ތިނަދޫ ސިޓީގައި ހުންނަ އިސްލާމީ މަރުކަޒުގައި އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) ގެ ކެމްޕަހެއް ހިންގަން ހަވާލުކޮށްފި އެވެ.
މިއަދު އިސްލާމިކް ޔުނިވާސިޓީގައި ބޭއްވި ރަސްމިއްޔާތުގައި ތިނަދޫ އިސްލާމީ މަރުކަޒުގައި އެ އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މުހައްމަދު ޝަހީމް އަލީ ސައީދު އެވެ. ޔުނިވާސިޓީގެ ފަރާތުން ސޮއިކުރެއްވީ ވައިސް ޗާންސެލާ ޑރ. އަލީ ޒާހިރު ބިން ސައީދު އެވެ.
އިސްލާމިކް ޔުނިވާސިޓީ ކޯސްތައް ރާއްޖޭގެ ކޮންމެ ރަށަކަށް ވެސް މުހިންމު ކަމަށް އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި މިނިސްޓަރު ޝަހީމް ވިދާޅުވި އެވެ. އަދި ރައީސުލްޖުމްހޫރިއްޔާ ޑރ. މުހައްމަދު މުއިޒުގެ ބޮޑު ތަސައްވަރެއް އައިޔޫއެމްއާ މެދު އޮތް ކަމަށް ވެސް އޭނާ ފާހަގަކުރެއްވި އެވެ.
"ރައީސް ވަނީ އިރުޝާދު ދެއްވާފައި މި ޔުނިވާސިޓީގެ ގޮތްޕެއް ނުވަތަ މި ޔުނިވާސިޓީގެ ކޯސްތައް ރާއްޖޭގެ ދެކުނު އަތޮޅުތަކަށް ފަށައިގެން ކުރިއަށް ގެންދިއުމަށް. ރައީސުލްޖުމްހޫރިއްޔާގެ އިރުޝާދުގެ ދަށުން މި މަސައްކަތް އަޅުގަނޑުމެން ކުރިއަށް ގެންދިޔައީ" ޝަހީމް ވިދާޅުވި އެވެ.
ތިނަދޫއަކީ ހުވަދު އަތޮޅުގެ މަރުކަޒީ ރަށެއްކަން ފާހަގަކުރައްވަމުން ޝަހީމް ވިދާޅުވީ އެރަށުގައި އައިޔޫއެމްގެ ކެމްޕަހެއް ހިންގުމަކީ ދެކުނުގެ ގިނަ ރައްތަކުގައި ތިބި ދަރިވަރުންނަށް ފަސޭހައެއް ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން އައިޔޫއެމްގެ ވައިސް ޗާންސެލާ އަލީ ޒާހިރު ވިދާޅުވީ، މި އެއްބަސްވުމުގެ ސަބަބުން ގިނަ ފައިދާތަކެއް ޔުނިވާސިޓިއަށް ކުރާނެ ކަމަށެވެ.
"މިހާރުވެސް އަޅުގަނޑުމެން ތިނަދޫގައި ކިޔަވައިިދިނުމުގެ މަސައްކަތްތަކެއް އެބަ ކުރަން. އަޅުގަނޑުމެންނަށް މިކަން ކުރުމުގައި މިހާރު ދިމާވާ ދަތިތައް ﷲ އިރާދަފުޅުކުރެއްވިއްޔާ މިއަދުގެ މި އެއްބަސްވުމުގެ ދަށުން ފިލައިގެން ދާނެ" އަލީ ޒާހިރު ވިދާޅުވި އެވެ.
ތިނަދޫ އިސްލާމީ މަރުކަޒުގައި އައިޔޫއެމްގެ ކޯސްތައް ހިންގުމަށް ދީފައި ވަނީ 10 އަހަރުގެ މުއްދަތަށެވެ. މި އެއްބަސްވުމުގެ ދަށުން އައިޔޫއެމްގެ ކޯސްތައް ހިންގުމަށް އިދާރީ މަސައްކަތަށް ބޭނުންވާ އޮފީހާއި ކުލާސްތަކެއް ލިބިގެންދާނެ އެވެ.
