ކ. ފުށިދިއްގަރު ފަޅު ހިއްކައިގެން ތަރައްގީކުރާ "ރަސްމާލެ" އިން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން 99 އަހަރަށް ދިނުމަށް ސަރުކާރުން ވެފައިވާ އެއްބަސްވުން ބާތިލުކުރަން ހުށަހެޅި ދުސްތޫރީ މައްސަލަ ބަލައިނުގަތް ނިންމުން މުރާޖާކޮށްދޭން އެދި ސުޕްރީމް ކޯޓުގެ ފަނޑިޔާރުންގެ މަޖިލީހަށް ހުށަހަޅައިފި އެވެ.
މި މައްސަލަ އަކީ ގާނޫނީ ވަކީލު އަދި ކެންދޫ ދާއިރާގެ ކުރީގެ މަޖިލިސް މެންބަރު އަލީ ހުސައިން ސުޕްރީމް ކޯޓަށް ހުށަހެޅުއްވި މައްސަލައެކެވެ. ނަމަވެސް، އެ ކޯޓުގެ ރަޖިސްޓްރާ ވަނީ މިއީ ފުރަތަމަ މަރުހަލާގައި ސީދާ ސުޕްރީމް ކޯޓަށް ބަލައިގަނެވޭނެ ބާވަތުގެ މައްސަލައެއް ނޫން ކަމަށް ނިންމާ، މައްސަލަ ބޭރުކޮށްލާފަ އެވެ.
ރަޖިސްޓްރާގެ ނިންމުން މުރާޖާކުރުމާ ގުޅިގެން އަލީ ހުސައިން އިއްޔެ އެކްސްގައި ވިދާޅުވީ، ރަޖިސްޓްރާ ނިންމަވާފައިވާ ނިންމުން އަލުން ބަލައިދިނުމަށް އެދި ސުޕްރީމް ކޯޓުގެ ފަނޑިޔާރުންގެ ބެންޗަށް އޭނާ މިހާރު މައްސަލަ ހުށަހަޅާފައިވާ ކަމަށެވެ.
އަލީ ހުސައިންގެ މައްސަލައިގައި ވަނީ، އިންފްރާސްޓްރަކްޗާ މިނިސްޓްރީ އާއި އީގަލް ހިލްސްއާ ދެމެދު ސޮއިކުރި އެއްބަސްވުމުގެ ދަށުން، ލީސް އެކުއިޒިޝަން ކޮސްޓެއް އަދި ކުއްޔެއްވެސް ނުނަގާ މުޅިން ހިލޭ ރަސްމާލެއިން 500 ހެކްޓަރުގެ ބިން 99 އަހަރަށް ދޭން ކަނޑައަޅާފައި ވަނީ ގާނޫނުއަސާސީގެ 250 ވަނަ މާއްދާގެ (ހ) އާ ހިލާފަށް ކަމަށެވެ.
މީގެ އިތުރުން އެ ބިމުގައި ތަރައްގީކުރާ ތަންތަން ތިންވަނަ ފަރާތަކަށް ވިއްކާ ނުވަތަ ވާރުތަވާ ހާލަތުގައި، އިތުރު 99 އަހަރަށް އެ ފަރާތްތަކަށް ލިބޭ ގޮތަށް އޮތުމަކީ ގާނޫނުއަސާސީގެ 251 ވަނަ މާއްދާގެ (ހ) އަދި (ށ) އާ ތައާރުޒުވާ ކަމެއް ކަމަށް ބުނެ މުޅި އެއްބަސްވުން ބާތިލުކުރަން އޭނާ ވަނީ އެދިފަ އެވެ.
މި މައްސަލައިގައި ވަކި ގޮތެއް ނިމެންދެން އެއްބަސްވުމަށް އަމަލުކުރުން މަޑުޖައްސާލުމުގެ ވަގުތީ އަމުރަކަށް ވެސް ހުށަހަޅާފައިވެ އެވެ.
ސަރުކާރުން އަންނަނީ އަންނަ މަހުގެ ތެރޭގައި އީގަލް ހިލްސާއޭ އެކީ އެއްބަސްވުމުގައި ސޮއިކުރަން މަސައްކަތްކުރަމުންނެވެ. އެއީ ކޮމާޝަލް ޓާމްސް އެއްބަސްވުމުގެ ދަށުން، 60 ދުވަހުގެ ތެރޭގައި މައި އެއްބަސްވުމުގައި ސޮއިކުރަން ދިވެހި ސަރުކާރުން އެއްބަސްވެފައިވާތީ އެވެ.
ނަމަވެސް އޭގެ ކުރިން ގާނޫނުތަކަށް ބައެއް ބަދަލުތައް ގެނެސް މި ޕްރޮޖެކްޓުގެ ބޭނުމަށް ފާސްކުރާ ރިއަލް އެސްޓޭޓު ގާނޫނު ފާސްކުރަން ޖެހެ އެވެ.
