ސްވިޑަންގެ ސްޓޮކްހޯމްގައި ހުންނަ އިޒްރޭލުގެ އެމްބަސީ ކުރިމަތީގައި ތައުރާތު އެންދުމުގެ ހުއްދަ ހޯދި 32 އަހަރުގެ ފިރިހެން މީހާ އެކަން ނުކުރާނެ ކަމަށް ބުނެފި އެވެ.
އެ މީހާ ބުނީ ތައުރާތު އެންދުމުގެ ހުއްދަ ފުލުހުންގެ ފަރާތުން ހޯދީ، ގުރުއާން ފަދަ މާތްވެގެންވާ ފޮތްތައް އެންދުމުގެ އަމަލުތައް ކުށްވެރި ކުރުމުގެ ގޮތުން ކަމަށެވެ.
ޔަހޫދީންގެ ފޮތް ތައުރާތާއި ނަސާރާއިންގެ ބައިބަލް އެންދުމުގެ ހުއްދަ ދިން ކަމަށް ސްވިޑަންގެ ފުލުހުން ބުނީ ހުކުރު ދުވަހު އެވެ. ހުއްދަ ދިނީ ހިޔާލު ފާޅުކުރުމުގެ މިނިވަންކަމުގެ ދަށުންނެވެ.
އިޒްރޭލުގެ ރައީސް އައިސަކް ހެރްޒޮގް އަދި އިޒްރޭލުގެ ގިނަ ޕާލަމެންޓް މެމްބަަރުންނާއި ޔަހޫދީން ޖަމިއްޔާތަކުން ވަނީ ތައުރާތު އަންދަން އުޅުން ކުށްވެރިކޮށްފަ އެވެ.
އެކަމުގެ ހުއްދަ ހޯދި އަހްމަދު އޭ ބުނީ އޭނާގެ އަމާޒަކީ ކޮންމެހެން ތައުރާތު އެންދުން ނޫން ކަމަށާއި ބޭނުމަކަށްވީ އެފަދަ އެއްވެސް ފޮތެއް އެންދުމުގެ އަމަލުތައް ގޯސްކަން ދެއްކުން ކަމަށެވެ.
"ހިޔާލު ފާޅުކުރުމުގެ މިނިވަންކަން ވެސް ލިބިދެނީ ވަކި ހުދޫދެއްގެ ތެރެއިންކަން އަންގައިދޭން ބޭނުންވީ،" ސީރިއާގެ ދަރިކޮޅުގެ ސްވިޑަންއަށް ނިސްބަތްވާ އަހްމަދު ބުންޏެވެ.
