އިސްލާމްއާބާދް، ޕާކިސްތާން (އޯގަސްޓް 5) - ކޮރަޕްޝަންގެ ކުށް ސާބިތުވެ، ޕާކިސްތާނުގެ ކުރީގެ ބޮޑު ވަޒީރު އިމްރާން ހާންގެ މައްޗަށް ތިން އަހަރުގެ ޖަލު ހުކުމެއް އިއްވައިފި އެވެ.
ލާހޯރްގައި ގެކޮޅުގައި ހުންނަވަނިކޮށް، ފުލުހުން އައިސް އިމްރާން ހައްޔަރުކޮށްގެން ވަނީ ޖަލަށް ގެންގޮސްފަ އެވެ. އެއާ އެކު ގައުމުގެ އެކި ހިސާބުތަކުގައި ކުދި އެއްވުންތައް ބޭއްވި އެވެ.
ޕާކިސްތާނުގައި ޖިނާއީ ކުށެއް ސާބިތުވެއްޖެ ނަމަ އެއްވެސް އިންތިހާބެއްގައި ވާދަނުކުރެވޭނެ އެވެ. ކުރިއަށް އޮތް ދެ ހަފުތާ ތެރޭގައި ޕާލަމެންޓް އުވާލައި، ނޮވެމްބަރުގެ ކުރިން އިންތިހާބެއް ބާއްވާނެ ކަމަށް ބެލެވެ އެވެ.
ކޯޓުން ކުރި ހުކުމުގައި ބުނީ ބޮޑު ވަޒީރުގެ މަގާމުގައި ހުންނަވަނިކޮށް ލިބުނު ހަދިޔާތަކާ ގުޅޭ ސާފު މައުލޫމާތު ހާމަކުރުމުގައި ފެއިލްވެފައި ވާތީ އެއްވެސް ޝައްކެއް ނެތް މިންވަރަށް އިމްރާން ހާންގެ ހީލަތްތެރިކަން ޔަގީންވާ ކަމަށެވެ.
ހަމަ އެ މައްސަލައިގައި މިދިޔަ މޭ މަހު އިމްރާން ހާން ހައްޔަރު ކުރުމުން ޕާކިސްތާނުގެ މަޝްރަހު ހޫނުވެ، ބޮޑެތި މުޒާހަރާތައް ކުރި އެވެ.
އޭގެ ފަހުން ދޫކޮށްލުމާ އެކު އެމަނިކުފާނުގެ ޕާޓީއާ ދެކޮޅަށް ބޮޑު އޮޕަރޭޝަނެއް ފެށި އެވެ. އެތައް ހާސް ބަޔަކު ހައްޔަރުކޮށް، ނޫސްތަކުން ވެސް އިމްރާން ހާންގެ ވާހަކަތައް ގެނައުން މަނާކުރި އެވެ.
އެހެން ނަމަވެސް، އެމަނިކުފާނަކީ އަދިވެސް ޕާކިސްތާނުގެ އެންމެ މަގްބޫލު އެއް ލީޑަރެވެ. އެގޮތުން މިދިޔަ މަހު ޓިކްޓިކް ޗެނަލަށް ދޫކޮށްލެއްވި ފުރަތަމަ ވީޑިއޯ 135 މިލިއަން މީހުން ބަލައި، 36 ގަޑިއިރުގެ ތެރޭގައި 4.5 މިލިއަން ލައިކްސް ލިބުނެވެ.
ހޮނިހިރު ދުވަހު ހުކުމް އިއްވައި، އަލުން ހައްޔަރު ކުރުމާ އެކު، ރިކޯޑުކޮށްފަައިވާ މެސެޖެއް އެކްސް އެކައުންޓެއްގައި އާއްމުކުރި އެވެ. އެ މެސެޖުގައި ގޮވާލެއްވީ ސަޕޯޓަރުން މަގުތަކަށް ނިކުތުމަށެވެ.
އުމުރުން 70 އަހަރުގެ އިމްރާން ވިދާޅުވަނީ ހުރިހާ ދައުވާތަކެއް ވެސް އުފުލީ ސިޔާސީ ބޭނުމަށް ކަމަށެވެ. އެމަނިކުފާނު މަގާމުން ދުރުކުރީ މިދިޔަ އަހަަރު ޕާލަމެންޓުން ނެގި އިތުބާރު ނެތްކަމުގެ ވޯޓަކުންނެވެ.
