ރާއްޖޭގައި ފަތުރުވެރިކަމަށް ދޫކޮށްފައިވާ ރަށްތަކުގެ ތެރެއިން 88 ރަށެއް ތަރައްގީނުކުރެވި، މަސައްކތް ހުއްޓިފައި އޮތް ކަމަށް ފިނޭންސް މިނިސްޓްރީން ބުނެފި އެވެ.
އެ މިނިސްޓްރީން އާންމުކޮށްފައިވާ "ފިސްކަލް ހިރާސްތަކުގެ ބަޔާން 2023" ގައި އާންމުކޮށްފައިވާ ތަފާސްހިސާބުތަކުގައި ވާގޮތުން ރާއްޖޭގެ ޖުމުލަ 256 ރަށެއް ވަނީ ފަތުރުވެރިކަމަށް ދޫކޮށްފަ އެވެ. އޭގެ ތެރެއިން އޮޕަރޭޓް ކުރަމުން ދަނީ 168 ރަށެެކެވެ. ބާކީ 88 ރަށް ތަރައްގީކުރުމުގެ މަސައްކަތް އެއްބަސްވުމާއި އެއްގޮތައް ކުރިއަށް ނުދާކަން ބަޔާނުގައި ވަނީ ފާހަގަކޮށްފަ އެވެ.
މަސައްކަތް ހުއްޓިފައިވާ ރަށްތަކުގެ އަދަދު އެންމެ ގިނައީ ކ. އަތޮޅުގަ އެވެ. އެ އަތޮޅުގެ 29 ރަށެއް ފަތުރުވެރިކަމުގެ ބޭނުމަށް ދޫކޮށް، އޮޕަރޭޝަނަށް ނުގެނެވި އެބަ އޮތެވެ.
ގްރެފިކްސް-- ރައްޔާން މުހައްމަދު
މިހާ ގިނަ ރަށްތަކެއް ތަރައްގީ ނުކުރެވި އޮތުމަކީ ރާއްޖޭގެ އިގުތިސާދަށް އެ ރަށްތަކުން ލިބެންޖެހޭ ނަފާ ނުލިބި، ފަތުރުވެރިކަމުގެ ސިނާއަތުން ލިބޭ އާމްދަނީ ދަށްވުމަށް މެދުވެރިވާ އެއް ސަބަބެވެ.
އެގޮތުން މިހާރު މަސައްކަތް ހުއްޓިފައިވާ 88 ރަށަށް ބަލާނަމަ، މި ރަށްތަކުން ފަތުރުވެރިކަމަށް 21،000 އެނދު އިތުރު ކުރެވޭނެ ކަމަށް ފިނޭންސް މިނިސްޓްރީން ލަފާކުރެ އެވެ. އަދި މި ރަށްތައް އޮޕަރޭޝަނަށް ގެނެވިއްޖެނަމަ، ރާއްޖޭގެ އިގުތިސާދަށް ސީދާ އަދި ނުސީދާ ގޮތުން 1.7 ބިލިއަން ޑޮލަރު ލިބޭނެ ކަމަށް އަންދާޒާކުރެ އެވެ.
އޭގެ އިތުރުން، މަސައްކަތް ހުއްޓިފައިވާ ރަށްތައް އޮޕަރޭޝަނަށް އައުމާއެކު 16،000 އަށް ވުރެ ގިނަ ވަޒީފާ އުފެދޭނެ ކަމަށް ފިސްކަލް ހިރާސްތަކުގެ ބަޔާނުގައި ބުނެފައިވެ އެވެ.
ފިނޭންސް މިނިސްޓްރީން މައުލޫމާތު ދޭ ގޮތުގައި ނުހެދި ހުރި ރަށްތައް މާކެޓަށް ނެރުމަށްޓަކައި އިންޓަނޭޝަނަލް ފައިނޭންސް ކޯޕަރޭޝަނާއި ގުޅިގެން އެ ރަށްތަކުގެ ސިޓުއޭޝަނަލް ޕްރިލިމިނަރީ އެސެސްމެންޓެއް ވަނީ ހަދާފަ އެވެ. އަދި, އެ އެސެސްމެންޓަށް ރިޔާއަތްކޮށް މަސައްކަތް ހުއްޓިފައިވާ ރަށްތައް އޮޕަރޭޝަނަށް ގެނައުމަށްޓަކައި ސަރުކާރަށް އެހީތެރިވެވޭނެ ދާއިރާތައް ކަނޑައެޅުމުގެ މަސައްކަތް އަންނަނީ ކުރަމުންނެވެ.
