު އެއީ އަޅުގަނޑުގެ މައްޗަށް އިތުބާރު ނެތްކަމަށް ފާސްކުރި ވަގުތު،" ޝަހީމް ވިދާޅުވި އެވެ.
ޝަހީމަށް ރުހުން ނެތް ކަމަށް މަޖިލީހުން ނިންމުމުން، އެއީ އިސްލާމް ދީން ބަލިކަށި ކޮށްލުމަށް ކުރީގެ ރައީސް އިބްރާހިމް މުހައްމަދު ސޯލިހު ކުރެއްވި ކަމެއްގެ ގޮތުގައި ސިފަކޮށް އެކްސްގައި ޕޯސްޓު ކުރެއްވި އެވެ.
ވަޒީރުންނަށް ރުހުން ދިނުމަށް މަޖިލީހުގައި އިއްޔެ ނެގި ވޯޓުގައި ޝަހީމަށް ރުހުން ނުދޭން 31 މެމްބަރަކު ވޯޓު ދިނެވެ. ރުހުން ދޭން ފެންނަ ކަމަށް ވޯޓު ދިނީ 30 މެމްބަރުންނެވެ. ވަކި ގޮތަކަށް ނުފެންނަ ކަމަށް ވޯޓު ދިން އަށް މެމްބަރަކު ތިއްބެވި އެވެ.
