ރައީސް ޑރ. މުހައްމަދު މުއިއްޒުގެ އެންމެ ބޮޑު ޕްރޮޖެކްޓުގެ ގޮތުގައި ފެށުމަށް ނިންމާފައިވާ ފުށިދިއްގަރުފަޅު ހިއްކަން އަންނަ އަހަރުގެ ބަޖެޓުގައި ހިމެނި 400 މިލިއަން ރުފިޔާ މަޖިލީހުގެ ކޮމިޓީން އުނިކުރުމާ ގުޅޭ ގޮތުން ރައްދެއް ދޭން ބޭނުން ނުވާ ކަމަށް ސަރުކާރުން ބުނެފި އެވެ.
ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު "އަދަދު" ނޫހަށް ވިދާޅުވީ "ރައްޔިތުންގެ މަޖިލީހުގައި ހިނގަމުންދާ ކަމަކަށް ވާތީ، ތިކަމުގައި [ފުށިދިއްގަރުފަޅުގެ ބަޖެޓު އުނިކުރި މައްސަލަ] އެއްވެސް ކޮމެންޓެއް ނެތް" ކަމަށެވެ.
ފުށުދިއްގަރުފަޅު ހިއްކަން ހިމެނި ފައިސާ މަޖިލީހުގެ ބަޖެޓު ކޮމިޓީން އުނިކޮށް، އޭގެތެރެއިން 200 މިލިއަން ރުފިޔާ ހިމެނީ ރައީސް އިބްރާހިމް މުހައްމަދު ސޯލިހުގެ ސަރުކާރުން ތަރައްގީކުރަން ފެށި ގުޅިފަޅާއި ގިރާވަރު އަދި ހުޅުމާލެއިން ގޯތި ދިން ސަރަހައްދުގައި ފެނާއި ނަރުދަމާ ގާއިމު ކުރުމަށެވެ. ބާކީ 200 މިލިއަން ރުފިޔާ ވަނީ އެކި މަޝްރޫއުތަކަށް ބަހާލައިފަ އެވެ.
ބަޖެޓު ކޮމިޓީގެ މެންބަރު ބުނީ އެ ބަޖެޓު އުނިކުރި މައިގަނޑު އެއް ބޭނުމަކީ ފުށިދިއްގަރުފަޅު ހިއްކުމަށް ވުރެ، މިހާރު ހިއްކާފައިވާ ބިން ތަރައްގީކޮށް ރައްޔިތުންނަށް ބޯހިޔާވަހިކަން އަވަސްކުރުން މުހިންމުވުމުން ކަމަށެވެ.
އަންނަ އަހަރުގެ ބަޖެޓަށް މަޖިލީހުގެ ބަޖެޓު ކޮމިޓީން ގެނައި ބަދަލުތަކާއެކު 306 މިލިއަން ރުފިޔާ އިތުރުވެ، ޖުމުލަ ބަޖެޓު 49.5 ބިލިއަން ރުފިޔާއިން 49.8 ބިލިއަން ރުފިޔާ އަށް ވަނީ އިތުރުވެފަ އެވެ.
