ރަށްތަކާއި ސިޓީ ކައުންސިލުތަކުގެ އިހުތިސާސުން ބިންތަކާއި ތަންތަން މައި ސަރުކާރުން ބޭނުން އިރެއްގައި ވަކިކޮށް، އެ ތަންތަން ސަރުކާރަށް ނެގޭ ގޮތަށް ގާނޫނަށް ގެންނަން ހުށަހެޅި އިސްލާހު އަނބުރާ ގެންދަން ޕީއެންސީގެ މެޖޯރިޓީ އޮތް ބ. ގޮއިދޫ ކައުންސިލުން އިއްޔެ ގޮވާލައިފި އެވެ.
ބިން އަތުލެވޭ އިސްލާހު އަނބުރާ ގެންދަން ގޮވާލައި ގޮއިދޫ ކައުންސިލުން ނެރުނު ގަރާރުގައި ޕީއެންސީއަށް ނިސްބަތްވާ ގޮއިދޫ ކައުންސިލްގެ ރައީސް އިބްރާހިމް ޝާނީޒް އާއި ޕީއެންސީއަށް ނިސްބަތްވާ ކައުންސިލްގެ ނައިބުރައީސް ރިޒްވާނާ އަބޫބަކުރު އަދި އެމްޑީޕީއަށް ނިސްބަތްވާާ ކައުންސިލްގެ މެންބަރު މުހައްމަދު ނާފިޒު ސޮއިކުރެއްވި އެވެ.
ގޮއިދޫ ކައުންސިލުން ބުނީ ލާމަރުކަޒީ ގާނޫނަށް ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހަޅުއްވާފައިވާ އިސްލާހުތަކަކީ ގާނޫނުއަސާސީގެ ރައްޔިތުންގެ ބާރާއި، ލާމަރުކަޒީ އުސޫލުން ދިވެހިރާއްޖޭގެ އިދާރީ ދާއިރާތައް ހިންގުމުގެ މަގްސަދާއި ބޭނުމާއި، ރާއްޖެ ހޯދާފައިވާ ޑިމޮކްރެޓިކް ހުރިހާ ކުރިއެރުންތަކަކާ ކަނޑއެޅިގެން ހިލާފު އިސްލާހުތަކެއް ކަމަށެވެ.
މި އިސްލާހުތައް މަޖިލީހުން ފާސްވެއްޖެނަމަ، ރަށްރަށުގެ އިހްތިސާސް ތެރެއިން ބޭނުން ތަނެއް، ބޭނުން އިރަކު، ބޭނުން ގޮތަކަށް، މާލޭގައި ތިއްބަވާ މަރުކަޒީ ވެރިންނަށް އަތުލައިގަނެވުމުގެ ޖާގަ ފަހިވާކަން ފާހަގަކޮށް ގޮއިދޫ ކައުންސިލުން ބުނީ އެ ހިސާބުން ރައްޔިތުން އަތުން އިހްތިސާސްގެ މިލްކުވެރިކަން ބީވެދިޔައީ ކަމަށެވެ.
"މި ބިލުގައިވާގޮތުން މިއިންކަމަކާ ދެކޮޅަށް ރައްޔިތުންގެ ފަރާތުން ބަހެއް ބުނެ ދެކޮޅު ހެދުމަކީވެސް، ކުށްވެރިވާ މަނާ ކަމަކަށް ބަދަލުވީ. ރައްޔިތުން އިންތިހާބުކުރާ މަންދޫބުންނަށް ފިޔަވަޅު އަޅައި ސަސްޕެންޑުކޮށް ވަކިކުރުމުގެ ބާރުވެސް މަރުކަޒީ އިދާރާތަކަށް މާސާފުކޮށް ލިބިދެވުނީ. މިއީ ސީދާކޮށް ލާމަރުކަޒީ ނިޒާމު ރޫޅާލައި، ރައްޔިތުންގެ ރަށުބާރުވެރިކަން އުވާލުމުގެ އިސްލާހެއް،" ކައުންސިލުން ބުންޏެވެ.
ގޮއިދޫ ކައުންސިލުގެ އިތުރުން ބ. ފެހެންދޫ އަދި ބ. ތުޅާދޫ ކައުންސިލުންވެސް ވަނީ މި އިސްލާހު ބޭރުކުރަން ގޮވާލައި ގަރާރެއް ނެރެފަ އެވެ.
އެ ބިލުގައި ބުނެފައިވާ ގޮތުގައި ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
މިފަދަ ބިލެއް މަޖިލީހަށް ހުށަހަޅާފައި މިވަނީ ސަރުކާރުން ބޭނުންވާ ބިންތައް ދިނުމަށް ބައެއް ކައުންސިލްތަކުން ދެކޮޅު ހަދަމުންދާ ދަނޑިވަޅެއްގަ އެވެ.
