މި އަހަރުގެ ގިނަ ދުވަސްތަކެއްގައި ރާއްޖޭގެ ޓޫރިޒަމްގެ އެއް ނަމްބަރު މާކެޓުގެ ގޮތުގައި އޮތް ރަޝިއާ ފަހަތަށް ޖައްސާލުމަށް ފަހު އެންމެ ގިނަ ޓޫރިސްޓުން އަންނަ ގައުމަކަށް އަނެއްކާ ވެސް އިންޑިއާ ވެފައިވާ ކަމަށް ޓޫރިސްޓް އެރައިވަލް ތަފާސްހިސާބުތަކުން ދައްކައިފި އެވެ.
ޓޫރިޒަމް މިނިސްޓްރީން އާންމު ކުރި އެންމެ ފަހުގެ އެރައިވަލް ރިޕޯޓުގައިވާ ގޮތުގައި މި އަހަރުގެ މިހާތަނަށް 1،834،759 ޓޫރިސްޓުން ރާއްޖެ އައިސްފި އެވެ. މިއީ ރާއްޖޭގެ ޓޫރިޒަމްގެ ރެކޯޑެކެވެ. އޭގެ ތެރެއިން އެންމެ ގިނައިން ޓޫރިސްޓުން އައި ގައުމުތަކަކީ:
- އިންޑިއާ - 205،278
- ރަޝިއާ - 203،539
- ޗައިނާ - 185،761
- އިނގިރޭސިވިލާތް - 152،284
- ޖަރުމަނުވިލާތް - 132،188
ކޮވިޑުގެ ބަލިމަޑުކަމުގެ ދުވަސްވަރު ޗައިނާ މާކެޓު އަޑިއަޅާލިފަހުން ރާއްޖެއަށް އެންމެ ގިނަ ޓޫރިސްޓުން އަންނަ ދެ ގައުމަކީ އިންޑިއާ އާއި ރަޝިއާ އެވެ. މި އަހަރު ޗައިނާ އަލުން ހުޅުވާލުމާ އެކި އެ ގައުމު ވަނީ ކުޑަ ދުވަސްކޮޅެއްގެ ތެރޭގައި ތިންވަނައަށް ޖެހިލާފަ އެވެ.
