އިޒްރޭލުން ހިންގަމުންދާ ގަތުލުއާމު މެދުކަނޑާލާ ފަލަސްތީނަށް އިންސާނީ އެހީ ފޯރުކޮށްދިނުމުގެ މަގު ފަހިކުރުމަށް އދ. ގެ ސަލާމަތީ ކައުންސިލަށް ހުށަހެޅި ހުށަހެޅުން އެމެރިކާއިން ވީޓޯ ކޮށްފި އެވެ.
ބްރެޒިލުން ހުށަހެޅި މި ހުށަހެޅުމުގައި ބުނެފައިވަނީ، އިޒްރޭލުން އަދި ހަމާސްއިން ހަމަލާބަދަލުކުރުން ހުއްޓާލާ، ވެރިވެގަނެފައިވާ ހުޅަނގު އައްސޭރިން އަދި މިސްރު މަގުން ގާޒާއަށް އިންސާނީ އެހީ ފޯރުކޮށްދިނުމުގެ ފުރުސަތު ދޭން ޖެހޭ ކަމަށެވެ.
މިއަދުގެ ސަލާމަތީ ކައުންސިލަށް ހާޒިރު 15 މެންބަރުންގެ ތެރެއިން 12 މެންބަރަކު ބްރެޒިލްގެ ހުށަހެޅުމަށް ތާއީދުކުރިއިރު ވަކި ކޮޅަކަށް ވޯޓު ނުދޭން ދެ ގައުމަކުން ނިންމި އެވެ. ހުށަހެޅުމާ ދެކޮޅަށް ވޯޓު ދީފައިވަނީ އެމެރިކާއިން އެކަންޏެވެ. އދ. ގެ ސަލާމަތީ ކޮމިޓީއިން މައްސަލައެއް ފާސްކުރުމަށް ނުވަ ވޯޓާއި ވީޓޯ ކުރުމުގެ ބާރު ލިބޭ އެމެރިކާ، ރަޝިއާ، ޗައިނާ، ފްރާންސް އަދި އިނގިރޭސިވިލާތުގެ ތާއީދު ބޭނުންވާނެ އެވެ.
އެމެރިކާއިން އދ. އަށް ކަނޑައަޅާފައި ހުންނަ ސަފީރު ބުނި ގޮތުގައި އެ ގައުމުން މިއަދުގެ ހުށަހެޅުމަށް ވޯޓު ނުދިނީ، ލިޔުމުގައި އިޒްރޭލަށް އަމިއްލަ ނަފްސު ދިފާއު ކުރުމުގެ ބާރު އޮންނާނެ ކަމުގެ ވާހަކަ ނެތުމުން ކަމަށެވެ.
އިއްޔެވެސް އދ. ގެ ސަލާމަތީ ކައުންސިލަށް ހަމަލާތައް ބަދަލުކުރުން ހުއްޓުވުމަށް ރަޝިއާއިން ހުށަހެޅި އެވެ. ނަމަވެސް އެ ހުށަހެޅުންވެސް އެމެރިކާއިން ބޭރުކުރީ ހަމާސްގެ ހަމަލާތައް ކުށްވެރިކޮށްފާ ނުވާ ކަމަށް ބުނެ އެވެ.
މި މަހު ހަތްވަނަ ދުވަހު އިޒްރޭލުން ދޭން ފެށި ހަމަލާތަކުގެ ތިންވަނަ ދުވަހު އިޒްރޭލުން ވަނީ ގާޒާއިން ފެނާއި ކަރަންޓު ކަނޑާލާ، އެހީއާއި ކާބޯތަކެތި އެތެރެކުރެވެންހުރި ބޯޑަރުތައް ބަންދުކޮށްފަ އެވެ. ގާޒާ އާއި މިސްރާ ދެމެދު އޮންނަ ރަފާހު ބޯޑަރުގައި އެތައް ސަތޭކަ އުޅަނދެއް އެހީ ހިފައިގެން ޖަމާވެފައިވީ ނަމަވެސް އިޒްރޭލުން ވަނީ ބޯޑަރު ހުރަސްކޮށްފި ނަމަ ހަމަލާދޭނެ ކަމަށް ބުނެފަ އެވެ.
އިޒްރޭލުގެ މި އަމަލުތައް ކުށްވެރިކޮށް ދުނިޔޭގެ ގިނަ ގައުމުތަކާއި ބައިނަލްއަގުވާމީ ޖަމާއަތްތަކުން ދަނީ ގާޒާއަށް ބޭނުންވާ އިންސާނީ އެހީ ފޯރުކޮށްދިނުމުގެ ފުރުސަތު ހުޅުވާލުމަށް ގޮވާލާފަ އެވެ.
އިޒްރޭލުން ހިންގަމުން އަންނަ ގަތުލުއާންމުގައި މަރުވި މީހުންގެ އަދަދު މިހާރު ވަނީ 3،200 އަށްވުރެ މައްޗަށް އަރައިފަ އެވެ. މީގެ ތެރެއިން ދިން އެންމެ ނުރައްކާތެރި ހަމަލާގައި ރޭ އިޒްރޭލުން ވަނީ ގާޒާގެ އަލް އަހްލީ ހޮސްޕިޓަލަށް ހަމަލާދީ 500 އަށްވުރެ ގިނަ މީހުން މަރާލާފަ އެވެ. އިޒްރޭލާ ދެކޮޅަށް ހަމާސްއިން ދިން ހަމަލާތަކުގައި އިޒްރޭލުން 1،400 އަށްވުރެ ގިނަ މީހުން މަރުވެފައިވާ ކަމަށް އިޒްރޭލުން ބުނެ އެވެ.
މި ހަމަލާތައް ހުއްޓާލުމުގެ މަޝްވަރާއަށް އެމެރިކާގެ ރައީސް މިހާރު ހުންނެވީ އިޒްރޭލުގަ އެވެ. ނަމަވެސް، އެމެރިކާގެ ފަންޑިން ލިބޭ އިޒްރޭލުން ރޭ ދިން ލާއިންސާނީ ހަމަލާއަށްފަހު އުރުދުންއިން ވަނީ ބައިޑެން އެ ގައުމަށް ކުރައްވަން އޮތް ދަތުރު ކެންސަލް ކޮށްފަ އެވެ.
