އެމެރިކާގެ ޕޯސްޓަލް ސާވިސްއަށް 126 މިލިއަން ޑޮލަރުގެ ގެއްލުން ދިން، ވަގު ސްޓޭމްޕް ވިއްކުމުގެ ބޮޑު ނެޓްވޯކެއް ހިންގި ކަމުގެ ތުހުމަތުގައި ޕާކިސްތާނުގެ ސައިބާ ކްރައިމް އެޖެންސީން މީހަކު ހައްޔަރުކޮށްފި އެވެ.
ފަހީމް އަކްރަމް ނަމަކަށް ކިޔާ މި މީހާގެ މައްޗަށް ތުހުމަތު ކުރެވެނީ 2023 ވަނަ އަހަރުން ފެށިގެން، އޮޅުވާލައިގެން ހިންގާ ވެބްސައިޓެއް މެދުވެރިކޮށް އެމެރިކާގައި ސައްހަ ނޫން ސްޓޭމްޕްތަކެއް ވިއްކާފައިވާ ކަމަށެވެ.
ވޭތުވެދިޔަ އަހަރުތަކުގެ ތެރޭގައި އެމެރިކާގެ އެތައް ހާސް ކަސްޓަމަރުންނަކަށް ފަސް މިލިއަނަށް ވުރެ ގިނަ ވަގު ޝިޕިން ލޭބަލް ވިއްކި މައްސަލައިގައި، ފްލޮރިޑާގެ ފެޑަރަލް ގްރޭންޑް ޖޫރީއަކުން މިދިޔަ މަހު އޭނާގެ މައްޗަށް ވަނީ ދައުވާ އުފުލާފަ އެވެ. ކަމާބެހޭ އިދާރާތަކުން މިހާރު ވަނީ އޭނާ ހިންގި ވެބްސައިޓް ބަންދުކޮށްފަ އެވެ.
މި މަހުގެ ކުރީކޮޅު، އެމެރިކާގެ ޕޯސްޓަލް އިންސްޕެކްޝަން ސާވިސްއިން ވަނީ އޭނާ ހައްޔަރުކުރުމަށް އެހީތެރިވެދޭނެ މައުލޫމާތެއް ފޯރުކޮށްދޭ ފަރާތަކަށް 100،000 ޑޮލަރާ ހަމައަށް އިނާމެއް ދޭނެ ކަމަށް އިއުލާންކޮށްފަ އެވެ.
އެމެރިކާގެ ސަަދަން ޑިސްޓްރިކްޓް އޮފް ފްލޮރިޑާގެ އެޓާނީ އޮފީހުން ބުނި ގޮތުގައި، ޕާކިސްތާނުގެ ޚާނޭވާލަށް ނިސްބަތްވާ އުމުރުން 33 އަހަރުގެ މި މީހާ ހިންގަމުން ދިޔައީ 'ލޭބަލްސްބޭންކް ޑޮޓް ކޮމް' ނަމަކަށް ކިޔާ ވެބްސައިޓެކެވެ.
