މި ސަރުކާރުން ކުރިއަށްގެންދާނެ އެންމެ ބޮޑު އެއް މަޝްރޫއު ކަމަށްވާ ދެކުނު މާލެ އަތޮޅުގައި އޮންނަ ފުށިދިއްގަރު ފަޅު "ރަސްމާލެ" ގޮތުގައި ތަރައްގީކުރުމަށް ކުރިއަށްގެންދާ މަޝްރޫއުގެ އަގު އަދާކުރާނީ ހުޅުމާލޭން 10 ހެކްޓަރުގެ ބިމާއި ފުށިދިއްގަރުފަޅުން ހިއްކާ ބިމުން 60 ހެކްޓަރު ސީއެމްސީއަށް ދީގެން ކަމަށް އާބަންކޯ އިން ބުނެފި އެވެ.
"ހުޅުމާލެއިން ދޫކުރާ 10 ހެކްޓަރު, ރަސްމާލެއިން ދޫކުރާ 60 ހެކްޓަރު. އޭގެ ބަދަލުގައި އަޅުގަނޑުމެންނަށް މި ލިބެނީ 1093 ހެކްޓަރު ބިން. އެޗްޑީސީގެ އެސެޓަށް އެޗްޑީސީއަށް ޖަމާވެގެން މި އަންނަނީ," މިއަދު ބޭއްވި ނޫސްވެރިިންގެ ބައްދަލުވުމެއްގައި އާބަންކޯގެ މެނޭޖިން ޑިރެކްޓަރު ފަޒުލް ވިދާޅުވި އެވެ.
އަދި, އެ ބިންތައް ދޫކުރާ މުއްދަތާ ގުޅޭގޮތުން ސުވާލުކުރުމުން ވިދާޅުވީ ދޫކުރަނީ "ޑެވެލޮޕްމަންޓު ޕީރިއަޑް" އަށް ކަމަށެވެ. އެއީ 49 އަހަރު + 50 އަހަރު ކަމަށް ފަޒުލް ވިދާޅުވި އެވެ.
އެހެންކަމުން މި ބިންތައް އެ ކުންފުނިތަކަށް 99 އަހަރަށް ލިބިގެންދާނެ އެވެ. މި ބިންތައް އެ ކުންފުންޏަށް ބޭނުން އަގެއްގައި ވިއްކޭނެ ކަމަށާއި އެކަމަކު ފުރުސަތު ލިބޭނީ ހުޅުމާލޭގެ މާސްޓާ ޕްލޭނާ އެއްގޮތަށް ބިންތައް ވިއްކަން ކަމަށް ފަޒުލް ވިދާޅުވި އެވެ.
މި މަޝްރޫއު ކުރިއަށްގެންދަނީ ކޯޕަރޭޓް ގެރެންޓީއަކާ އެކު އާބަންކޯގެ ކޭޝްފްލޯއަށް އެއްވެސް އަސަރެއް ނުކުރާނެ ގޮތަށް ކަމަށް ފަޒުލް ވިދާާޅުވި އެވެ.
މި މަޝްރޫއު ފެށުމަށްޓަކައި އަންނަ އަހަރަށް ލަފާކުރާ ބަޖެޓުގައި 400 މިލިއަން ރުފިޔާ ހިމަނާފައި އޮތެވެ. ނަމަވެސް ރައްޔިތުންގެ މަޖިލީހުން އެ ބަޖެޓު އުނިކުރުމާ އެކު އާބަންކޯ މެދުވެރިކޮށް ސަރުކާރުން އެ މަޝްރޫއުގެ މަސައްކަތް ފެށި އެވެ.
ފުށިދިއްގަރުފަޅަކީ ގާތްގަނޑަކަށް 1،280 ހެކްޓަރުގެ ބޮޑު ސަރަހައްދެކެވެ. އެ ފަޅުން 1153 ހެކްޓަރު ހިއްކާނެ އެވެ.
ހިއްކާ ބޮޑުމިނާއި ރަށުގެ އުސްމިން އެނގުނާއި ފަޅުގެ ފުންމިން އެނގުނު ނަމަވެސް، މުޅި މަޝްރޫއުގެ ހަރަދެއް ނޭނގެ އެވެ. މިއަދުގެ ނޫސްވެރިންގެ ބައްދަލުވުމުގައި ވެސް ނުކުރެ އެވެ.
ބިން ހިއްކުމާއި ގޮނޑުދޮށް ހިމާޔަތްކުރުމުގެ މަސައްކަތްކޮށްފައިވާ ބައެއް ފަރާތްތަކުން ބުނެފައިވާ ގޮތުގައި ފުށިދިއްގަރުފަޅު ހިއްކައި، އެތަނުގެ ގޮނޑުދޮށް ހިމާޔަތް ކުރަން މަދުވެގެން 500 މިލިއަން ޑޮލަރު (7.7 ބިލިއަން ރުފިޔާ) ހަރަދުވާނެ އެވެ.
