ކުކުޅު ބިސް ލިބުން ދަތިވުމުގެ ސަބަބުން އަގު ބޮޑުވެ ކޮންމެ މީހަކަށް ފަސް ބިހުގެ ރޭޓުން ވިއްކަން ފަށައިފި އެވެ.
މީގެ ކުރިން 1.75ރ. އަށް ވިއްކަމުން އައި ބިހެއްގެ އަގު އާންމު ފިހާރަތަކުގައި މިހާރު ހުރީ ތިން ރުފިޔާ އަށެވެ. ބާޒާރު މަތީގައި ވެސް ބިހުގެ އަގު އުފުލިފައިވާއިރު، ރެޑްވޭވްގައި ބިސް ވިއްކަނީ 2ރ. ގެ މަގުން ކޮންމެ މީހަކަށް ފަސް ބިހެވެ.
ރެޑްވޭވުން ބުނީ ކޮންމެ މީހަކަށް ފަސް ބިހުގެ މަގުން ވިއްކަމުންދަނީ 2ރ. ގައި އަގު ހިފެހެއްޓުމަށް ކަމަށާއި މިރޭގެ ވަގުތެއްގައި އައު ޝިޕްމެންޓު ލިބޭނެ ކަމަށެވެ. އެ ޝިޕްމެންޓު ކްލިއާ ކުރެވުމާއެކު ވަކި އަދަދެއް ކަނޑައަޅައިގެން ބިސް ވިއްކުން ހުއްޓައިލާނެ ކަމަށެވެ.
"އަޅުގަނޑުމެންގެ ބިސް ޝިޕްމެންޓު މިރޭ ކްލިއާ ވާނެ އިރާދަ ކުރެއްވިއްޔާ، މާދަމާއިން ފެށިގެން އަޅުގަނޑުމެން ބިސް ލިމިޓު ކުރުން ހުއްޓައިލާނަން، މާނައަކީ ކިތަންމެ އަވަހަކަށް ބިސް ކޭހެއް ގަންނަން ކަސްޓަމަރަކު އަޔަސް ރެޑްވޭވުން ލިބޭނެޔޭ،" ރެޑްވޭވްގެ މީޑިއާ އޮފިސަރު ވިދާޅުވި އެވެ.
ބިހުގެ އަގު ބޮޑުވެފައި ވަނީ ބިސް ޝިޕްމެންޓެއް ލަސްވެގެން ކަމަށް ވިޔަފާރިވެރިން ބުނެ އެވެ. ބިސް ލިބި، އަގު ހެޔޮވާނެ ދުވަހެއް ސީދާ ބުނަން ނޭނގޭ ކަމަށް އެމީހުން ބުނެ އެވެ.
