އެމްޑަބްލިއުއެސްސީ ދިވެހި ޕްރިމިއާ ލީގުގައި މިރޭ މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކްލަބް އީގަލްސް އިން ކުޅެން ހަމަޖެހިފައި އޮތް މެޗު އެ ކްލަބުން އެދުނު ގޮތަށް ފަސްކޮށްދޭން އެފްއޭއެމް އިން ނިންމައިފި އެވެ.
އޭއެފްސީ ޕްރިލިމިނަރީ ބުރުގައި މި މަހު 16 ވަނަ ދުވަހު ބަންގްލަދޭޝްގެ ޑާކާ އަބަހާނީއާ ދެކޮޅަށް އީގަލްސް އިން ކުޅެން އޮތް މެޗަށް އެ ޓީމުން ދިގު ދަތުރެއް ކުރަން ޖެހޭތީ އާއި އެ މެޗަށް ތައްޔާރުވާން ވަގުުތު ބޭނުންވާތީ، މިރޭ ލީގުގައި މާޒިޔާއާ ކުޅެން އޮތް މެޗު ފަސްކޮށްދޭން އީގަލްސް އިން ވަނީ ހުށަހަޅައިފަ އެވެ.
އެފްއޭއެމް އިން މިއަދު ބުނީ މިރޭގެ މެޗު ފަސްކުރަން ނިންމާފައިވާ ކަމަށާއި އެ މެޗު ދެން ތާވަލުކުރެވޭނެ ތާރީހެއް ފަހުން އަންގާނެ ކަމަށެވެ.
ލީގުގެ ފުރަތަމަ ބުރުގެ ފަހު މެޗުގައި މާޒިޔާ އިން ނުކުތީ އީގަލްސްއާ ދެކޮޅަށެވެ. އެ މެޗު ނިމުނީ 2-2 އިން އެއްވަރުވެގެންނެވެ.
މިއީ ކްލަބް އީގަލްސް އިން އޭއެފްސީ ކަޕްގެ ކޮލިފައިންގައި ވާދަކުރާ ދެ ވަނަ ފަހަރެވެ. އެ ޓީމުން އެންމެ ފަހުން ކޮލިފައިންގައި ވާދަކުރި ފަަހަރު ޕްލޭއޮފްގައި ބަލިވީ ބެންގަލޫރު އަތުންނެވެ. އެ ގޮތުން، 2021 ގައި އީގަލްސް އިން ޓީމުން ޕްރިލިމިނަރީ ފުރަތަމަ ބުރުގައި މާލޭގައި ބޫޓާންގެ ތިމްޕޫ ސިޓީ އަތުން މޮޅުވި އެވެ. ޕްރިލިމިނަރީ ދެ ވަނަ ބުރުގައި އީގަލްސް އިން ކުޅެން ޖެހުނީ ބަންގްލަދޭޝްގެ އަބަހާނީއާ އެވެ. އެ ފަހަރު، އަބަހާނީ އަށް އެ ގައުމުގައި މެޗު ކުޅެވޭގޮތް ނުވެ، ދަތުރުކުރުމުގައި ވެސް ދަތިވެފައިވާތީވެ، އެ މެޗު އީގަލްސް އަށް ލިބި ޕްލޭއޮފަށް ދަތުރުކުރީ އެެވެ.
ޕްލޭއޮފް ބުރުގައި 2021 ވަނަ އަހަރުގެ މެއި މަހު މާލޭގައި ކުޅެން އޮތް މެޗަށް އައިސް އިންޑިއާގެ ބެންގަލޫރުން ކޮވިޑް ޕްރޮޓޮކޯލާ ހިލާފުވުމުން، އޭއެފްސީން އެ ވަގުތު ވަނީ މެޗު ފަސްކޮށްފަ އެެވެ. ފަހުން އޮގަސްޓް މަހު އެ މެޗު އަލުން ކުޅުނުއިރު، އީގަލްސް ވަނީ ބެންގަލޫރު އަތުން ބަލިވެފަ އެވެ.
އަބަހާނީ ބަލިކޮށްގެން، މި ފަހަރުގެ ޕްލޭއޮފް ބުރަށް އީގަލްސް ދަތުރުކޮށްފިނަމަ އެ ބުރުގައި ކުޅެން ޖެހޭނީ އިންޑިއާގެ މޯހަން ބަގާން އާއި ނޭޕާލުގެ މަޗިންދުރަ އެފްސީ ކުޅެގެން މޮޅުވާ ޓީމަކާ އެވެ. ޕްލޭއޮފުން މޮޅުވާ ޓީމަކަށް އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕުން ފުރުސަތު ލިބޭނެ އެވެ. އެ ގްރޫޕްގައި މި ވަގުތު ރާއްޖޭގެ ޗެމްޕިއަން މާޒިޔާ އެބައޮތެވެ.
