މިހާރު ކުރިއަށްދާ ކްލަބް މޯލްޑިވްސް ފުޓްސަލް މުބާރާތުގައި ކުޅުނު ދެ ވަނަ މެޗުން ވެސް މޮޅުވެ، އާރްއާރްސީ އާއި ޕްރިޒަން ކްލަބްގެ ވަރުގަދަ ފެށުން ކުރިއަށް ގެންދިޔައިރު، މީޑިއާނެޓް އަތުން ތަފާތު ބޮޑު މޮޅެއް ހޯދައި އެންމެ ފަހުގެ ޗެމްޕިއަން ޓީމު ފެނަކަ ފޯމަކަށް އެޅިއްޖެ އެވެ.
ގްރޫޕް ޖީގައި ފެނަކަ އިން ވަނީ 8-1 އިން މީޑިއާނެޓް ބަލިކޮށްފަ އެވެ. ގްރޫޕް އެފްގައި ކްލަބް ފެން އަތުން ޕްރިޒަން މޮޅުވީ 6-4 އިންނެވެ. އަދި ގްރޫޕް އެޗްގައި އާރްއާރްސީން ވަނީ ކްލަބް ޓީއެމްއޭ އަތުން 7-2 އިން މޮޅުވެފަ އެވެ.
ފުރަތަމަ މެޗުގައި އޭވިއޭޝަން ސެކިއުރިޓީއާ އެއްވަރުވި ފެނަކަ ރޭގެ މެޗުގައި މީޑިއާނެޓް ކޮޅަށް ޖެހި އަށް ގޯލުގެ ތެރެއިން ފަސް ގޯލު ޖެހީ އެ ޓީމުގެ އީރާން ކުޅުންތެރިޔާ، މައްސޫދު މާޖިދު ފަލާހީ އެވެ. އަނެއް ތިން ގޯލު ޖެހީ މުހައްމަދު އިންޝާލް، މުހައްމަދު އިޔާދު އަލީ އަދި ހާޒިމް ފައުޒީ އެވެ. މީޑިއާނެޓްގެ ގޯލު ޖެހީ މުހައްމަދު ސަމީހު އެވެ.
ޕްރިޒަން އިން ފެން ބަލިކުރިއިރު، ޕްރިޒަންގެ ލަނޑުތައް ޖެހީ މުހައްމަދު ޝާއިން ދެ ގޯލާއި އަހުމަދު ހުސާމް (ހުސާންކޮ)، ޝަނާން ރަޝާދު، މުރުތަޖާ މުހައްމަދު އެވެ. ފެން ކްލަބްގެ ލަނޑުތައް ޖެހީ، އަހުމަދު މާޒިން، ރައްޒާން ޖައުފަރު، ސޮލާހު އަލީ އަދި އަހުމަދު ރައްޔާން އެވެ.
އާރްއާރްސީން ރޭގެ މެޗުގައި ލަނޑުތައް ޖެހީ ހުސެއިން ގައްސާން ލަބީބް ހެޓްރިކަކާއި އަބްދުﷲ މިދުހަތު ފަހުމީ (ބިޗަޑް)، އަބްދުﷲ ޔާމީން (ޔާނު)، ހިސާމް ސަލީމް (ކޮކީ) އަދި އިބްރާހިމް އަސްވަދު އެވެ. ޓީއެމްއޭގެ ގޯލުތައް ޖެހީ އުސައިރަމް މުހައްމަދު އާއި އަހުމަދު ވާފިރު އެވެ.
ރޭ ކުޅުނު ކްލަބް މޯލްޑިވްސް ކްލަސިކް މުބާރާތުގެ މެޗުގައި ހޯމް އެފެއާޒް ރެކްރިއޭޝަން ކްލަބް އަތުން އެޗްޕީއެސްއެން ވަނީ 3-1 އިން މޮޅުވެފަ އެވެ. އެޗްޕީއެސްއެންގެ ގޯލުތައް ޖެހީ އިޝާން އަބްދުﷲ ދެ ގޯލާއި އަހުމަދު ވަދީއު އެވެ. ހޯމްއެފެއާޒްގެ ލަނޑު ޖެހީ މުހައްމަދު އާއިޝް މުސްތަފާ އެވެ.
މުބާރާތުގައި މިއަދު ހަވީރު އޮންނާނީ ކްލަބް މޯލްޑިވްސް ކަޕްގެ ދެ މެޗެވެ. މިރޭ ކުރިއަށްދާނީ ކްލަބް މޯލްޑިވްސް ކްލަސިކް މުބާރާތުގެ ހަތަރު މެޗެވެ.
