ދިވެހި ފުޓްބޯޅަ ކުރިއަރުވަން ބަލާއިރު ގިނަ ދަނޑުތަކެއް މުހިންމު ކަމަށާއި، ޓާފް ދަނޑުގައި ޕްރެކްޓިސްކޮށްގެން ކުޅުމަށް ވުރެން، ވަކިން ހާއްސަކޮށް ވިނަ ދަނޑުތަކެއްގައި ކުޅެގެން ތައްޔާރުވުންތައް ކުރިއަށް ގެންދިއުން މުހިންމު ކަމަށް މާޒިޔާގެ ކޯޗު ބޮސްނިއާގެ މިލޮމީރް ސެސްލިޖާ (މިލޯ) ބުނެފި އެވެ.
މާޒިޔާގެ ކޯޗުކަމާ ހަވާލުވިތާ ހަފްތާއެއް ފަހުން މިރޭ މިލޯ، އެ ޓީމު ގޮވައިގެން ފުރަތަމަ މެޗަށް ނުކުންނާނެ އެވެ. ކޯޗު މިލޯއާ އެކު ފަސް ދުވަހުގެ ޕްރެކްޓިސް އަށް ފަހު ޓީސީ ސްޕޯޓްސް ކުލަބާ ދެކޮޅަށް މިރޭ މާޒިޔާ ކުޅޭނެ އެވެ.
ރާއްޖޭގައި މިހާތަނަށް އޭނާގެ ތަޖުރިބާއާ ގުޅޭގޮތުން ކޯޗު މިލޯ ބުނީ ރާއްޖެ އަކީ މެހުމާންދާރީ އަދާކުރުމުގައި ނަމޫނާ ގައުމެއް ކަމަށެވެ. ޓީމާ އެކު މި ހޭދަވީ މަދު ދުވަސްކޮޅު އުފާވެރި ހިތްހަމަޖެހޭ ދުވަސްތަކެއް ހޭދަވި ކަމަށް އޭނާ ބުންޏެވެ.
މާޒިޔާއާ އެކު އޭނާ ކުރާ ފުރަތަމަ ތަޖުރިބާއާ ގުޅޭގޮތުން މިލޯ ބުނީ ޓީސީ އަކީ ސަމާލުވާން ޖެހޭ ވަރުގެ ޓީމެއް ކަމަށާއި، ވަކިން ހާއްސަކޮށް އެ ޓީމަކީ ކައުންޓާ އެޓޭކުގައި ނުރައްކާ ޓީމެއް ކަމަށެވެ.
"ޓީސީގެ ބައެއް މެޗުތައް ބަލައިފިން. އެ ޓީމުގެ ވަރުގަދަ ކަންކަން ފާހަގަކޮށްފިން. ކީޕަރު (ސުޖަން) ވެސް ރަނގަޅު އެ ޓީމު. ކައުންޓާ އެޓޭކުގައި ނުރައްކާ ޓިމެއް އެއީ. އެހެން ވަރަށް ވިސްނަން ޖެހޭނެ. ބައި ގޯލަކުން ވެސް މެޗު ގެއްލިދާނެ. އެހެންވީމަ އަހަރުމެން ރަނގަޅަށް ތައްޔާރުވާނެ" އޭނާ ބުންޏެވެ.
މިލޯ ބުނީ މި މެޗުގައި އޭނާ ބޭނުންވަނީ ޓީމުން އެޓޭކިން ގޭމެއް ކުޅެން ކަމަށެވެ. ކުޅުންތެރިންގެ މޮޅުވާން ބޭނުންވާ މިންވަރު ފެނިފައި އޭނާ ހުރީ ހިތްހަމަޖެހިގެން ކަމަށާއި، ޓީމު ތެރޭ ވަރަށް އެކުވެރިކަން ވެސް އޭނާ ފާހަގަކުރި އެވެ.
"އަހަރެން ބޭނުންވަނީ ކުޅުންތެރިން މެންޓަލީ މި މެޗަށް ތައްޔާރުވާން. ކުޅުންތެރިން ކުޅުމުގެ ތެރެއިން އިސްނަގަން އަހަރެން ބޭނުމީ. އެގްރެސިވްކޮށް ކުޅެން. އެކަކު އަނެކަކާ ވާހަކަދައްކައިގެން ކުޅެންވީ. މޮޅުވާން ބޭނުންވާ މީހުންގެ ސިފަތައް ކުޅުންތެރިންގެ ފަރާތުން މެޗުގައި ފެންނަން ބޭނުމީ." ބޮސްނިއާ އަށް އުފަން މިލޯ ބުންޏެވެ.
އޭޝިއާގައި ކުޅުމާއި ކޯޗިންގެ ތަޖުރިބާ ވެސް ހާސިލްކޮށްފައިވާ މިލޯ ވަނީ ޓާފް ދަނޑުގައި ކުޅުމަކީ ކުޅުންތެރިންނަށް އޭގެ ނުރައްކާވާ ކަމެއްކަން ހާމަކޮށްފަ އެވެ. އެ ގޮތުން ޓާފް ދަނޑުގައި ވަރުގަދައަށް ކުޅުމުން ފައިގެ އެކި މަސްތަކަށް އަނިޔާވުމުގެ ފުރުސަތު ބޮޑުކަން އޭނާ ހާމަކުރި އެވެ.
"ޓާފްގައި ކުޅެފައި ވިނަ ދަނޑުގައި ކުޅުމުގައި ތަފާތެއް ހުރޭ. އެކަމަކަށް ވިސްނައިގެން ޕްރެކްޓިސް ކުރަން ޖެހޭނީ. އަނެއްކޮޅުން ފުލް ޕިޗު އެބަ ބޭނުންވޭ. އަހަރުމެން ޕްރެކްޓިސް މި ކުރީ ވިލިނގިލީގައި. 30 މިނެޓު ގެއްލުނަސް އަހަންނަށް ފުލްދަނޑެއްގައި ކުރެވޭ ޕްރެކްޓިސް ވަރަށް މުހިންމު." އޭނާ ބުންޏެވެ.
ދިވެހި ފުޓްބޯޅައިގެ ކުރިއެރުމަށް ކުރެވޭނީ ކޮންކަމެއްތޯ އެހުމުން އޭނާ ބުނީ އެންމެ މުހިންމު ކަމަކީ ގިނަ ދަނޑުތަކެއް އެޅުން ކަމަށެވެ. އެ ގޮތުން ޓީމްތައް ފުލް ދަނޑެއްގައި ޕްރެކްޓިސް ކުރަން ގިނަ ދަނޑުތަކެއް އެޅުން މުހިންމު ކަމަށާއި، އެ ގޮތުން ޓީމްތައް ފުލް ދަނޑެއްގައި ޕްރެކްޓިސްކޮށް ގިނަ ބަޔަކު ކުޅޭނެ ވަސީލަތްތައް ހުރުން މުހިންމު ކަމަށްވެސް އޭނާ ބުންޏެވެ.
"ދިވެހި ފުޓްބޯޅަ ކުރިއަރުވަން ވަރަށް މުހިންމު ކަމެއް ގިނަ ދަނޑުތަކެއް އެޅުން. އަހަރެން އަޑު އެހިން އިތުރު ދަނޑެއް އަޅާވާހަކަ. ވިނަ ދަނޑުގައި މެޗު ކުޅެން ވިނަ ދަނޑުގައި ޕްރެކްޓިސް ކުރުންވެސް މުހިންމު. ދަނޑިތައް ގިނަވި ވަރަކަށް ބޭނުންވާ ގޮތަށް ގިނަ ޕްރެކްޓިސް ކުރެވޭނެ. ގިނަ މީހުން ކުޅޭނެ. މިއީ އެންމެ މުހިންމު ކަމަކީ." މިލޯ ބުންޏެވެ.
މާޒިޔާ އާއި ޓީސީ ކުޅޭ މެޗު އޮންނާނީ މިރޭ 9 ޖަހާއިރު އެވެ.
