ގާއިމް ކުރަން މަސައްކަތް ކުރައްވާނީ އެއްވެސް ކަމެއް ނުފޮރުވާ، ސާފު ސަރުކާރެއް ކަމަށާއި އެކުލަވާލާ ޓީމުގައި ވެސް ތިއްބަވާނީ ރައްޔިތުންނަށް ޖަވާބުދާރީވެވޭ ވަރުގެ މީހުން ކަމަށް ޕީޕީއެމް/ޕީއެންސީ ކޯލިޝަނުގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެ އެވެ.
ދެކުނުގެ އަތޮޅުތަކަށް އިއްޔެ ފެއްޓެވި ކެމްޕެއިންގެ ދަތުރުފުޅުގެ ތެރެއިން ރޭ ލ. ގަމުގައި ބޭއްވި ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، އޭނާ އެކުލަވާލާ ސަރުކާރުގައި ތިއްބަވާނީ، ފަސްބައި ސާފު، ހިދުމަތް ކުރެވޭ، އޭނާ އެދިވަޑައިގަންނަވާ ސްޕީޑުގައި މަސައްކަތް ކުރަން ކެރޭ ހީވާގި ތައުލީމީ ބޭފުޅުން ކަމަށެވެ.
"ކެބިނެޓަށް ނަގާ ބޭފުޅުން ވާނީ އިރާދަކުރެއްވިއްޔާ ރައްޔިތުން ފަހުރުވެރިވާ ފަދަ ބޭފުޅުންނަށޭ. ފަސްބައި ސާފު، ހިދުމަތް ކުރެވޭ، އަޅުގަނޑު އެދޭ ސްޕީޑުގައި ރެއާ ދުވާލު މަސައްކަތް ކުރަން ކެރޭ ހީވާގި ތައުލީމު ލިބިފައިވާ މީހުން އަޅުގަނޑުގެ ޓީމަށް ނަގާނީ،" އޭނާ ވިދާޅުވި އެވެ.
ކެބިނެޓުގެ އިތުރުން، ސަރުކާރުގެ ކުންފުނިތަކާއި އެހެނިހެން އިދާރާތައް ކަމަށް ވިޔަސް އެހެން ހަމަޖައްސާނީ އެފަދަ މީހުން ކަމަށް ވެސް މުއިއްޒު ވިދާޅުވި އެވެ. އަދި "ސާފު" ސަރުކާރެއް ގާއިމް ކުރައްވާނެ ކަމަށް ވިދާޅުވި އެވެ.
މުއިއްޒު ވިދާޅުވީ މަސައްކަތް ކުރައްވަމުން ގެންދަވަނީ ހިދުމަތް ކުރުމުގައި ކެރޭ، ދެފުށް ފެންނަ، ހާމަކަން ބޮޑު ސަރުކާރެއް ގާއިމްކުރަން ކަމަށެވެ. ސަރުކާރުގެ އެއްވެސް އޮފީހެއްގައި ރައްޔިތުންނަށް ފޮރުވާނެ ކަމެއް ނުބާއްވާނެ ކަމަށާއި ފޮރުވައިގެން ކަމެއް ކުރަންވެއްޖެ ނަމަ ގައުމަށް ހަމަޖެހުން ނާންނާނެ ކަމަށް ވެސް އޭނާ ވިދާޅުވި އެވެ.
"ސަރުކާރުގެ އެއްވެސް އޮފީހެއްގައި ފޮރުވާނެ ކަމެއް ނުބާއްވާނަން. ރައްޔިތުންނަށް ނޫސްވެރިންނަށް ކަމެއް ނޭނގިގެން އުޅެން ޖެހުނަކަ ނުދޭނަން. ރައްޔިތުންނަށް ފޮރުވައިގެން ކަމެއް ކުރަން ވެއްޖެއްޔާ ގައުމަކަށް ހަމަޖެހުމެއް ނާންނާނެ،" މުއިއްޒު ވިދާޅުވި އެވެ.
އޭގެ އިތުރުން، މުއިއްޒު ވިދާޅުވީ، އޭނާގެ ސަރުކާރެއްގައި ޖަވާބުދާރީވާން ނެނގޭ އެއްވެސް ކަމެއް ނުކުރާނެ ކަމަށާއި އޭނާގެ ޓީމުގައި ވެސް ތިއްބަވާނީ ޖަވާބުދާރީވެވޭ މީހުން ކަމަށެވެ.
"އަޅުގަނޑު ގާއިމް ކުރާ ސަރުކާރެއްގައި ފޮރުވާނެ އެއްކަމެއް ވެސް ނޯންނާނެ. ރައްޔިތުންނަށް ފެންނާނެ، ދެފުށް ފެންނާނެ، ޖަވާބުދާރީ ވާން ނޭނގޭ، ޖަވާބުދާރީ ނުވެވޭ އެއްކަމެއް ވެސް ނުކުރާނެ، އަޅުގަނޑު ވެސް ނުހުންނާނެ ޖަވާބުދާރީ ނުވެވޭ ކަމެއް، ކުރާނެ ކަމެއް ނޯންނާނެ،" މުއިއްޒު ވިދާޅުވި އެވެ.
"އަދި އެކުލަވާލާ ޓީމުގައި ތިއްބަވާ އެއްވެސް ބޭފުޅަކީ އެ ބޭފުޅަކު ކުރައްވާ ކަންކަމުގައި ޖަވާބުދާރީނުވެވޭ ވަރުގެ ބޭފުޅުންނަކަށް ނުވާނެ. ޗެކް އެންޑް ބެލެންސް ފުރިހަމައަށް ގާއިމްކުރާނަން،"
ދެކުނަށް ކުރައްވާ ދަތުރުފުޅުގައި މުއިއްޒު ދެން ވަޑައިގަންނަވާނީ ހުވަދު އަތޮޅާއި ފުވައްމުލަށް އަދި އައްޑުއަށެވެ.
