ޕާކިސްތާނުގައި ދިރިއުޅޭ ދިވެހިންނާ ރައީސް މުހައްމަދު މުއިއްޒު ބައްދަލުކުރައްވާ ގޮތަށް ހަމަޖެއްސުމަށްފަހު، އެންމެ ފަހުވަގުތު އެ ހަފްލާ ކެންސަލްކުރުމުން ބައެއް ދިވެހިން ނުރުހުން ފާޅުކޮށްފި އެވެ.
ޕާކިސްތާނުގައި ދިރިއުޅޭ 20 ދިވެއްސަކު ސޯޝަލް މީޑިއާގައި ނެރުނު ކުރު ބަޔާނެއްގައި ބުނީ މުއިއްޒު ކުރެއްވި ދަތުރުގައި ދިވެހިންނާ ބައްދަލުކުރެއްވުމަކީ އެންމެ އިސްކަން ދޭނެ ކަމަށް ނުވިޔަސް، އެ ބައްދަލުވުމަކީ ދެ ހަފްތާ ކުރިން އޮންނާނެ ކަމަށް ބުނެ ދައުވަތު ދިން ބައްދަލުވުމަކަށްވާތީ ތައްޔާރުވި ކަމަށެވެ.
ނަމަވެސް އެ ބައްދަލުވުން އޮންނާނެކަމުގެ ޔަގީންކަން އެކިފަހަރު މަތިން ދިނުމަށްފަހު ބައްދަލުވުން ނޯންނާނެ ކަމަށް އެންގުމުން އެކަމާ ވަރަށް ބޮޑަށް މާޔޫސްވި ކަމަށް އެ ދިވެހިން ބުންޏެވެ.
މީގެއިތުރުން މުއިއްޒުގެ އަނބިކަނބަލުން ސާޖިދާ މުހައްމަދަށް ޕާކިސްތާނުގެ ފެޝަން އެންޑް ލައިފްސްޓައިލް މެގަޒިންއަށް އެކްސްކްލޫސިވް އިންޓަވިއުއެއް ދެއްވަން ވަގުތު ލިބިވަޑައިގެންއިރު، ދިވެހި ރައްޔިތުންނާ ބައްދަލުކުރައްވަން ވަގުތު ލިބިވަޑައިނުގަތުމުންވެސް އެ ދިވެހިން ނުރުހުން ފާޅުކުރި އެވެ.
ޕާކިސްތާނުގައި ކިޔަވާ ދިވެހި ދަރިވަރަކު ބުނީ ބައްދަލުވުން ބާއްވާނެކަމުގެ ޔަގީންކަން ޕާކިސްތާނުގައި ހުންނަ ދިވެހި ހައި ކޮމިޝަނުން ދިނުމަށްފަހު، އެއްވެސް ހަބަރެއްވެސް ނުވެ ދިޔަ ކަމަށެވެ. ވީ ގޮތެއްވެސް ސާފުކޮށްނުދީ ދަރިވަރުންނާމެދު ކަންތައް ކުރި ގޮތުން އެ ދަރިވަރު ވަނީ ހިތްހަމަނުޖެހުން ފާޅުކޮށްފަ އެވެ.
މީގެކުރިން މުއިއްޒު ބޭރުގެ ގައުމުތަކަށް ކުރައްވާ ރަސްމީ ދަތުރުގެ ތެރެއިން ދިވެހިންނާ ބައްދަލުކުރައްވަ އެވެ. ނަމަވެސް ޕާކިސްތާނުގައި ދިރިއުޅޭ ދިވެހިންނާ އެމަނިކުފާނު ބައްދަލުނުކުރައްވަން ފަހުވަގުތު ނިންމެވި ސަބަބެއް ނޭނގެ އެވެ.
މިކަމާ ގުޅޭގޮތުން ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) އަށް މެސެޖުކުރުމުން ޖަވާބެއް ނުދެއްވަ އެވެ.
މުއިއްޒުގެ ދެކަނބަލުން ޕާކިސްތާނަށް ކުރެއްވި ތިން ދުވަހުގެ ދަތުރަށްފަހު އެނބުރި ރާއްޖެ ވަޑައިގަތީ މިއަދު އެވެ. އެމަނިކުފާނު ޕާކިސްތާނަށް ކުރެއްވި ދަތުރުގައި އެ ގައުމާއި ރާއްޖެއާ ދެމެދު 20 އެމްއޯޔޫއެއްގައި ވަނީ ސޮއިކޮށްފަ އެވެ. އޭގެއިތުރުން އެ ދަތުރުގެ ތެރެއިން ރާއްޖެ-ޕާކިސްތާން އިންވެސްޓްމަންޓް ފޯރަމެއްވެސް ވަނީ ބާއްވާފަ އެވެ.
