މި އަހަރު ބާއްވާ ރައްޔިތުންގެ މަޖިލީހުގެ އިންތިހާބު ބާއްވާނެ ތާރީހެއް އަންނަ އާދީއްތަ ދުވަހު އިއުލާނުކުރާނެ ކަމަށް އިލެކްޝަންސް ކޮމިޝަން (އީސީ)ގެ ނައިބު ރައީސް އިސްމާއިލް ހަބީބު ވިދާޅުވެއްޖެ އެވެ.
"އަދަދު" ނޫހާ ވާހަކަ ދައްކަމުން އީސީގެ ނައިބު ރައީސް، ހަބީބު މިއަދު ވިދާޅުވީ މަޖިލިސް އިންތިހާބު ބާއްވާނެ ތާރީހެއް ކަނޑައެޅުމަށް ކޮމިޝަނުގެ ޖަލްސާއެއް އަންނަ އާދީއްތަ ދުވަހު ބާއްވާނެ ކަމަށެވެ. އަދި އެ ޖަލްސާގައި ފާސްކުރާ ތާރީހެއް ހަމަ އެދުވަހު އިއުލާނު ކުރައްވާނެ ކަމަށް ވިދާޅުވި އެވެ.
"މަޖިލިސް އިންތިހާބު ބާއްވާނެ ތާރީހެއް ކޮމިޝަނުން މިދަނީ ދިރާސާ ކުރަމުން. ހުރި ގޮންޖެހުންތައް. އެހެންވީމަ އެ ގޮންޖެހުންތަކަށް ކޮމިޝަނުން އާދީއްތަ ދުވަހު ނިންމާފަ ހަމަ އެދުވަހު އިއުލާނު ކުރާނެ،" ހަބީބު ވިދާޅުވި އެވެ.
ހަބީބު ވިދާޅުވީ މަޖިލިސް އިންތިހާބު ބޭއްްވުމަށް ހުރި ގޮންޖެހުންތަކާއި ގުޅޭ މަޝްވަރާތައް މިހާރުވެސް ކޮމިޝަނުން ކުރަމުންދާ ކަމަށެވެ. އެގޮތުން އިންތިހާބު ބާއްވާނެ ތާރީހެއް ކަނޑައެޅުމާ ގުޅޭ ގޮތުން ސިޔާސީ ޕާޓީތަކާ އެކުވެސް ކޮމިޝަނުން ވަނީ މަޝްވަރާ ކޮށްފަ އެވެ.
ރައްޔިތުންގެ މަޖިލީހުގެ އިންތިހާބު ބާއްވަންޖެހޭ ކަމަށް ގާނޫގައި ބުނެފައިވާ މުއްދަތާއި މި އަހަރުގެ ރޯދަމަހާ ދިމާވާތީ އެ ދުވަސްވަރު އިންތިހާބު ބޭއްވުމަށް ހުރި ގޮންޖެހުންތައް ހިއްސާކޮށް އިންތިހާބު ތާރީހަށް ބަދަލުތަކެއް ގެންނަން އީސީން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ވެސް ހުށަހެޅި އެވެ.
ގާނޫނުގައި ބުނާ މުއްދަތުތަކަށް ބަލައިގެން އިންތިހާބު ބާއްވާނަމަ މި ހިނގާ މަޖިލީހުގެ ދައުރު ހަމަވުމުގެ 30 ދުވަސް ކުރިން މަޖިލިސް އިންތިހާބުގެ ހުރިހާ މަސައްކަތްތަކެއް ނިންމަން ޖެހެ އެވެ. ގާނޫނުގައި ބުނާ 30 ދުވަސް ހަމަވާ ތާރީހަކީ އޭޕްރިލް 28، އެވެ. މި ފެށޭ އަހަރުގެ ރޯދަ މަސް ނިމޭނެ ކަމަށް ފަލަކީ ހިސާބުތަކުން ދައްކާ ދުވަހަކީ އޭޕްރިލް 9، ނުވަތަ އޭޕްރިލް 10، އެކެވެ.
އެހެންކަމުން ދެވަނަ ބުރަކަށް ދާން ޖެހިއްޖެ ނަމަ، ދެ ވަނަ ބުރުގެ ކުރިން ކެމްޕޭނު ކުރުމަށާއި އެހެނިހެން ހުރިހާ ކަމަކަށް ދޭންޖެހޭ 15 ދުވަހުގެ މުއްދަތު ދިނުމަށްފަހު ގާނޫނުގައި ބުނާ 30 ދުވަހުގެ ކުރިން އިންތިހާބު ހުރިހާ މަސައްކަތެއް ނިންމުމުގެ ފުރުސަތެއް ނޯންނާނެ ކަމަށް އީސީން ވަނީ ބުނެފަ އެވެ.
ނަމަވެސް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މަޝްވަރާކޮށް ފާސްކުރީ ރޯދައިގެ ފަހުން އިންތިހާބު ބޭއްވެން އޮތް އެންމެ އަވަސް ތާރީހެއްގައި އިންތިހާބު ބޭއްވުމަށެވެ.
