ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރައްވަމުން ގެންދަވާ ފުރަމާނަ ދަތުރުގެ ތެރެއިން އިއްޔެ ބޭއްވި އިންވެސްޓް މޯލްޑިވްސް ފޯރަމްގައި އިންވެސްޓަރުންނަށް ހުށަހެޅި މަޝްރޫއުތަކުގެ ތެރޭގައި އައްޑޫ ބްރިޖާއި ހުވަދޫ ބްރިޖު ހިމަނައިފި އެވެ.
އައްޑޫ ހިތަދޫ އާއި ހުޅުމީދޫ ގުޅުވާލަ ދޭ ބްރިޖެއް އެޅުމާއި ގދ. ތިނަދޫ އާއި ކާޑެއްދޫ ގުޅުވާލަދޭ ބްރިޖެއް އެޅުމަކީ ރައީސްގެ ވައުދުފުޅެކެވެ. އެގޮތުން ރިޔާސީ ކެމްޕެއިންގެ ތެރެއިން މި ސަރަހައްދުތަކަށް ވަޑައިގެން ވެރިކަމުގެ ފަސް އަހަރުގެ ދައުރުގެ ތެރޭގައި މި ދެ ބްރިޖުގެ މަސައްކަތް ފައްޓަވާނެ ކަމަށް އެމަނިކުފާނު ވިދާޅުވެފައި ވެ އެވެ.
ހިތަދޫ އާއި ހުޅުމީދޫ 23 ކިލޯމީޓަރު ހުންނައިރު، ތިނަދޫ އާއި ކާޑެއްދޫގެ ދުރުމިނުގައި 4.4 ކިލޯމީޓަރު ހުރެ އެވެ.
މީގެ ތެރެއިން ހިތަދޫ އާއި ހުޅުމީދު ގުޅާލަދޭ ބްރިޖު އެޅުމުގެ މަސައްކަތަށް ބޭނުންވާ ސާވޭއަށް މި އަހަރުގެ ބަޖެޓުގައި 30 މިލިއަން ރުފިޔާ ބަޖެޓުކޮށްފައި ވެ އެވެ. އަދި ވެރިކަމުގެ ފުރަތަމަ 100 ދުވަހުގެ ތެރޭގައި މި މަސައްކަތް ފަށަން ސަރުކާރުގެ "ހަފުތާ14" ރޯޑުމެޕުގައި ހިމަނާފައި ވެ އެވެ.
އިންވެސްޓް މޯލްޑިވްސް ފޯރަމާ ގުޅޭ ގޮތުން "އަދަދު" ނޫޙަށް މައުލޫމާތު ދިން އިކޮނޮމިކް މިނިސްޓްރީގެ އޮފިޝަލަކު ވިދާޅުވި ގޮތުން ނަމަ، ޗައިނާއިން އިންވެސްޓްމަންޓުތައް ހޯދަން މަސައްކަތް ކުރަމުން އަންނަނީ ރައީސް މުއިއްޒުގެ ތަސައްވުރުގައި ހިމެނޭ ޕްރޮޖެކްޓުތަކަށެވެ. އޭގެ ތެރޭގައި ހިމެނޭ އެންމެ ބިޔަ ޕްރޮޖެކްޓުތަކަކީ ވެލާނާ އެއާޕޯޓު ތަރައްގީކުރުމުގެ ތިންވަނަ ފިޔަވައްސާއި ރަސްމާލެ މަޝްރޫއު އާއި މާލެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއު އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ޕްލޭނުގައި މާލޭ ވިޔަފާރި ބަނދަރު ބަދަލުކުރަން ރާވާފައި އޮތީ ގުޅިފަޅަށެވެ.
ޗައިނާ އިންވެސްޓްމަންޓުތަކަށް ހުޅުވާލި އެހެން މަޝްރޫއުތަކުގެ ތެރޭގައި ހިމެނެނީ:
- ޒީރޯ-ކާބަން ސޭފް އައިލެންޑް ކޮންސެޕްޓަށް ތަރައްގީކުރާ ރަސްމާލެއަށް ބޭނުންވާ ވަސީލަތްތައް
- 70،000 އެފޯޑަބަލް ހައުސިން ޔުނިޓު އެޅުން
- އިހަވަންދިއްޕޮޅު ބަނދަރާއި ޓޫރިޒަމް ޒޯން
- 15 ސަރަހައްދެއްގައި ޑޮމެސްޓިކް އެއާޕޯޓު ތަރައްގީކުރުން
- މަތީފަންތީގެ ރިސޯޓެއް ހިމެނޭ ގޮތަށް ހޮސްޕިޓާލިޓީ އިންސްޓިޓިއުޓެއް ތަރައްގީކުރުން
މީގެ އިތުރުން ވެސް ދަނޑުވެރިކަމުގެ ބިޔަ ޕްރޮޖެކްޓުތަކާއި ކުނި ނައްތާލުމާއި އިއާދަކުރަނިވި ހަކަތަ އާއި ފައިނޭންޝަލް ސާވިސަސްގެ ދާއިރާއިން ވެސް ރާއްޖޭގައި ހުރި އިންވެސްޓްމަންޓުތަކުގެ މައުލޫމާތު އިންވެސްޓް މޯލްޑިވްސް ފޯރަމްގެ ތެރެއިން ދިނެވެ.
އިކޮނޮމިކް މިނިސްޓްރީން ބުނީ މި ފޯރަމްގައި އެ ގައުމުގައި ވިޔަފާރިތަކުން 250 މަންދޫބަކު ބައިވެރިވި ކަމަށެވެ. އަދި ދިވެހި ވިޔަފާރިތަކުން 30 މަންދޫބަކު ވެސް މި ފޯރަމްގައި ބައިވެރިވީ ކަމަށް މިނިސްޓްރީން މައުލޫމާތު ދިން އޮފިޝަލް ވިދާޅުވި އެވެ.
