މާފަންނު ޕޮލިސް ސްޓޭޝަންގެ ޕާޓިޝަން ހަލާކުކޮށްލި ދެ މީހަކު، ބަންދުކޮށްގެން ތަހުގީގު ގެންދިއުމަށް ޓަކައި ތިން ދުވަހަށް ބަންދު ކުރަން ކްރިމިނަލް ކޯޓުން އިއްޔެ އަމުރުކޮށްފި އެވެ.
ފުލުހުން ބުނި ގޮތުގައި އެ ދެ މީހުނަކީ މިދިޔަ ބުރާސްފަތި ދުވަހު، ތުހުމަތު ކުރެވޭ ކުށުގެ މައްސަލައެއްގައި މައުލޫމާތު ސާފު ކުރުމަށް މާފަންނު ޕޮލިސް ސްޓޭޝަނަށް ހާޒިރު ކުރި ދެ މީހެކެވެ.
ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން، އެއީ އުމުރުން 46 އަހަރުގެ ދިވެހި ފިރިހެނަކާއި 22 އަހަރުގެ ދިވެހި ފިރިހެނެކެވެ.
އޭގައިވާ ގޮތުން ދެ މީހުން ވެގެން ވަނީ ޕާޓިޝަނުގެ އެއް ފޫޓުހާ ތަން ފަޅާލައިފަ އެވެ.
ހައްޔަރު ކުރި ދެ މީހުންގެ ތެރެއިން 22 އަހަރުގެ މީހާއަކީ ފުލުހުންގެ އަމުރަށް ނުކިޔަމަންތެރިވުމުގެ ރެކޯޑު ވެސް އޮތް މީހެއް ކަމަށް ކޯޓު އަމުރުގައި ފާހަގަކޮށްފައިވެ އެވެ.
އަދި އެ ދެ މީހުނަކީ ވެސް ކުށުގެ ރެކޯޑު އޮތް ދެ މީހުނެވެ.
