ކ.ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕްގެ ފިރިހެން ބައިގައި ވާދަކޮށް ރާއްޖޭގެ ތަޖުރިބާކާރު ސާފަރު ހުސައިން އަރީފް (އިބޫ) ބްރޯންޒް މެޑަލް ހޯދައިފި އެވެ.
އިބޫ 46، އަކީ 2019 ވަނަ އަހަރު ޖަޕާންގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕްގައި ވެސް ވާދަކޮށް ބްރޯންޒް މެޑަލް ހޯދި ސާފަރެކެވެ.
މިއަދު ކުރިއަށްދިޔަ ފައިނަލް ހީޓުގައި އިބޫ ވާދަކުރީ އިންޑޮނޭޝިއާގެ ޑަނީ ވިޑިއަންޓޯ އާއި ޖަޕާންގެ ރިކީ ސަޓޯ އަދި ޖަޕާންގެ އިކޯ ވަތަނާބޭއާ އެވެ. ފައިނަލު ހީޓުގެ އެއް ވަނަ ހޯދައި ރަން މެޑަލް ހޯދީ ވިޑިއަންޓޯ އެވެ. އޭނާ ވަނީ 17.83ގެ ސްކޯއެއް ހޯދައިފަ އެވެ. ދެ ވަނަ ހޯދި ސަޓޯ އަށް 13.90ގެ ސްކޯއެއް ލިބުނުއިރު އިބޫ އަށް ލިބުނީ 10.87ގެ ސްކޯ އެކެވެ. ހަތަރު ވަނަ އަށް ދިޔަ އިކޯ އަށް ލިބުނީ 10.73ގެ ސްކޯ އެކެވެ.
އޭޝިއަން ސާފިން ޗެމްޕިއަންޝިޕްސްގެ ފައިނަލު ހީޓުގައި މިއަދު ހުސައިން އަރީފް (އިބޫ) ރާޅާ އަޅަނީ - ފޮޓޯ: މުހައްމަދު ޝާބިން/އަދަދު
ރާއްޖޭގެ ސާފިންގެ އެންމެ ކާމިޔާބު އެތުލީޓު އިބޫ ފައިނަލުން ފުރުސަތު ހޯދީ ރެޕެޗާޖު ބައިގެ ފަހު ބުރުގެ ގަދަ ދެ ބައިވެރިންގެ ތެރޭގައި ހިމެނިގެންނެވެ. މި ހީޓުން އިބޫއަށް ދެވަނަ ލިބުނުއިރު އެއްވަނަ ހޯދީ ޖަޕާންގެ ސަޓޯ އެވެ. މި ހީޓުން ކެޓީ މުބާރާތުގައި ރަނގަޅު ފޯމެއްގައި ރާޅާ އަޅަމުންދިޔަ ޖަޕާންގެ ޓަރޯ ޓަކާއީ އާއި އެގައުމުގެ ކައިސެއި އަޑާޗީ އެވެ.
އިބޫ، މިއަދު ފައިނަލުގައި ވާދަކުރަން ޖެހުނީ މާ ބޮޑެތި ބްރޭކްތަކެއް ނުލިބި އެވެ. ރެޕެޗާޖު ހަ ވަނަ ބުރުގައި އޭނާ ރާޅާ އެޅީ މިއަދު ހެނދުނު 10:30ގަ އެވެ. އޭގެ ފަހުން 12:30ގައި ރެޕެޗާޖު ހަތްވަނަ ބުރުގައި އެޅިއިރު ފައިނަލް ހީޓުގައި ވާދަކުރީ މެންދުރު 2 ޖެހިއިރު އެވެ. ކޮންމެ ހީޓެއްވެސް ކުރިއަށްދިޔައީ 30 މިނެޓަށެވެ.
މިއީ އިބޫ އަށް މި އަހަރުގެ އޭޝިއަން ސާފިން ޗެމްޕިއަންޝިޕްގައި ލިބޭނެ ދެ ވަނަ ބްރޯންޒް މެޑައްޔެވެ. އޭނާއާ އެކު ރާއްޖޭގެ ޓީމުން ވަނީ މި މުބާރާތުގެ ތެރެއިން ކުރިއަށްދިޔަ މިކްސް ޓީމު އިވެންޓް ކަމަށްވާ އަލޯހާ ކަޕްގެ ތިން ވަނަ ހޯދައިފަ އެވެ. އަލޯހާ ކަޕްގައި ވާދަކުރި ރާއްޖޭގެ ޓީމުގައި ހިމެނެނީ އިބޫ، އަހުމަދު އާގިލް (އައްމަޑޭ)، ހޫދު އަހުމަދު އަދި ރާހިލް ނަސީމް (އާޔާ) އެވެ.
