އަންނަ އަހަރަށް ދައުލަތުން ލަފާކުރާ ބަޖެޓުން ޕަބްލިކް ސެކްޓާ އިންވެސްޓްމަންޓް ޕްރޮޖެކްޓު (ޕީއެސްއައިޕީ) ތަކަށް 8.6 ބިލިއަން ރުފިޔާ ހަރަދުކުރުމަށް ހިމަނައިފި އެވެ.
ބަޖެޓު ތައްޔާރުކޮށް ފިނޭންސް މިނިސްޓްރީން ވަނީ އިއްޔެ ރައްޔިތުންގެ މަޖިލީހަށް ހުށަހަޅާފަ އެވެ. ފިނޭންސް އިން ހުށަހަޅާފައިވަނީ 49.5 ބިލިއަން ރުފިޔާގެ ބަޖެޓެކެވެ.
ބަޖެޓު ލުއިފޮތުގައި ލަފާކޮށްފައިވާ ގޮތުން އަންނަ އަހަރު ދައުލަތުގެ އާމްދަނީ އަށް ލިބޭނީ 33.5 ބިލިއަން ރުފިޔާއެވެ. އޭގެ ތެރެއިން ތަރައްގީގެ އެކި އެކި މަޝްރޫއުތަކަށް 8.6 ބިލިއަން ރުފިޔާ ހަރަދުވާނެ ކަމަށް ވަނީ ލަފާކޮށްފަ އެވެ.
މިއީ މިއަހަރަށް ފާސްކުރި ބަޖެޓުން ޕީއެސްއައިޕީގެ މަޝްރޫއުތަކަށް ހަރަދުކުރަން ފާސްކުރި އަދަދާ ދާދި އެެއްވަރުގެ އަދަދެކެވެ. މި އަހަރަށް ފާސްކުރީ 8.5 ބިލިއަނެވެ. ނަމަވެސް އޮކްޓޯބަރު 19 ގެ ނިޔަލަށް ޕީއެސްއައިޕީ މަޝްރޫއުތަކަށް 9.2 ބިލިއަނަށް ވުރެ ގިނަ ރުފިޔާ ދައުލަތުން ވަނީ ހަަރަދުކޮށްފަ އެވެ.
އަންނަ އަހަރުގެ ބަޖެޓުން ޕީއެސްއައިޕީ މަޝްރޫއުތަކަށް ހަރަދުކުރަން ރާވާފައިވާ ގޮތް
- ލަފާފުރުމުގެ ދަތިކަން ހައްލުކުރުމަށް (ބަނދަރާއި އެއާޕޯޓުތައް ތަރައްގީކުރުމަށް) 3.2 ބިލިއަން ރުފިޔާ
- ބިން ހިއްކުމާއި މަގު ހެދުމަށް 1.69 ބިލިއަން ރުފިޔާ
- ތިމާވެށި ރައްކާތެރިކުރަން 1.12 ބިލިއަން ރުފިޔާ
- ފެނާއި ނަރުދަމާ ގާއިމުކުރަން 645 މިލިއަން ރުފިޔާ
- ސިއްހީ ދާއިރާ ތަރައްގީކުރަން 439 މިލިއަން ރުފިޔާ
- ބޯހިޔާވަހިކަން ފޯރުކޮށްދޭން 404 މިލިއަން ރުފިޔާ
އޭގެ އިތުރުން އިޖުތިމާއީ އަދި ދީނީ ހިދުމަތްތަކަށް 310 މިލިއަން ރުފިޔާ އާއި، ގައުމީ ސަލާމަތާއި ސުލްހަ މަސަލަސްކަން ގާއިމުކުރަން 246 މިލިއަން ރުފިޔާ އާއި ތައުލީމާއި ގުޅޭ ވަސީލަތްތަށް ގާއިމުކުރަން 238 މިލިއަން ރުފިޔާގެ އިތުރުން ތަރައްގީގެ އެހެނިހެން ކަންތައްތަކަށް 282 މިލިއަން ރުފިޔާ ހަރަދުކުރުމަށް ބަޖެޓުގައި ވަނީ ހިމަނާފަ އެވެ.
އަންނަ އަހަރަށް ދައުލަތުގެ ހަރަދުގެ ގޮތުގައި ލަފާކޮށްފައިވަނީ 47.3 ބިލިއަން ރުފިޔާއެވެ. އެހެންކަމުން އަންނަ އަހަރަށް ލަފާކޮށް ފިނޭންސް އިން މިހާރު ހުށަހަޅާފައިވާ ބަޖެޓަކީ 13.7 ބިލިއަން ރުފިޔާ ޑެފިސިޓް ބަޖެޓެކެވެ.
