ނިމުނު ކުއާޓާގައި ހޯލްސޭލް އަދި ރީޓެއިލް އާއި ކޮންސްޓްރަކްޝަން ދާއިރާގެ ވިޔަފާރި ކުރާ މިންވަރު އިތުރުވިއިރު، ޓޫރިޒަމާއި ދަތުރުފަތުރު އަދި މުވާސަލާތީ ދާއިރާގެ ވިޔަފާރިތައް ކުރިއަރަމުންދާ މިންވަރު މަޑުޖެހިފައިވާ ކަމަށް އެމްއެމްއޭއިން މިއަދު އާންމުކުރި މި އަހަރުގެ ދެ ވަނަ ކުއާޓަލީ ބިޒްނަސް ރިޕޯޓުން ދައްކައިފި އެވެ.
އެމްއެމްއޭގެ ރިޕޯޓުން ދައްކާ ގޮތުގައި މިދިޔަ ކުއާޓަރުގައި އެންމެ ބޮޑަށް އަސަރުކުރީ ޓޫރިޒަމް ދާއިރާގެ ވިޔަފާރިތަކަށެވެ. އެ ދާއިރާގެ 91 ޕަސެންޓު ވިޔަފާރިތަކުން ބުނީ އާމްދަނީ އާއި ރޫމް ރޭޓު ދަށްވެފައިވާ ކަމަށެވެ. އެއާ ގުޅިގެން މަސައްކަތް ކުރާ މުވައްޒަފުންގެ އަދަދު ވެސް މަދުވެފައިވާ ކަމަށް ޓޫރިޒަމް ވިޔަފާރިތަކުން ރިޕޯޓު ކުރި އެވެ.
ރިޕޯޓަށް ބަލާއިރު، ފަތުރުވެރިކަމުގެ ދާއިރާ ނޫން ދާއިރާތަކުގައި މަސައްކަތް ކުރަމުންދާ މުވައްޒަފުންގެ އަދަދު ވަނީ ގިނަވެފަ އެވެ. މުވައްޒަފުންގެ އަދަދު އެންމެ ބޮޑަށް އިތުރުވެފައި ވަނީ ނިމުނު ކުއާޓާގައި އެންމެ އާމްދަނީ ރަނގަޅު ހޯލްސޭލް އަދި ރީޓެއިލް ވިޔަފާރީގެ ދާއިރާގައި ހިމެނޭ ވިޔަފާރިތަކެވެ.
ހޯލްސޭލް އަދި ރީޓެއިލް ދާއިރާގެ ވިޔަފާރިތަކަށް ލިބުނު އެންމެ ބޮޑު ފަސޭހައަކީ ވިޔަފާރި ހިންގުމަށް ގަންނަ ތަކެތީގެ އަގުތައް ދަށަށް ދިޔުމެވެ. މި ދާއިރާގެ 90 ޕަސެންޓަށް ވުރެ ގިނަ ވިޔަފާރިތަކުން ރިޕޯޓުކުރީ ހަރަދުތައް ދަށްވެ، އެ ވިޔަފާރިތަކުން ފޯރުކޮށްދޭ ހިދުމަތުގެ އަގުތައް ވެސް ވަރަށް ބޮޑަށް ދަށަށް ގޮސްފައިވާ ކަމަށެވެ.
ވިޔަފާރި ހިންގުމަށް ގަންނަ ތަކެތީގެ އަގު ދަށަށް ދިޔަ އަނެއް ދާއިރާއަކީ ޓޫރިޒަމެވެ. އެއާ ހިލާފަށް ހިލާފަށް ކޮންސްޓްރަކްޝަން ވިޔަފާރިތަކާއި ދަތުރުފަތުރާއި މުވާސަލާތީ ހިދުމަތުގެ ދާއިރާގެ ވިޔަފާރިތަކުން ރިޕޯޓުކުރީ އަގުތައް ދަށް ނުވާ ކަމަށެވެ. އެކަމަކު އެ ވިޔަފާރި ހިންގުމަށް ގަންނަ ތަކެތީގެ އަގު އުފުލެމުންދާ މިންވަރު ވަނީ މަޑުޖެހިފައެވެ.
ދެ ވަނަ ކުއާޓާގައި ބައެއް ދާއިރާތަކުގެ ވިޔަފާރި މަޑުޖެހުނު ނަމަވެސް ކުރިއަށް އޮތް ކުއާޓާގައި ހުރިހާ ދާއިރާއެއްގެ ވިޔަފާރިތަކުން ވެސް ލަފާކުރީ ވިޔަފާރި ކުރި އަރާ މިންވަރު މަތިވެގެންދާނެ ކަމަށެވެ.
އެގޮތުން އަންނަ ކުއާޓާގައި އެންމެ ބޮޑަށް ވިޔަފާރި ކުރާ މިންވަރު އިތުރު ވެގެން ދާނެ ކަމަށް ފާހަގަކޮށްފައި ވަނީ ދަތުރުފަތުރާއި މުވާސަލާތީ ހިދުމަތުގެ ދާއިރާއިންނެވެ. ނަމަވެސް، އަންނަ ކުއާޓާގައި މި ދާއިރާގެ ވިޔަފާރިތަކުންދޭ ހިދުމަތުގެ އަގުތަކާއި ވިޔަފާރި ހިންގުމަށް ގަންނަ ތަކެތީގެ އަގު އުފުލިގެންދާނެ ކަމަށް އަންދާޒާކޮށްފައިވެ އެވެ.
ނިމުނު ކުއާޓާގައި އެންމެ ގެއްލުން ބޮޑުވި ޓޫރިޒަމް ވިޔަފާރިތަކުން ވެސް އަންދާޒާ ކުރަނީ އާމްދަނީ އަދި ރިސޯޓް ބުކިންސް އިންޑެކްސް އިތުރުވެ، ދާއިރާ ކުރިއަރާނެ ކަމަށެވެ. އޭގެ މައިގަނޑު ސަބަބަކީ "އޮފް-ޕީކް ސީޒަން" ނިމޭ ދުވަސްވަރަށް ވުމެވެ. އެކަމަކު، އަގުތައް އުފުލޭނެ ކަމަށް ބެލެވޭތީ ވިޔަފާރިތަކުން އަންދާޒާކުރަނީ މާލީ ހާލަތު އިތުރަށް ހީނަރުވާނެ ކަމަށެވެ.
ތިން ވަނަ ކުއާޓާގައި މާލީ ހާލަތު އިތުރަށް ރަނގަޅު ވާނެ ކަމަށް ލަފާކުރީ ހަމައެކަނި ކޮންސްޓްރަކްޝަން ދާއިރާއިންނެވެ. ހޯލްސޭލް އަދި ރީޓެއިލް ދާއިރާގެ ވިޔަފާރިތަކުން އަންދާޒާ ކުރަނީ ވިޔަފާރިތަކުގެ މާލީ ހާލަތު ރަނގަޅުވަމުންދާ މިންވަރު މަޑުޖެހިގެންދާނެ ކަމަށެވެ. ދަތުރުފަތުރާއި މުވާސަލާތީ ހިދުމަތުގެ ވިޔަފާރިތަކުން ލަފާކުރަނީ ކުރިއަށް އޮތް ކުއާޓަރުގައި ވިޔަފާރިތަކުގެ މާލީ ހާލަތު އިތުރަށް ހީނަރު ވެގެން ދާނެ ކަމަށެވެ.
ދެ ވަނަ ކުއާޓާގެ ސާވޭގައި ބައިވެރިވި ހުރިހާ ވިޔަފާރިތަކުން ވެސް ކްރެޑިޓްގެ ގޮތުގައި ފައިސާ ހޯދުމަށް ދަތިވެފައިވާކަން ފާހަގަކޮށްފައި ވެއެވެ. އަދި ފަތުރުވެރިކަމުގެ ދާއިރާ ފިޔަވައި، އެހެން ހުރިހާ ދާއިރާއެއްގެ ވިޔަފާރިތަކުން ވެސް ލަފާ ކުރަނީ ކްރެޑިޓްގެ ގޮތުގައި ފައިސާ ހޯދުމަށް އިތުރަށް ދަތިވެގެން ދާނެ ކަމަށެވެ.
އެމްއެމްއޭއިން މައުލޫމާތު ދީފައިވާ ގޮތުގައި މި ރިޕޯޓަށް ކުރި ދިރާސާއަށް ހަތަރު ދާއިރާގައި މަސައްކަތް ކުރާ ބޮޑެތި ކުންފުނިތަކުގެ ތެރެއިން 138 ކުންފުންޏަކުން މައުލޫމާތު ދިނެވެ. އެއީ ފޯމު ފޮނުވި 197 ކުންފުނީގެ 70 ޕަސެންޓެވެ.
