މެޑްރިޑް (ޑިސެމްބަރު 22) - ސްޕެނިޝް ލީގުގައި ރޭ އެއް ކުޅުންތެރިއަކު މަދުކޮށް ކުޅެ ފަހު ވަގުތު ޖެހި ގޯލުން ރެއާލް މެޑްރިޑުން 1-0 އިން ޑިޕޯޓިވޯ އަލަވޭސް ބަލިކޮށް ލީގުގެ އެއް ވަނަ އަށް ޖެހިލައިފި އެވެ.
އާ އަހަރަށް ސްޕެނިޝް ލީގު ބްރޭކަށް ދިއުމުގެ ކުރިން ކުޅުނު ފަހު މެޗުތަކުގެ ނަތީޖާ އަށް ބަލާއިރު، ރެއާލް އެއް ވަނަ އަށް ޖެހިލީ ކުރިން އެ މަގާމުގައި އޮތް ޖިރޯނާ އަށް ރޭ ކުޅުނު މެޗުން މޮޅުނުވެވުމުންނެވެ. ރެއާލް ބެޓިސް ދަނޑުގައި ރޭ ޖިރޯނާ ވަނީ 1-1 އިން އެއްވަރުވެފަ އެވެ.
ލީގުގެ އެއް ވަނައިގައި އޮތް ރެއާލާއި ދެ ވަނައިގައި އޮތް ޖިރޯނާ އަށް 18 މެޗުން ވަނީ 45 ޕޮއިންޓް ލިބިފަ އެވެ. ރެއާލް ކުރީގައި އޮތީ ލަނޑުގެ ތަފާތުންނެވެ. ތިން ވަނައިގައި ބާސެލޯނާ އޮތީ 18 މެޗުން 38 ޕޮއިންޓް ހޯދައިގެންނެވެ.
އަމިއްލަ ދަނޑުގައި ކުޅެމުން ދިޔަ އަލަވޭސްގެ ޑިފެންސްލައިން ބެލެހެއްޓުމުގައި އެ ޓީމުގެ ޑިފެންޑަރުން ރަނގަޅު ކުޅުމެއް ދައްކަމުންދިޔަ މި މެޗުގައި ރެއާލަށް މައްސަލަ ދިމާވީ އެއް ކުޅުންތެރިއަކު މަދުކޮށް މެޗުގެ ދެ ވަނަ ހާފްގެ ބޮޑު ބައި ކުޅެން ޖެހުމުންނެވެ. މެޗުގެ 54 ވަނަ މިނިޓްގައި ރެއާލްގެ ނަޗޯ އަށް ސީދާ ރަތް ކާޑެއް ދެއްކީ އަަލަވޭސްގެ ސާމޫ އޮމޮރޮއްދީނަށް ކުރި ނުރައްކާތެރި ފައުލަކަށެވެ.
މެޗުގައި ފެނިގެންދިޔަ ހަމައެކަނި ގޯލު ރެއާލުން ކާމިޔާބުކުރީ އިތުރު ވަގުތުގެ ދެ ވަނަ މިނިޓްގަ އެވެ. ޓޯނީ ކްރޫސް ނަަގައިދިން ކޯނަރަކުން ރެއާލަށް މި ލަނޑު ޖަހައިިދިނީ ލޫކަސް ވަޒްކޭޒް އެވެ.
ރޭ ޖިރޯނާ އިން ވަނީ އާޓެމް ޑޮވްބީކްގެ ޕެނަލްޓީން ލީޑުނަގައިފަ އެވެ. ބެޓިސް އަށް އެއްވަރުކޮށްދިނީ ޖާމެން ޕެޒެލާ އެވެ.
ސްޕެނިޝް ލީގުގެ މެޗުތައް ދެން އޮންނާނީ ޖެނުއަރީ މަހުގެ ފުރަތަމަ ހަފްތާގަ އެވެ.
