އިންޑިއާއަށް ދައްކަން ޖެހޭ ދަރަންޏެއް ދެއްކުމާ ގުޅިގެން އަސާސީ މުދާ އެތެރެކުރާނެ ފައިސާ ނެތް ކަމަށް ދެކެވޭ ވާހަކަތައް ދޮގުކޮށް، އެ ބާވަތްތަކުގެ މުދާ އެތެރެކުރަން އެއްވެސް ދައްޗެއް ނެތް ކަމަށް ފިނޭންސް މިނިސްޓްރީން ޔަގީންކަން ދީފި އެވެ.
ފިނޭންސުން މިހެން ބުނީ މި ލޯނު ދައްކާފައި ބޭނުންކުރެވޭ ރިޒާވުގައި އަސާސީ މުދާ އެތެރެކުރާނެ ފައިސާ ވެސް ނެތް ކަމަށް ކުރީގެ ރައީސް މުހައްމަދު ނަޝީދު ވިދާޅުވެފައިވާ ދަނޑިވަޅެއްގަ އެވެ. ނަޝީދު އިއްޔެ ވިދާޅުވީ، ސްޓޭޓް ބޭންކް އޮފް އިންޑިއާ (އެސްބީއައި) އަށް ދައްކަން ޖެހޭ 50 މިލިއަން ޑޮލަރު ދައްކާފައި ބޭނުންކުރެވޭ ރިޒާވުގައި ތެލާއި ބޭހާއި ކާޑު އެތެރެކުރާނެ ފައިސާ ނުހުންނާނެ ކަމަށެވެ.
އެސްބީއައިގެ ދަރަނި ދެއްކިކަން ހާމަކޮށް ފިނޭންސުން ނެރުނު ނޫސް ބަޔާނުގައި ބުނީ، ތެލާއި ކާބޯތަކެތީގެ ބާވަތްތަކާއި އަދި ބޭސްފަރުވާއަށް ބޭނުންވާ ސާމާނު ފަދަ ޒަަރޫރީ ތަކެތި އިމްޕޯޓުކުރުމަށް ބޭނުންވާ ބޭރު ފައިސާ މެދުނުކެނޑި ލިބޭނެ އިންތިޒާމު ސަރުކާރުން ހަމަޖައްސާފައިވާ ކަމަށެވެ. އަދި މި ފަދަ އަސާސީ ހިދުމަތްތަކައި މުދާ މެދުނުކެނޑި ރައްޔިތުންނަށް ލިބޭނެ މަގު ފަހިކޮށްދިނުމަކީ ސަރުކާރުން އެންމެ އިސްކަންދޭ ކަންތައް ކަމަށް ވެސް ބުންޏެވެ.
"އެހެންކަމުން ދަރަނި އަދާކުރުމުގެ ސަބަބުން އަސާސީ މުދާ އެތެރެކުރުމަށް ދަތިތަކެއް ކުރިމަތިވެދާނެ ކަމަށް ބުނެ ފަތުރަމުންދާ ވާހަކަތަކަކީ އެއްވެސް އަސާސެއް ނެތް ވާހަކަ ކަމުގައި ދަންނަވަން" ފިނޭންސުން ބުންޏެވެ.
ފިނޭންސުން ވަނީ ކުރިއަށް އޮތް ތަނުގައި ވެސް ދަރަނި ދެއްކުމަށް ޓަކައި ދުރާލާ ތައްޔާރުވެ، ކަނޑައެޅިފައިވާ ވަގުތަށް ދަރަނި ދައްކައި ހަލާސްކުރަމުން އަންނާނެ ކަމަށް ބުނެފަ އެވެ.
އޭގެ އިތުރުން ރިޒާވު ވަރަގަދަކޮށް، ރައްޔިތުންގެ އަސާސީ ބޭނުންތައް ރައްކާތެރިކޮށްދިނުމުގެ ގޮތުްނ ސަރުކާރުން ބައިނަލްއަގުވާމީ އެކި މާލީ އިދާރާތަކާއި ރާއްޖެއަށް އެހީދޭ އެކި ޖަމާއަތްތަކާއެކު ފާއިތުވި ދުވަސްްތަކުގައި މުހިންމު މަޝްވަރާތަކެއް ކޮށްފައިވާ ފިނޭންސުން ބުންޏެވެ. އަދި، މި މަޝްވަރާތައް ވަރަށް ކާމިޔާބުކަމާއެކު ކުރިއަށްދާ ކަމަށާއި، މީގެ ސަބަބުން ރާއްޖޭގެ ބޭރު ފައިސާގެ ރިޒާވު އިތުރަށް ވަރުގަދަ ވެގެން ދާނެ ކަމަށް އެ މިނިސްޓްރީން ބުންޏެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ އެންމެ ފަހުގެ ރިޒާވު އަދަދުތަކުން ދައްކާ ގޮތުގައި މިދިޔަ މަސް ނިމުނުއިރު، ޖުމްލަ ރިޒާވުގައި ހުރީ 643 މިލިއަން ޑޮލަރެވެ. އަދި، ބޭނުންކުރެވޭ ރިޒާވުގައި ހުރީ 200 މިލިއަން ޑޮލަރެވެ.
