ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ހިއްސާވާ އިންޓަނޭޝަނަލް ޓްރެވަލް ކޮންސަލްޓަންޓްސް (އައިޓީސީ) ޕްރައިވެޓް ލިމިޓެޑަށް މިފަހުން ގާފަރު ކައިރިން ދޫކުރި ފަޅު ވިއްކުން ހުއްޓުވަން ވަގުތީ އަމުރެއް ނެރެދެވެން ނެތް ކަމަށް ސިވިލް ކޯޓުން ނިންމައިފި އެވެ.
އައިޓީސީގެ ފަޅު ވިއްކުން ހުއްޓުވަން ކޯޓަށް މައްސަލައެއް ހުށަހެޅީ އާދަމްމަނިކް ކިޔާ މީހެކެވެ. އާދަމް މަނިކާއި ޖާބިރަކީ ކުރިން ގާތް ދެ ވިޔަފާރިވެރިންނެވެ. އޭނާ ކޯޓަށް ދިޔައީ އެ ގުޅުމުގެ ތެރެއިން އެކި ފަހަރު މަތިން ޖާބިރަށާއި އައިޓީސީއަށް ދޫކުރީ 1.3 މިލިއަން ޑޮލަރު ނުލިބިގެން ކަމަށް ބުނެ އެވެ.
ވަގުތީ އަމުރާ މެދު ކޯޓުން ނިންމި ނިންމުމުގައިވާ ގޮތުގައި އައިޓީސީން މަސައްކަތް ކުރަމުން އަންނަނީ މި ފަޅު ޑާރްގްލޯބަލް މޯލްޑިވްސް ޕްރައިވެޓް ލިމިޓެޑް ކިޔާ ކުންފުންޏަކަށް ވިއްކާލުމަށެވެ. ނަމަވެސް އޭނާއަށް ދައްކަން ޖެހޭ ފައިސާ ނުލިބި ވަނިކޮށް އެ މުއާމަލާތް އެގޮތަށް ނުހިންގޭނެ ކަމަށް ބުނެ އާދަމްމަނިކު ވަނީ އެކަން ހުއްޓުވަން ޓޫރިޒަމް މިނިސްޓްރީގެ މައްޗަށް އަމުރުކޮށްދިނުމަށް އެދިފަ އެވެ.
އުސޫލެއްގެ ގޮތުން ޓޫރިޒަމްގެ ބޭނުންތަކަށް ދޫކޮށްފައިވާ ރަށްތަކާއި ފަޅުތަކުގެ ހައްގުތައް އެހެން ފަރާތްތަކަށް ބަދަލު ކުރެވެނީ ދަރަންޏެއް ނުވަތަ މައްސަލައެއް ވޭތޯ ބެލުމަށް ފަހުގަ އެވެ. މިފަދަ މައްސަލައެއް އޮތް ނަމަ ހައްގުތައް ބަދަލުކުރެވޭނީ އެ މައްސަލަތައް ހައްލުކުރުމުންނެވެ.
މި މައްސަލައިގައި ދައުލަތުން ކޯޓުގައި ބުނީ މިނިސްޓްރީގެ ޒިންމާއަކީ ވިއްކާލާ ފަޅު ނުވަތަ ބިމާ ގުޅޭ ސީދާ ދަރަންޏެއް ވޭތޯ ބެލުމެވެ. އެ ރަށް ނުވަތަ ބިމާ ސީދާ ގުޅުމެއް ނެތް ކަމެއްގައި މިނިސްޓްރީން ބަލަން ނުޖެހޭނެ ކަމަށް ވެސް ދައުލަތުން ކޯޓުގައި ފާހަގަކުރި އެވެ. އަދި މި މައްސަލައިގައި ހިމެނޭ، ފަޅު ވިއްކާލުމުގެ ހުއްދަ ދިނީ ރަނގަޅަށް ކަމަށް ވެސް ބުންޏެވެ.
ކޯޓުން ވެސް މި މައްސަލައިގައި ބުރަވީ މި ނުކުތާގެ މައްޗަށެވެ. އެގޮތުން އާދަމްމަނިކު ހުށަހަޅައިގެން އުޅޭ ދަރަނި މައްސަލައިގެ އެއްވެސް ހިސާބެއްގައި އައިސީޓީގެ ނަން ނެތުމުން މިއީ އައިސީޓީން ޒިންމާވާން ޖެހޭނެ ދަރަންޏެއް ކަމަށް ނުބެލޭނެ ކަމަށް ކޯޓުގެ ނިންމުމުގައި ވެ އެވެ.
މި ފަޅަކީ އއ. މަތިވެރީފިނޮޅުގެ ބަދަލުގައި ސަރުކާރުން އައިޓީސީއަށް ދިން ފަޅެކެވެ. މަތިވެރީފިނޮޅު އަތުލުމަށް ފަހު ސަރުކާރުން ވަނީ އެ ރަށް މަތިވެރީގެ އިހުތިސާސްގެ ތެރޭގައި ހިމަނާފަ އެވެ.
