ދިވެހިން އެންމެ ގިނައިން ފައިސާ ފޮނުވަނީ އިންޑިއާއަށް، ބިދޭސީން ބަންގްލަދޭޝްއަށް: އެމްއެމްއޭ

ބޭރު ގައުމުތަކަށް ފައިސާ ފޮނުވާ ރެމިޓަންސް ހިދުމަތްތައް މެދުވެރިކޮށް ދިވެހިން އެންމެ ގިނައިން ފައިސާ ފޮނުވަނީ އިންޑިއާއަށް ކަމަށާއި ބިދޭސީން އެންމެ ގިނައިން ފައިސާ ފޮނުވަނީ ބަންގްލަދޭޝްއަށް ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފި އެވެ.

ރާއްޖޭގައި ފައިސާގެ މުއާމަލާތްތައް ހިންގާ ގޮތުގެ މައްޗަށް އަލިއަޅުވާލައި އެމްއެމްއޭން އާންމުކުރި ފުރަތަމަ ޕޭމަންޓް ބުލެޓިންގައިވާ ގޮތުގައި، މިދިޔަ އަހަރު 49 މިލިއަން ޑޮލަރު (754 މިލިއަން ރުފިޔާ) ބޭރު ގައުމުތަކަށް ފޮނުވި އެވެ.

މީގެ ތެރެއިން 94 ޕަސެންޓު (ގާތްގަނޑަކަށް 46 މިލިއަން ޑޮލަރު ނުވަތަ 709 މިލިއަން ރުފިޔާ) ފޮނުވީ ބިދޭސީންނެވެ. ބިދޭސީން ފައިސާ ފޮނުވި ގައުމުތަކުގެ ލިސްޓުގެ އެންމެ ކުރީގައި ވަނީ، ރާއްޖޭގައި މަސައްކަތް ކުރާ އެންމެ ގިނަ ބިދޭސީން ނިސްބަތްވާ ބަންގްލަދޭޝްއަށެވެ. ދެން އެންމެ ގިނަ ފައިސާ ފޮނުވީ ނޭޕާލް އާއި ފިލިޕީންސްއަށެވެ.

ބިދޭސީން އެންމެ ގިނައިން ފައިސާ ފޮނުވި ގައުމުތައް

1. ބަންގްލަދޭޝް - 47.1 އިންސައްތަ (ގާތްގަނޑަކަށް 23 މިލިއަން ޑޮލަރު)
2. ފިލިޕީންސް - 11.2 އިންސައްތަ (ގާތްގަނޑަކަށް 5.6 މިލިއަން ޑޮލަރު)
3. ނޭޕާލް - 9.6 އިންސައްތަ (ގާތްގަނޑަކަށް 4.7 މިލިއަން ޑޮލަރު)

ރެމިޓަންސް ހިދުމަތްތައް ބޭނުންކޮށްގެން ދިވެހިން ބޭރު ގައުމުތަކަށް ފޮނުވީ 3 މިލިއަން ޑޮލަރެވެ. މި ލިސްޓުގެ އެންމެ ކުރީގައި އޮތީ، ދިވެހިން އާންމުކޮށް ބޭސްފަރުވާއަށް ދަތުރުކުރާ އަދި ގިނަ އަދަދެއްގެ ދިވެހިން ދިރިއުޅޭ އިންޑިއާގެ އިތުރުން ތައިލެންޑާއި ފިލިޕީންސް އެވެ.

ދިވެހިން އެންމެ ގިނައިން ފައިސާ ފޮނުވި ގައުމުތައް

1. އިންޑިއާ - 18.1 އިންސައްތަ (ގާތްގަނޑަކަށް 543،000 ޑޮލަރު)
2. ފިލިޕީންސް - 9.8 އިންސައްތަ (ގާތްގަނޑަކަށް 294،000 ޑޮލަރު)
3. ތައިލޭންޑް - 8.5 އިންސައްތަ (ގާތްގަނޑަކަށް 255،000 ޑޮލަރު)

ރެމިޓަންސް ހިދުމަތްތަކުން ފައިސާ ފޮނުވި ގޮތާއި ލިބުނު ގޮތް -- ޗާޓު/އެމްއެމްއޭ

ރާއްޖެއަށް އެންމެ ގިނަ ފައިސާ އަންނަނީ ޔޫއޭއީން

ބޭރު ގައުމުތަކުން އެންމެ ގިނަ ފައިސާ ރާއްޖެއަށް ވަދެފައި ވަނީ ޔޫއޭއީންނެވެ. ދެން އެންމެ ގިނަ ފައިސާ އައީ ތުރުކީ އާއި މެލޭޝީއާއިންނެވެ. އެގޮތުން ރާއްޖެއަށް މިދިޔަ އަހަރު ވަތް 2.3 މިލިއަން ޑޮލަރުގެ ތެރެއިން ރާއްޖެއަށް ވަންނަ ރެމިޓަންސް ފައިސާގެ ތެރެއިން ގިނަ ފައިސާ އަންނަނީ ދިވެހިންނަށެވެ.

ރާއްޖެއަށް އެންމެ ގިނައިން ފައިސާ ފޮނުވާ ގައުމުތައް

1. ޔޫއޭއީ - 23.1 އިންސައްތަ (ގާތްގަނޑަކަށް 531،300 ޑޮލަރު)
2. ތުރުކީ - 7.6 އިންސައްތަ (ގާތްގަނޑަކަށް 174،800 ޑޮލަރު)
3. މެލޭޝިއާ - 7.4 އިންސައްތަ (ގާތްގަނޑަކަށް 170،200 ޑޮލަރު)

އެމްއެމްއޭގެ ރިޕޯޓުގައި ހިމަނާފައި ވަނީ ރާއްޖޭގައި ހުއްދަ ދެވިފައިވާ ދެ ރެމިޓަންސް ހިދުމަތް ކަމުގައިވާ އައިލެންޑް ފައިނޭންޝަލް ސާވިސަސް (ވެސްޓަން ޔޫނިއަން) އާއި އެންބީއެލް މަނީ ޓްރާންސްފާ ހިދުމަތް މެދުވެރިކޮށް ފޮނުވި ފައިސާ އެވެ.

މި ރިޕޯޓުން ފާހަގަވީ އެއް ކަމަކީ ހަތަރު އަހަރުގެ ތެރޭގައި ރެމިޓަންސް ހިދުމަތްތައް ބޭރަށް ފޮނުވާ ފައިސާގެ އަދަދު ވަރަށް ބޮޑަށް މަދުވެފައިވާ ކަމެވެ. އެގޮތުން 2019ގައި ރެމިޓަންސް ހިދުމަތްތައް ބޭނުންކޮށްގެން ފޮނުވި ފައިސާ އާއި ލިބުނު ފައިސާގެ އަދަދު 80 މިލިއަން ޑޮލަރުގައި ހުރި އިރު، މިދޔަ އަހަރު އެ އަދަދު ވަނީ 52 މިލިއަން ޑޮލަރަށް ވެއްޓިފަ އެވެ.