ދައުލަތުގެ މި އަހަރުގެ ބަޖެޓަށް ބޭނުންވާ ފައިސާ އިތުރުކުރަން ސަރުކާރުން ސަޕްލިމެންޓަރީ ބަޖެޓު ހުށަހެޅީ ގާނޫނުގައި ބަޔާންކުރާ ހަމަތަކާ ހިލާފަށް ރައްޔިތުންގެ މަޖިލީހުގެ މައިނޯރިޓީ ލީޑަރު، މެދުހެންވޭރު ދާއިރާގެ މެމްބަރު އަލީ އާޒިމް މިއަދު ވިދާޅުވެއްޖެ އެވެ.
މަޖިލީހުގެ ރައީސް މުހައްމަދު ނަޝީދަށް އާޒިމް ފޮނުއްވި ސިޓީގައި ވިދާޅުވި ގޮތުގައި، މާލިއްޔަތު ގާނޫނުގައި އޮންނަނީ ސަޕްލިމެންޓަރީ ބަޖެޓު ތައްޔާރުކުރަން ޖެހެނީ ވޭތުވެ ދިޔަ މާލީ އަހަރުގައި ދައުލަތުގެ ހަރަދާއި އާމްދަނީގެ ހިސާބާއި، ދައުލަތުގެ އޮފީސްތަކުގެ ޕްރޮގްރާމް ބަޖެޓު ހިމެނޭ ގޮތަށެވެ.
އެކަމަކު ފިނޭންސް މިނިސްޓްރީން މިދިޔަ ހަފުތާގައި މަޖިލީހަށް ހުށަހެޅި ސަޕްލިމެންޓަރީ ބަޖެޓުގައި މިކަންކަން ހިމަނާފައި ނުވާ ކަމަށް އާޒިމްގެ ސިޓީގައި ލިޔުއްވާފައިވެ އެވެ. އެގޮތުން ބަޖެޓުގެ ބޮޑު ބަޔެއް ހަރަދުކުރާ ދެ މިނިސްޓްރީ ކަމުގައިވާ، ޕްލޭނިން މިނިސްޓްރީ އާއި ފިނޭންސް މިނިސްޓްރީގެ ދަށުން ބަލަހައްޓާ ބަޖެޓުން ހަރަދުކުރާނެ ޕްރޮގްރާމްތައް ވަކިވަކިން އެނގެން ނެތް ކަމަށް އޭނާ ފާހަގަ ކުރެއްވި އެވެ.
އޭގެ އިތުރުން ދައުލަތުގެ ހަރަދަށް ޒިންމާވުމުގެ ގާނޫނުގައި ބަޔާންކުރާ ކަންކަން ސަޕްލިމެންޓަރި ބަޖެޓުން އެނގެން ނެތް މައްސަލަ ވެސް އާޒިމްގެ ސިޓީގައި ފާހަގަކުރެއްވި އެވެ. މި މައްސަލައިގެ ތެރެއިން އޭނާ އަލިއަޅުވާލީ ހަރަދަށް ޒިންމާވުމުގެ ގާނޫނުގެ ދަށުން ހުށަހަޅަން ޖެހޭ ބަޖެޓު ޕޮޒިޝަން ރިޕޯޓަށެވެ.
މިއީ ދައުލަތުގެ މާލީ ހާލަތަށް ބަދަލު އަންނަ ކޮންމެ ފަހަރަކު މުރާޖައާކޮށް، މަޖިލީހާ ހިއްސާކުރަން ޖެހޭ ރިޕޯޓެއް ކަމަށް އާޒިމް ވިދާޅުވި އެވެ. އަދި ސަޕްލިމެންޓަރިީ ބަޖެޓާ އެކީ ދައުލަތުގެ މެދުރާސްތާގެ ބަޖެޓުގައި ކުރިއަށް އޮތް ދެ އަހަރުގެ ބަޖެޓު އަންދާޒާތަކަށް ބަދަލު އަންނާނެތީ، ބަޖެޓު ހުށަހަޅާއިރު ބަޖެޓު ޕޮޒިޝަނަށް އައި ބަދަލު ބަޔާންކޮށް ރިޕޯޓެއް ހުށަހަޅަން ޖެހޭ ކަމަށް ދެކެވަޑައިގަންނަވާ އޭނާ ވިދާޅުވި އެވެ.
މިކަންކަމުގެ މައްޗަށް ރިއާޔަތްކޮށް، އާޒިމް ވިދާޅުވީ ގާނޫނުތަކުގައި ބަޔާންކުރާ ހަމަތަކާ އެއްގޮތަށް ތައްޔަރުކޮށްފައި މެނުވީ މަޖިލީހުގެ ތަޅުމަށް ސަޕްލިމެންޓަރީ ބަޖެޓު ހުށަނޭޅެ ކަމަށް އާޒިމު ވިދާޅުވި އެވެ.
