މުމްބާއީ، އިންޑިއާ (ޑިސެމްބަރު 16) - ދުނިޔޭގެ އެންމެ މަގުބޫލު އެއް ކްރިކެޓް ލީގު، އިންޑިއަން ޕްރިމިއާ ލީގު (އައިޕީއެލް)ގެ އެންމެ ކާމިޔާބު ޓީމު، މުމްބާއީ އިންޑިއަންސްގެ ކެޕްޓަން، ރޯހިތު ޝަރްމާ، އެ މަގާމުން ވަކިވެއްޖެ އެވެ.
އައިޕީއެލްގެ އަންނަ ސީޒަނުގައި މުމްބާއީ އިންޑިއަންސްގެ ކެޕްޓަންކަން ކުރާނެ ކަމަށް އެ ޓީމުން އިއުލާނުކޮށްފައިވަނީ ގުޖުރާތު ޓައިޓަންސްގެ ކެޕްޓަން، އޯލްރައުންޑަރު، ހާޑިކް ޕާންޑްޔާ އެެވެ. ހާޑިކް ޕާންޑްޔާ އާއި އޭނާގެ ބޭބެ، ކްރުނާލް ޕާންޑްޔާ ވަނީ ކުރިން މުމްބާއީ އިންޑިއަންސް އަށް ކުޅެފަ އެވެ.
ހާޑިކް ޕާންޑްޔާ ވަނީ 2016 އިން ފެށިގެން 2021 އަށް މުމްބާއީ އިންޑިއަންސް އަށް ކުޅެފަ އެވެ.
މުމްބާއީ އިންޑިއަންސް ދޫކޮށް، ހާޑިކް ޕާންޑްޔާ ކުޅުނު ގުޖުރާތު ޓައިޓަންސް، ވަނީ މިދިޔަ ދެ ސީޒަނުގައި އައިޕީއެލް ފައިނަލުގައި ކުޅެ އެއް ފަހަރު ޗެމްޕިއަންކަން ހޯދައިފަ އެވެ.
ގުުޖުރާތު ޓައިޓަންސް މެޗެއްގެ ތެރެއިން ހާޑިކް ޕާންޑްޔާ: އޭނާ އަކީ މިދިޔަ ދެ ސީޒަނުގައި އެ ޓީމުގެ ކެޕްޓަން.
މުމްބާއީ އިންޑިއަންސް އިން ބުނީ ކެޕްޓަންކަން ރޯހިތު އަތުން ނަަގައި، ހާޑިކް ޕާންޑްޔާ އަށް ދޭން ނިންމީ މުސްތަގުބަލަށް ޓީމެއް ބިނާކުރަން އާ ލީޑަރެއް ކަނޑައަޅައިގެން ކުރިއަށްދިއުމުގެ ގޮތުން ކަމަށެވެ.
އައިޕީއެލްގެ އެންމެ ކާމިޔާބު ދެ ޓީމަކީ ޗެންނާއީ ސުޕަ ކިންގްސް އާއި މުމްބާއި އިންޑިއަންސް އެވެ. ދެ ޓީމުން ވެސް ވަނީ ފަސް ތަށި ހޯދައިފަ އެވެ.
މުމްބާއީ އިންޑިއަންސްގެ ކާމިޔާބީގައި އެންމެ އިސް ދައުރެއް އަދާކުރި އެއް ކުޅުންތެރިއަކީ، އެންމެ ފުރަތަމަ 2013 ވަނަ އަހަރު ކެޕްޓަނަކަަށް ހަމަޖެއްސި ރޯހިތު އެވެ. މުމްބާއީ އިން ފަސް ތަށި ހޯދިއިރު، ވެސް ޓީމުގެ ކެޕްޓަނަކީ، ރޯހިތު އެވެ.
ރޯހިތު، ކެޕްޓަނެއްގެ ގޮތުގައި ހުރެ، މުމްބާއީ އިންޑިއަންސް އިން ކުޅުނު 158 މެޗުގެ ތެރެއިން 87 މެޗުން މޮޅުވިއިރު، ބަލިވީ 67 މެޗުންނެވެ.
މުމްބާއީ އިންޑިއަންސްގެ ގްލޯބަލް ހެޑް އޮފް ޕާފޯމަންސް، މަހޭލާ ޖަޔަވަރްދަނޭ ބުނީ ރޯހިތު ކެޕްޓަނެއްގެ ގޮތުގައި ހުރެ ދެއްކި ތަފާތު، ދެން ތިބި ކުޅުންތެރިން މިސާލެއްގެ ގޮތުގައި ނަގަން ޖެހޭ ކަމަށެވެ. އަދި އަލަށް ޓީމުގެ ކެޕްޓަންކަން ކުރާ ހާޑިކް ޕާންޑްޔާ އަކީ، އައިޕީއެލްގެ މިދިޔަ ދެ ސީޒަނުގައި ލީޑަރެއްގެ ގޮތުގައި ބަލާއިރު، އެންމެ ބޮޑު ކުރިއެރުމެއް ހޯދި ކެޕްޓަން އެވެ.
