ތުރުކީގެ ސަރުކާރުން އިޒްރޭލާއެކު ބާއްވާ ގުޅުންތަކާ ދެކޮޅަށް އެގައުމުގެ މަޖިލީހުގައި ވަކާލާތު ކުރައްވަނިކޮށް ހާޓްއެޓޭކެއް ޖެހުނު އިދިކޮޅު މެންބަރު، ހަސަން ބިޓްމެޒް އަވަހާރަވެއްޖެ އެވެ.
ތުރުކީގެ ފެލިސިޓީ ޕާޓިއަށް ނިސްބަތްވާ ބިޓްމެޒް އަވަހާރަވީ ހާޓްއެޓޭކު ޖެހުނުތާ ދެ ދުވަސް ފަހުން ތުރުކީގެ ވެރިރަށް، އަންކާރާގެ ހޮސްޕިޓަލެއްގައި ފަރުވާ ހޯއްދަވަމުން ދަނިކޮށެވެ.
އުމުރުން 54 އަހަރުގެ ބިޓްމެޒްއަށް ހާޓްއެޓޭކެއް ޖެހުނީ ތުރުކީގެ ރައީސް ރަޖިބް ތައްޔިބު އުރުދުގާން ނިސްބަތްވެލައްވާ ޖަސްޓިސް އެންޑް ޑިވެލޮޕްމެންޓު ޕާޓީން ވިޔަފާރީގެ ނަމުގައި އިޒްރޭލަށް ވާގިވެރިވެ އެހީތެރިވެދޭ ކަމަށް ވިދާޅުވެ ވަރުގަދަ ތުހުމަތުތަކެއް ކުރައްވައި މިދިޔަ އަންގާރަ ދުވަހު މަޖިލީހުގައި ތަގުރީރު ކުރައްވަމުން ދަނިކޮށެވެ.
"އިޒްރޭލަށް ދަތުރުކުރާ ބޯޓުފަހަރަށް ކަލޭމެން ހުއްދަ ދެނީ ލަދެއްނެތި، އެއީ ވިޔަފާރި ކަމަށް ބުނެފައި... ކަލޭމެންނަކީ އިޒްރޭލުގެ ވާގިވެރިން،" 20 މިނެޓަށް ދިގުދެމިގެންދިޔަ އެ ތަގުރީރުގައި ބިޓްމެޒް ވިދާޅުވެފައިވެ އެވެ.
އެ ތަގުރީރުގައި ބިޓްމެޒް ވަނީ އިޒްރޭލުން ގާޒާގައި ގަތުލުއާއްމުތައް ހިންގަމުން ދަނިކޮށް ވެސް އިޒްރޭލާއެކު ހާރިޖީ ގުޅުން ވަރުގަދަ ކުރުމަށް އުރުދުގާން މަސައްކަތް ކުރައްވާ ކަމަށް ތުހުމަތު ކުރައްވައިފަ އެވެ. އަދި އިޒްރޭލުގެ ޔަހޫދީންނަށް ވެސް އެ ތަގުރީރުގައި ބިޓްމެޒް ވަނީ ވަރުގަދަ ބަހުގެ ހަމަލާތަކެއް ރައްދު ކުރައްވައިފަ އެވެ.
"ތާރީހު ހިމޭން ކުރަން އުޅުނަސް، ހަގީގަތް ސިއްރެއް ނުވާނެ، އެމީހުން [ޔަހޫދީން] ހީކުރަނީ އަހަރުމެންގެ [މުސްލިމުންގެ] ކިބައިން މިންޖުވެއްޖެނަމަ އެމީހުންނަސް އެއްވެސް މައްސަލައެއް ކުރިމަތި ނުވާނެ ކަމަށް، އެކަމަކު އަހަރުމެންގެ ކިބައިން ސަލާމަތްވިޔަސް ކަލޭމެންގެ އަމިއްލަ ނަފުސުގެ ވޭނުން ސަލާމަތެއް ނުވެވޭނެ، ދުނިޔޭގެ ތާރީހުގައި ކަލޭމެންނަށް އަދަބުން ސަލާމަތްވެވުނު ނަމަވެސް ﷲ ގެ ކޯފާއިން ކަލޭމެންނަށް ސަލާމަތެއް ނުވެވޭނެ،" ހާޓްއެޓޭކް ޖެހިގެން ވެއްޓުމުގެ ކުރިން، އިޒްރޭލުގެ ޔަހޫދީންނަށް މުހާތަބު ކުރައްވައި އެންމެ ފަހު ޖުމުލައަކަށް ބިޓްމެޒް ވިދާޅުވެފައިވެ އެވެ.
ތުރުކީއާއި އިޒްރޭލާ ދެމެދު އޮންނަ ގުޅުން ދުވަސްތަކަކަށް ހީނަރުވެފައި އޮތުމަށްފަހު އުރުދުގާން ވަނީ އިޒްރޭލާއި ތުރުކީގެ ގުޅުން ބަދަހި ކުރުމުގެ މަސައްކަތްތަކެއް މިފަހުން ކުރައްވައިފަ އެވެ. ނަމަވެސް ފާއިތުވީ ދުވަސްތަކުގައި އިޒްރޭލުން ފަލަސްތީނުގައި ހިންގަމުން ގެންދާ ގަތުލުއާއްމުތަކާ ދެކޮޅަށް އެންމެ ބޮޑަށް ނުރުހުން ވެސް ފާޅު ކުރައްވާފައި ވާ އެއްބޭފުޅަކީ އުރުދުގާން އެވެ.
ތުރުކީގެ އިތުރުން އިސްލާމީ ބޮޑެތި ގިނަ ގައުމުތަކުން ވެސް އިޒްރޭލުން ގާޒާގައި ހިންގަމުން ގެންދާ ނަސްލު ނައްތާލުމުގެ ޖަރީމާތައް ހުއްޓުވުމަށް އެކަށީގެންވާ މަސައްކަތެއް ނުކުރެ އެވެ.
ތުރުކީގެ ގްރޭންޑް ނޭޝަނަލް އެސެމްބްލީގައި އިއްޔެ ވަނީ ބިޓްމެޒްގެ ޖަނާޒާ ބާއްވައިފަ އެވެ. ބިޓްމެޒް ފަސްދާނުލާފައި ވަނީ ތުރުކީގެ ދިދައަކާއި ފަލަސްތީނުގެ ދިދައަކާއެކު އެވެ.
