ފަލަސްތީނު ހަނގުރާމާގައި އިޒްރޭލާ ހަމާސްއާ ދެމެދު ބަދަލުކުރަމުންދާ ހަމަލާތައް ހުއްޓާލުމަށް އެދި ރަޝިއާއިން އދ. ގެ ސެކިއުރިޓީ ކައުންސިލަށް ހުށަހެޅި މައްސަލަ ބޭރުކޮށްލައިފި އެވެ.
ރަޝިއާގެ އިތުރުން މި މައްސަލައަށް ތާއީދުކޮށްފައިވަނީ ޗައިނާ، ޔޫއޭއީ، ގަބޯން އަދި މޮޒަންބީކުންނެވެ. ނަމަވެސް އދ. ގެ ސަލާމަތީ ކޮމިޓީއިން މައްސަލައެއް ފާސްކުރުމަށް ނުވަ ވޯޓާއި ވީޓޯ ކުރުމުގެ ބާރު ލިބޭ އެމެރިކާ، ރަޝިއާ، ޗައިނާ، ފްރާންސް އަދި އިނގިރޭސިވިލާތުގެ ތާއީދު ބޭނުންވާނެ އެވެ.
ރަޝިއާއިން ބުނި ގޮތުގައި އެ ހަމަލާތައް ހުއްޓާލުމަށް ހުށަހެޅި މައްސަލަ ބޭރުކޮށްލަން ނިންމުމަކީ އިންސާނިއްޔަތަށް ލިބުނު ބޮޑު ގެއްލުމެއް ކަމަށެވެ.
"މިއީ ވޭތުވެދިޔަ އަހަރުތަކުގެ ތެރޭގައި ދުނިޔޭގައި ހިނގި އެންމެ ލާއިންސާނީ ހަމަލާތަކުގެ ވާހަކަ، މިއަދު މުޅި ދުނިޔެ ތިބީ މި ސަލާމަތީ ކައުންސިލުން ނިންމާނެ ގޮތަކާމެދު ކެތްމަދުވެފަ، ނަމަވެސް ހުޅަނގުގެ ގައުމުތަކުން މި ވަނީ ލޭއޮހުރުވުން ހުއްޓޭނެ ކަމަށް ދުނިޔެ ކުރި އުންމީދުތައް ފެނަށް ދުއްވާލާފަ" ރަޝިއާއިން އދ. އަށް ކަނޑައަޅާފައި ހުންނަ ސަފީރު ވިދާޅުވި އެވެ.
ރަޝިއާގެ މައްސަލައާ ދެކޮޅަށް ވޯޓުދީފައިވަނީ އެމެރިކާ، އިނގިރޭސިވިލާތް، ޖަޕާނު އަދި ފްރާންސުންނެވެ. އެމެރިކާއިން ބުނީ އެ ގައުމުން މައްސަލައާ ދެކޮޅު ހެދީ ރަޝިއާއިން ހުށަހެޅި މައްސަލާގައި ހަމާސްގެ ހަމަލާތަައް ކުށްވެރިކޮށްފައިނުވާތީ ކަމަށެވެ.
"ރަޝިއާގެ ހުށަހެޅުމުގައި ހަމާސްއިން އިޒްރޭލުގެ އާންމުންނަށް ދެމުންދާ ހަމަލާތަކުގެ އެއްވެސް ވާހަކައެއް ނެތުން އެއީ ބަލައިގަނެވޭނެ ކަމެއް ނޫން" އެމެރިކާއިން ބުންޏެވެ.
މި މަހުގެ ހަތްވަނަ ދުވަހު ފެށި ހަނގުރާމާގައި އިޒްރޭލުގެ ހަމަލާތަކުގައި ޝަހީދުވި ފަލަސްތީނު މީހުންގެ އަދަދު 2750 އަށް ވަނީ އަރާފަ އެވެ. ހަމާސްގެ ހަމަލާތަކުގައި އިޒްރޭލުން މަރާލި މީހުންގެ އަދަދު ވަނީ 1400 އަށްވުރެ މައްޗަށް އަރާފަ އެވެ.
ހަނގުރާމާގައި ފުރަތަމަ ހަމަލާދިނީ ހަމާސްއިންނެވެ. އެގޮތުން ރޮކެޓާއި އެއްގަމު އަދި ވައިގެ މަގުން ޕެރެގްލައިޑާ ބޭނުންކޮށްގެން އިޒްރޭލަށް ދިން ހަމަލާތަކާއެކު އިޒްރޭލުން ހަނގުރާމަ އިއުލާނުކޮށް ވޭތުވެދިޔަ 10 ދުވަހު ވަނީ މެދުނުކެނޑި ގާޒާއަށް ހަމަލާދީފަ އެވެ. ހަމާސްއިންވެސް ހުއްޓުމެއްނެތި ހަމަލާދެމުން އަންނައިރު، ލުބުނާނުގައި ހަރަކާތްތެރިވާ ހިޒްބުﷲ އިންވެސް ދަނީ އިޒްރޭލަށް ހަމަލާދެމުންނެވެ.
