މި ސަރުކާރުން ދެކުނުގެ އަތޮޅުތަކުގައި އަޅަން ރާވާފައިވާ ބްރިޖުތަކުގެ ތެރެއިން ގދ. ތިނަދޫ އާއި ކާޑެއްދޫ ގުޅާލާ ބްރިޖު މަޝްރޫއުގެ ޕްރިލިމިނަރީ ސާވެ އާއި އެސެސްމަންޓާއި ފީސިބިލިޓީ ސްޓްޑީގެ ކޮންސަލްޓަންސީ މަސައްކަތް ކޮށްދޭނެ ފަރާތެއް ހޯދަން އިންފްރާސްޓްރަކްޗާ މިނިސްޓްރީން އިއްޔެ އިއުލާންކޮށްފި އެވެ.
ތިނަދޫ - ކާޑެއްދޫ ލިންކުގެ ނަން ދީފައިވާ މި މަޝްރޫއުގެ ކޮންސަލްޓަންޓާ އެކީ މި ޕްރޮޖެކްޓުގެ މަސައްކަތް ކުރުމަށް ބޭނުންވާ ފުޅާދާއިރާއެއްގެ ދިރާސާއެއް ކުރުމަށް ހަމަޖެހިފައިވެ އެވެ. އިންފްރާސްޓްރަކްޗާ މިނިސްޓްރީގެ އިއުލާނުގައިވާ ގޮތުގައި މި މަސައްކަތް ކުރާނެ ފަރާތެއް ހޮވާނީ މަސައްކަތުގެ ކޮލިޓީ އާއި އަގަށް ރިއާޔަތްކުރާ، ކޮލިޓީ އެންޑް ކޮސްޓް ބޭސްޑް ސިލެކްޝަން ކޮންސަލްޓަންސީ ޕްރޮކިއުމަންޓް އުސޫލުގެ ދަށުންނެވެ.
މިކަމަށް ޝައުގުވެރިކަން ހުރި ފަރާތަކީ މަސައްކަތުގެ ތަޖުރިބާ އާއި ސީދާ ދާއިރާގެ މަސައްކަތުގެ ތަޖުރިބާ ވެސް ލިބިފައިވާ ފަރާތަކަށް ވާން ޖެހެ އެވެ. އަދި މަސަައްކަތް ކުރަން ގެންގުޅޭ ކޮންސަލްޓަންޓުންނަކީ މަސައްކަތުގައި ބައިވެރިވޭނެ ފަރާތްތަކެއްތޯ މިނިސްޓްރީން ބަލާނެ އެވެ. ހުށަހެޅުންތަކުގެ ފެންވަރު ރަނގަޅު ކުރަން ބޭނުންވާ ބަޔަކަށް އެހެން ބަޔަކާ ގުޅިގެން ޕްރޮޕޯސަލްތައް ހުށަހަޅަން ވެސް މިނިސްޓްރީން ފުރުސަތު ދީފައިވެ އެވެ.
ތިނަދޫ-ކާޑެއްދޫ ބްރިޖުގެ ދިރާސާތައް ހަދަން ޝައުގުވެރިވާ ފަރާތްތަކުން ބީލަން ހުށަހެޅުމުގެ ސުންގަޑިއަކީ މި މަހުގެ 31 ގެ 12:00 އެވެ. މިނިސްޓްރީން ބުނީ ޕްރޮޕޯސަލް ހުށަހަޅަން ދައުވަތު ދޭނީ މަސައްކަތަށް ޝައުގުވެރިކަން ފާޅުކުރި ފަރާތްތަކުގެ ތެރެއިން ޝޯޓްލިސްޓު ކުރެވޭ ކުންފުނިތަކަށް އެކަނި ކަމަށެވެ.
ހުވަދޫ އަތޮޅު ދެކުނު ބުރީގެ ވެރިކަން ކުރާ ރަށް ތިނަދު އާއި ކާޑެއްދޫ އެއާޕޯޓާ ދެމެދުގައިވާ ދުރުމިނަކީ 4.4 ކިލޯމީޓަރެވެ. މިފަހުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުގައި މި މަޝްރޫއަށް އިންވެސްޓަރުން ހޯއްދަވަން މަސައްކަތް ކުރެއްވި އެވެ.
މިހާތަަނަށް މި މަޝްރޫއު ހިންގަން ބަޔަކު ޝައުގުވެރިކަން ފާޅު ނުކުރި ނަމަވެސް، ދެކުނުގައި އަޅަން ރާވާފައިވާ އަނެއް ބްރިޖު، ހިތަދޫ - ހުޅުދޫ ބްރިޖު އަޅަން މިސްރުގެ އަރަބް ކޮންސްޓްރަކްޝަން ގްރޫޕުގެ ހުށަހެޅުމެއް ލިބިފައިވާ ކަމަށް ސަރުކާރުން ހާމަކޮށްފައިވެ އެވެ.
