ށ. ނަލަންދޫގައި ރިސޯޓެއް ތަރައްގީކުރާނެ ބަޔަކު ހޯދަން ޓޫރިޒަމް މިނިސްޓްރީން ދެ ވަނަ ފަހަރަށް މިއަދު އިއުލާންކޮށްފި އެވެ.
ގުދުރަތީ ގޮތުން ހާއްސަ ސިފަތަކެއް ލިބިފައިވާ ނަލަންދުއަކީ ގިނަ އަހަރުތަކެއް ވަންދެން ލަނޑާ އާލާކުރާ ބަޔަކަށް ކުއްޔަށް ދޫކޮށްފައި އޮތް ރަށެކެވެ.
އެކަމަކު މި ސަރުކާރުން ވަނީ އެ ރަށް އެ މީހުންގެ އަތުން އަތުލައި، ބަދަލު ދިނުމަށް ފަހު، ޓޫރިޒަމަށް ހާއްސަކޮށްފަ އެވެ. ސަރުކާރުން މި މަސައްކަތް ފެށީ 2021 ގައި ރައީސް އިބްރާހިމް މުހައްމަދު ސޯލިހު ށ. އަތޮޅަށް ކުރެއްވި ދަތުރުފުޅުގެ ތެރެއިން އެ އަތޮޅުގެ ރަށްރަށުގެ ކައުންސިލްތަކުން ހުށަހަޅައިގެންނެވެ.
އެގޮތުން ނަލަންދޫގައި ރިސޯޓެއް ތަރައްގީކުރާނެ ބަޔަކު ހޯދަން ފުރަތަމަ އިއުލާން ކުރީ މި އަހަރުގެ އޮގަސްޓުގަ އެވެ. އޭރު މި ރަށުގެ ބީލަން ހުޅުވާލީ ހއ. މެދަފުއްޓާ އެކީގަ އެވެ. ފަހުން އެ ލިސްޓަށް އިތުރުވީ ތ. ރުއްތިބިރަށެވެ.
ޓޫރިޒަމް މިނިސްޓްރީން ކުރި އިއުލާނުގައިވާ ގޮތުގައި އަންނަ މަހުގެ ހައެއްގެ ކުރިން މިނިސްޓްރީއަށް ހާޒިރުވެ ބީލަން ހުށަހަޅަން ޖެހެ އެވެ.
ދެވަނަ ފަހަރަށް މި ރަށް ވަކިން ބީލަމަށް ލާން ޖެހުނު ސަބަބެއް ސާފެއް ނޫނެވެ.
އެކަމަކު މިފަހުން ބީލަން ހުޅުވާލި ގިނަ ރަށްރަަށަށް އިންވެސްޓަރުންގެ ފަރާތުން ލިބިފައި ވަނީ ފިނި ތަރުހީބެކެވެ. އިންވެސްޓަރުން ޝައުގުވެރިކަން ފާޅުކޮށްގެން އެވޯޑު ކުރެވުނު ރަށްތަކުގެ ތެރެއިން ވެސް މިހާތަނަށް ހަވާލުކުރެވުނީ މަދު ރަށެކެވެ.
