ޕާކިސްތާނުގެ ޕެޝާވަރު ސިޓީގައި ހުންނަ ސްކޫލެއްގެ ފުރާޅު ވެއްޓި، ކްލާސްތަކުގައި ކިޔަވަން ތިބި 27 ދަރިވަރުންނާއި މުދައްރިސަކު މަރުވެއްޖެ އެވެ.
މަރުވި ކުދިންގެ ތެރޭގައި ގިނައީ އުމުރުން 13 އަހަރުން ދަށުގެ ކުދިން ކަމަށާއި، މި ހާދިސާގައި މަރުވި މީހުންގެ އަދަދު އިތުރުވުން އެކަށީގެންވާ ކަމަށް އޮފިޝަލުން ވިދާޅުވެ އެވެ.
ލޭޑީ ރީޑިން ހޮސްޕިޓަލުގެ ތަރުޖަމާނު މުހައްމަދު އާސިމް ވިދާޅުވީ، އެ ހޮސްޕިޓަލަށް ގެނައި އިރު ވެސް ގިނަ ކުދިން މަރުވެފައިވާ ކަމަށެވެ. މީގެ އިތުރުން މި ހާދިސާގައި ޒަޚަމްވި 20 މީހަކަށް އެ ހޮސްޕިޓަލުގައި ފަރުވާދެމުންދާ ކަމަށް ވެސް އޭނާ ވިދާޅުވި އެވެ.
ޕާކިސްތާނުގެ އުތުރުގެ ސިޓީއެއް ކަމަށްވާ ޕެޝާވަރުގެ ދީރު ކޮލޮނީގައި ހުންނަ އަމިއްލަ ސްކޫލެއް ކަމަށްވާ "އަލް ޚައިރު އެޑިއުކޭޝަން ސެންޓަރު" ގައި ހިނގި މި ހާދިސާގައި މަރުވި މީހުންގެ ހަށިގަނޑުތަކާއި ޒަޚަމްވި މީހުން ހޮސްޕިޓަލަށް ގެންދިއުމުގެ މަސައްކަތް ރެސްކިއު ޓީމުތަކުން ކުރަމުންދާ ކަމަށް ސަރުކާރުގެ އޮފިޝަލް ބިލާލް ފައިޒީ ވިދާޅުވި އެވެ.
ރެސްކިއު އޮފިޝަލަކު މައުލޫމާތު ދެއްވި ގޮތުގައި، މި ހާދިސާ ހިނގީ އިމާރާތުގެ މަތީ ފްލޯއެއްގެ ފުރާޅު ފުރަތަމަ ފްލޯގެ ފުރާޅުމައްޗަށް ވެއްޓި، އެ ފުރާޅު ކްލާސްތަކުގައި ކިޔަވަން ތިބި ދަރިވަރުންގެ ގަޔަށް ވެއްޓުމުގެ ސަބަބުންނެވެ.
ޑިސްޓްރިކްޓް އިމަޖެންސީ އޮފިސަރު އިފްތިޚާރު ޚާން ވިދާޅުވީ، އިމާރާތުގެ ބައިތަކުގެ ދަށުން މިހާތަނަށް މަދުވެގެން 45 ކުދިން ނެރެވިފައިވާ ކަމަށެވެ.
އަދިވެސް އިތުރު ކުދިން އިމާރާތުގެ ބައިތަކުގެ ދަށުގައި ތާށިވެފައި ތިބި ކަމުގެ ރިޕޯޓުތައް ލިބެމުންދާ ކަމަށް ވެސް އޭނާ ވިދާޅުވި އެވެ.
