ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ކެމްޕޭނު ދަތުރުތައް މިއަދު ފަށައިފި އެވެ. ނަމަވެސް އޭނާގެ ޝެޑިއުލްގައި ރާއްޖޭގެ ހުރިހާ ރަށެއް ނެތެވެ.
ޕީޕީއެމްގެ ސެކްރެޓަރީ ޖެނެރަލް އަދި މުއިއްޒުގެ ތަރުޖަމާނު މުހައްމަދު ތޮލާލު "އަދަދު" ނޫހަށް ވިދާޅުވީ ކެމްޕޭނު ދަތުރުތައް ފަށަނީ ހދ. އަތޮޅުން ކަމަށެވެ.
"މިއަދު ހެނދުނު ހަނިމާދޫ އަށް ވަޑައިގަންނަވާނެ. މިއަދު ވަޑައިގަންނަވާނީ އެ އަތޮޅުގެ ތިން ރަށަކަށް. ކޮންމެ ރަށެއްގައި ވެސް ރައްޔިތުންނާ ބައްދަލުކޮށް ރައްޔިތުންގެ ހިޔާލު ހޯއްދަވައި، އެ ރަށަށަށް [މުއިއްޒުގެ ވެރިކަމެއްގައި] ކޮށްދެއްވާނެ ކަންކަން ހިއްސާ ކުރައްވާނެ،" ތޮލާލު ވިދާޅުވި އެވެ.
މިއަދު ވަޑައިގަންނަވާ ރަށްތައް
- ހަނިމާދޫ
- ނޮޅިވަރަމް
- ކުޅުދުއްފުށި
މިރޭ ކުޅުދުއްފުށީގައި ބޮޑު ޖަލްސާއެއް ބާއްވާނެ އެވެ.
ޕީއެންސީގެ ކެންޑިޑޭޓު ޑރ. މުއިއްޒުގެ ފުރަތަމަ ކެމްޕޭނު ދަތުރުގައި ރަނިންމޭޓު ހުސައިން މުހައްމަދު ލަތީފުގެ އޮތުރުން ޕީޕީއެމް/ޕީއެންސީ ކޯލިޝަންގެ އިސް ވެރިން ބައިވެރިވެވަޑައިގަންނަވާ. -- ފޮޓޯ: ޕީޕީއެމް
މުއިއްޒުގެ ކެމްޕޭނު ދަތުރުގައި ރަނިންމޭޓު ހުސައިން މުހައްމަދު ލަތީފު އާއި ޕީއެންސީގެ ރައީސް އަބްދުއްރަހީމް އަބްދުﷲ ގެ އިތުރުން ޕީޕީއެމް/ޕީއެންސީ ކޯލިޝަންގެ އިސް ބޭފުޅުން ބައިވެރިވެވަޑައިގަންނަވަ އެވެ.
ތިން ދުވަހުގެ ކެމްޕޭނު ދަތުރުގައި ހއ. އަދި ހދ. އަތޮޅުގެ ޖުމުލަ 11 ރަށަކަށް މުއިއްޒު ވަޑައިގަތުމަށް ވަނީ ނިންމަވާފަ އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް 27 ދުވަހަށް ވެފައިވާއިރު، ހުރިހާ ރަށަކަށް މުއިއްޒު ވަޑައެއް ނުގަންނަވާނެ އެވެ.
"މި އޮތް ދުވަސްކޮޅުގެ ތެރޭގައި އަޅުގަނޑުމެން މަސައްކަތް މި ކުރަނީ ވީހާ ވެސް ގިނަ ރަށަކަށް ކެންޑިޑޭޓު ވަޑައިގަތުމަށް. ކެންޑިޑޭޓަށް ވަޑައިނުގެންނެވޭ ރަށްރަށަށް ރަނިންމޭޓު ވަޑައިގަންނަވާނެ. އެ ދެބޭފުޅުންނަށް ވަޑައިނުގެންނެވޭ ރަށްތަކަށް ލީޑަޝިޕްގެ ބޭފުޅުން ވަޑައިގަންނަވާނެ،" ތޮލާލު ވިދާޅުވި އެވެ.
މުއިއްޒުގެ ދަތުރުތައް ހއ. އަދި ހދ. އަތޮޅަށް ފެއްޓެވިއިރު އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު މިއަދު ވަޑައިގަންނަވާނީ ނ. އަތޮޅަށެވެ.
titledesc
