ހަނިމާދޫ އެއާޕޯޓަށް ފުރަން ގޮސް ހުރި މީހަކު ބޮމެއް އޮތް ކަމަށް ބުނެ ބިރު ދެއްކުމުން، ފުލުހުން އޭނާ ހައްޔަރުކޮށްފި އެވެ.
ފުލުހުން ބުނީ މި މައްސަލާގައި ހައްޔަރު ކުރީ ދިވެހި ފިރިހެނެއް ކަމަށާއި މި މައްސަލަ ތަހުގީގުކުރަމުން އަންނަ ކަމަށެވެ. މި މައްސަލައާ ގުޅޭ އިތުރު ތަފުސީލެއް ފުލުހުން ހިއްސާނުކުރެ އެވެ.
އެއާޕޯޓުގައި ހުރެ ސަމާސައަކަށް ނަމަވެސް، އެފަދަ ނުރައްކާތެރި ހަތިޔާރެއް ނުވަތަ ގޮވާއެއްޗެއް އޮތް ކަމަށް ބުނުމުން މީގެ ކުރިން ވެސް މީހުން ހައްޔަރުކޮށްފައި އެބަހުއްޓެވެ. މިއީ ބައިނަލްއަގުވާމީ ވައިގެދަތުރުފަތުރުގައި މިހާރު ގެންގުޅޭ މިންގަނޑުތަކުގެ ދަށުން ބޮޑެތި އަދަބުތަކެއް ވެސް ކަނޑައެޅިފައިވާ ކަމެކެވެ.
މިދިޔަ މަހުގެ 28 ގައި ކުޅުދުއްފުށީ އެއާޕޯޓަށް ފުރަންދިޔަ މީހެއްގެ ދަބަހުން ވަޒަނެއް ފެނިގެން ވެސް ފުލުހުން ތަހުގީގުކުރި އެވެ. ފަހުން މައުލޫމާތު ލިބުނު ގޮތުގައި އެ މީހާ ހުއްޓުވީ ވަޒަނެއް ގޮތަށް އޮތް ތަޅުދަނޑި ފުލެއް ފެނިގެންނެވެ.
