ފަލަސްތީނުގެ ބިމަށް ގަދަކަމުން ވެރިވެގަނެފައިވާ އިޒްރޭލަށް ޖާސޫސުކޮށްދިން 33 މީހަކު ތުރުކީން ހައްޔަރު ކޮށްފި އެވެ.
އެމީހުން ހައްޔަރު ކޮށްފައި ވަނީ އިސްތަންބޫލުގެ އިތުރުން ހަތް ޕްރޮވިންސެއްގައި ތުރުކީގެ ފުލުހުން ކުރިއަށް ގެންދިޔަ އޮޕަރޭޝަންތަކެއްގަ އެވެ. އެ އޮޕަރޭޝަންތައް ކުރިއަށް ގެންގޮސްފައި ވަނީ ތުރުކީގައި ދިރިއުޅޭ ބޭރުގެ އެކި ޖަމާއަތްތަކަށް ނިސްބަތްވާ މީހުން ރަހީނު ކުރުމާއި އެމީހުންނަށް ހަމަލާ ދިނުމަށް ރާވާ ކަމުގެ މައުލޫމާތު ލިބުމުން ކަމަށް ތުރުކީގެ ފުލުހުންނާ ހަވާލާދީ އެގައުމުގެ ނޫސް އިދާރާތަކުން ރިޕޯޓު ކުރެ އެވެ.
ނަމަވެސް މޮސާޑްއަށް ޖާސޫސު ކޮށްދޭ މީހުން ފާރަލަމުން ދިޔައީ ކޮން ބަޔަކަށް ކަމެއް ތުރުކީން ހާމަކޮށްފައެއް ނުވެ އެވެ.
ތުރުކީގައި ދިރިއުޅޭ އެހެން ޖަމާއަތްތަކަށް ނިސްބަތްވާ ބަޔަކަށް ހަމަލާދިނުމަށް އިޒްރޭލު އަޑީގައި އޮވެ ރާވަމުންދާ ކަމަށް ތުރުކީން ބުނެފައި މިވަނީ ލުބުނާނާއި ގަތަރުގެ އިތުރުން ތުރުކީ ހިމެނޭހެން ދުނިޔޭގެ އެކި ކަންކޮޅުގައި ދިރިއުޅޭ ހަމާސްގެ އޮފިޝަލުންނަށް ހަމަލާދީ ހަމާސްގެ ވަސް ފުހެލާނެ ކަމަށް ބުނެ އިޒްރޭލުގެ ސެކިއުރިޓީ އިދާރާ، ޝިން ބެތުން އިންޒާރު ދީފައި ވަނިކޮށެވެ.
އެގައުމުން ދަނީ އިޒްރޭލުގެ ޖާސޫސީ އިދާރާ، މޮސާޑްއާ ގުޅުން އޮންނަ އިތުރު 13 މީހަކު ހޯދުމުގެ މަސައްކަތް ކުރަމުން ކަމަށް ތުރުކީގެ ނޫސް އިދާރާތަކުން ރިޕޯޓުކޮށްފައިވެ އެވެ.
ތުރުކީގެ ބޯޑަރު ތެރޭގައި ހަމާސްގެ އެއްވެސް މީހަކަށް ހަމަލާ ނުދެވޭނެ ކަމަށް ތުރުކީން މީގެ ކުރިން ބުނެފައިވެ އެވެ.
ޒަމާންތަކަކަށް ފަހު އިޒްރޭލާއި ތުރުކީގެ ގުޅުން ރަނގަޅު ވާން ފެށީ 2022 ވަނަ އަހަރު އެވެ. ނަމަވެސް މިދިޔަ އަހަރުގެ އޮކްޓޫބަރު 7 ވަނަ ދުވަހުން ފެށިގެން ހަމާސްއާ ދެކޮޅަށް އިޒްރޭލުން ކުރަމުންދާ ހަނގުރާމައާ ގުޅިގެން ތުރުކީއާއި އިޒްރޭލުގެ ގުޅުން ވަނީ ހީނަރުވެފަ އެވެ.
ތުރުކީއަކި ފަލަސްތީނު ހަނގުރާމަ ފެށުނީއްސުރެއް ގާޒާގައި އިޒްރޭލުން ހިންގާ ގަތުލުއާއްމުތަކާ ދެކޮޅަށް އެންމެ ވަރުގަދައަށް ވާހަކަތައް ދައްކަމުން އަންނަ އެއް ގައުމެވެ. އެ ކަންތައްތަކުގެ ސަބަބުން ތުރުކީގައި ތިބި އިޒްރޭލުގެ ހާރިޖީ މުވައްޒަފުން ވެސް ވަނީ ސަލާމަތީ ސަބަބުތަކަށްޓަކައި އަނބުރާ އިޒްރޭލަށް ގެންގޮސްފަ އެވެ.
