މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕްގެ ރެޕެޗާޖް ބައިގެ ހަ ވަނަ ބުރުން ރާއްޖޭގެ ތަޖުރިބާކާރު ދެ ސާފަރުން ކަމަށްވާ ހުސައިން އަރީފް (އިބޫ) އާއި އިސްމާއިލް މިގްލާލް (ކުޑަ އިއްސެ) ޖާގަ ހޯދައިފި އެވެ.
އޭޝިއާގެ 18 ގައުމަކުން ސާފަރުން ވާދަކުރަމުން އަންނަ ސާފިން މުބާރާތުގެ ތިން ކެޓަގަރީއެއްގައި ރާއްޖެއިން 17 ސާފަރުން ވާދަކުރެ އެވެ. އެއީ, މެންސް އޯޕަން ބައިގައި އަށް ސާފަރުން، ޖޫނިއާ ފިރިހެން ބައިގައި އަށް ސާފަރުންނާއި އަންހެން ބައިގައި ވާދަކުރާ ރާހިލް ނަސީމް (އާޔާ) އެވެ.
މިހާތަނަށް މުބާރާތުގައި ނިމިފައިވާ ހީޓުތަކަށް ބަލާއިރު ގިނަ ރާއްޖޭގެ ދެ ސާފަރުން ފިޔަވައި އެހެން ހުރިހާ ސާފަރުންވަނީ ކަޓާފަ އެވެ. މިގޮތުން މުބާރާތުގައި ކުރިއަށްދިޔުމުގެ ފުރުސަތު އޮތީ ތަޖުރިބާކާރު ދެ ސާފަރުން ކަމަށްވާ އިބޫ އާއި ކުޑަ އިއްސެ އަށެވެ.
ދެ ސާފަރުންވެސް ދެން ވާދަކުރާނީ ރެޕެޗާޖު ބައިގެ ހަ ވަނަ ބުރުގަ އެވެ. ރެޕެޗާޖް ބައިގެ ހަވަނަ ބުރަށް މި ދެ ސާފަރުން ކޮލިފައިވީ ރެޕެޗާޖުގެ ފަސް ވަނަ ބުރުގައި ކުރިއަށްދިޔަ ހީޓުގެ ގަދަ ދެ ސާފަރުންގެ ގޮތުގަ އެވެ. އެ ހީޓުގައި ވާދަކުރީ އިބޫ އާއި ކުޑަ އިއްސެގެ އިތުރުން ރާއްޖޭގެ އަހުމަދު އާގިލް (އައްމަޑޭ) އަދި އިންޑިއާގެ ސިވަރާޖް ބާބޫ އެވެ.
މި ހީޓުން އެއްވަނަ ހޯދީ އިބޫ އެވެ. އޭނާ ވަނީ 13.80ގެ ސްކޯއެއް ހޯދާފަ އެވެ. 12.76ގެ ސްކޯއަކާއިއެކު ކުޑަ އިއްސެ ދެވަނަ ހޯދިއިރު އައްމަޑޭ އަށް ލިބުނީ 9.93ގެ ސްކޯއެކެވެ. ހީޓުގެ ފުލަށް ދިޔަ ސިވަރާޖް ބާބޫ އަށް ލިބުނީ 7.73ގެ ސްކޯއަކުންނެވެ.
ރެޕެޗާޖު ބުރުގައި އިބޫ ވާދަކުރަން ޖެހުނީ މެއިން ބައިގެ ހަތަރު ވަނަ ބުރުގައި ވާދަކޮށް ހީޓުގެ ގަދަ ދެ ބައިވެރިންގެ ތެރޭގައި އޭނާ ނުހިމެނުމުންނެވެ. އެންމެ ފަހުން އޮތް އޭޝިއަން ސާފިން ޗެމްޕިއަންޝިޕުން ލޯ މެޑަލް ހޯދި އިބޫ އައީ މެއިން ބައިގައި ވަރުގަދަ ވާދައެއް ކުރަމުންނެވެ. ނަމަވެސް ހަތަރު ވަނަ ބުރުގައި އޭނާ ވާދަކުރި ހީޓުން ކުޑަ ކުޑަ ތަފާތަކުން ބަލިވެ އޭނާ ރެޕެޗާޖު ބުރުގައި ވާދަކުރަން ޖެހުނީ އެވެ.
ރާއްޖޭގެ ސާފިންގައި 30 އަހަރަށްވުރެ ގިނަ ދުވަހުގެ ތަޖުރިބާ ހުރި އިބޫ އާއި އިއްސެ ވާދަކުރާ ރެޕެޗާޖު ބައިގެ ހަވަނަ ބުރުން ކުރި ލިބިއްޖެ ނަމަ ރެޕެޗާޖު ފަހު ބުރަށް ކޮލިފައިވާނެ އެވެ. ރެޕެޗާޖު ފަހު ބުރުން ކުރި ހޯދާ ދެ ބައިވެރިންނަށް ފައިނަލުން ފުރުސަތު ލިބޭނެ އެވެ.
ފިރިހެން އޯޕަން ބައިގައި ވާދަކުރި ރާއްޖޭގެ އެހެން ސާފަރުންނަށް ބަލާއިރު އާދަމް މުއީން އިބްރާހިމް، ހޫދު އަހުމަދު، ހަސަން ނާސިހު (ޗިކާ) އަދި އަބްދުﷲ އަރީފް ކެޓީ ރެޕެޗާޖު ބައިގެ ހަތަރުވަނަ ބުރުންނެވެ.
އަންހެން އޯޕަން ބަޔަށް ބަލާއިރު ރާއްޖޭގެ އާޔާ ކެޓީ ރެޕެޗާޖު ބައިގެ ދެވަނަ ބުރުންނެވެ.
ޖޫނިއާ ބަޔަށް ބަލާއިރު އެންމެ ދުރަށް ދަތުރުކުރީ 16 އަހަރުގެ ސައްޔިދު ސަލާހުއްދީން އާއި 13 އަހަރުގެ ޔާސިން އަހުމަދު ނާޝިދު އެވެ. މި ދެ ސާފަރުންވެސް ކެޓީ ރެޕެޗާޖު ބައިގެ ތިންވަނަ ބުރުންނެވެ.
އެހެން ޖޫނިއާ ސާފަރުންނަށް ބަލާއިރު މުހައްމަދު އިނާން އަބްދުލްހަންނާން، ޝާނިފް ޝަފީގް އަދި ޔޫސުފް ކަޔާން ހަމްދާން ޒަކީ ކެޓީ ރެޕެޗާޖް ބައިގެ ދެވަނަ ބުރުންނެވެ.
މުބާރާތުގައި މިއަދު ކުރިއަށްދާ ހީޓުތަކަށް ފަހު ބައެއް އިވެންޓުތަކުގެ ފައިނަލުގައި ވާދަކުރާ ބައިވެރިން ޔަގީންވާނެ އެވެ. ފައިނަލް ހީޓުތަކާއި އިނާމް ދިނުމުގެ ރަސްމިއްޔާތު ކުރިއަށްގެންދިޔުމަށް ހަމަޖެހިފައިވަނީ މާދަމާ އެވެ.
