އެމަނިކުފާނުގެ އިތުބާރު ނެތް ކަމަށް ރައްޔިތުންގެ މަޖިލީހަށް ހުށަހަޅާފައި އޮތް ގަރާރާމެދު ގޮތެއް ނިންމުމުގެ ކުރިން އެ މަޖިލީހުގެ ރިޔާސަތު ބެލެހެއްޓުމަށް އުޒުރުވެރިވެވަޑައިގަންނަވާ ކަމަށް އެ މަޖިލީހުގެ ރައީސް މުހައްމަދު ނަޝީދު މަޖިލީހުގެ އަމީން އާންމު ފާތިމަތު ނިޔުޝާއަށް އިއްޔެ އެންގެވި އެވެ.
މަޖިލީހުގެ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ނަޝީދު ވިދާޅުވިއިރު ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވަކި ކުރަން އެ މަޖިލީހުން މާދަމާ ބާއްވަން ލާޒިމު ޖަލްސާގެ ރިޔާސަތު ބަލަހައްޓަންޖެހެނީ ގަވާއިދުގައިވާ ގޮތުން އެ މަޖިލީހުގެ ރައީސެވެ.
"އެ މައްސަލައަށް ވަކި ގޮތެއް ނިމުމާ ހަމައަށް މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމަށް އަޅުގަނޑު އުޒުރުވެރިވަން. މަޖިލީހުގެ ގަވާއިދުގެ 44 ވަނަ މާއްދާގެ ހ. ގެ ދަށުން އަޅުގަނޑަށް މި އިހުތިޔާރު ލިބޭކަމުގައި އަޅުގަނޑު ދެކެން،" އަމީން އާންމު ފާތިމަތު ނިޔުޝާއަށް ކުރީގެ ރައީސް ނަޝީދު ފޮނުއްވި ސިޓީގައި ވިދާޅުވެފައިވެ އެވެ.
ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގައި ބުނެފައި ވަނީ މަޖިލީހުގެ ރައީސް އާއި މަޖިލީހުގެ ނައިބު ރައީސް ރިޔާސަތު ބެލެހެއްޓުން އުޒުރުވެރިވެއްޖެ ހާލަތެއްގައި، ރިޔާސަތު ބަލަހައްޓާނެ މެމްބަރުން ގާނޫނު އަސާސީގެ 82 ވަނަ މާއްދާގެ ށ. ގައިވާ ގޮތުގެ މަތިން މަޖިލީހުގެ ރައީސް ކަނޑައަޅަންވާނެ ކަމަށެވެ.
ގާނޫނު އަސާސީގެ 82 ވަނަ މާއްދާގެ ށ. ގައި ބުނަނީ "ރައްޔިތުންގެ މަޖިލީހުގެ ޖަލްސާތަކުގެ ރިޔާސަތު ބަލަހައްޓާނީ އެ މަޖިލީހުގެ ރައީސް" ކަމަށާއި "މަޖިލީހުގެ ރައީސް ހާޒިރު ނުވާ ނަމަ ރިޔާސަތު ބަލަހައްޓާނީ ނައިބު ރައީސް" ކަމަށާއި "ރައީސް އާއއި ނައިބު ރައީސް ހާޒިރު ނުވާ ނަމަ މަޖިލީހުގެ ގަވާއިދުގައިވާ ގޮތުގެމަތިން އެ ޖަލްސާގެ ރިޔާސަތު ބަލަހައްޓާނޭ މީހަކު ކަނޑައަޅާނީ" ކަމަށެވެ.
ރިޔާސަތު ބެލެހެއްޓެވުމުން ނަޝީދު ދުރުވެވަޑައިގެންނެވި ނަމަވެސް ގަވާއިދު ތަންދޭ މިންވަރަކުން "މަޖިލީހުގެ އެންމެހައި ކަންކަން ހިންގުމުގައި އަޅުގަނޑު ދެމިހުންނާނެ" ކަމަށެވެ. އޭގެ އިތުރުން، އެމަނިކުފާނުގެ އިތުބާރު ނެތްކަމުގެ މައްސަލަ ހިނގަމުންދާއިރު އަމީން އާންމުގެ މަސްއޫލިއްޔަތުތަކާއި ވާޖިބުތަކަށް ހުރަސް އެޅޭނެ ފަދަ އެއްވެސް ކަމެއް ނުކުރައްވާނެކަމުގެ ޔަގީންކަން ނަޝީދު ވަނީ އެ ސިޓީގައި އަރުވައިފަ އެވެ.
ރައްޔިތުންގެ މަޖިލީހުގެ ރައީސް އާއި ނައިބު ރައީސްގެ އިތުބާރު ނެތްކަމުގެ މައްސަލަ އެއް ވަގުތެއްގައި މަޖިލީހަށް ވައްދާފައި އޮތުމުން މަޖިލިސް ހުއްޓިފައިވާ ކަމަށް އިދިކޮޅު މެމްބަރުން ދެކެ އެވެ. އެގޮތުން، ރައީސް ވަކި ކުރަން ހުށަހަޅާފައި އޮތް މައްސަލައިގެ ނޯޓިސް ލިބިފައިވާތީ، ގަވާއިދުގައި އެގޮތަށް ބަޔާން ކުރި ނަމަވެސް ނަޝީދަށް އެ ޖަލްސާގައި ރިޔާސަތުގައި ނީންދެވޭނެ ކަމަށް އެ މެމްބަރުން ދެކެ އެވެ.
ނަމަވެސް ސަރުކާރަށް ތާއީދު ކުރާ މެމްބަރުން ދެކެނީ ނަޝީދަށް ރިޔާސަތުގައި ނުއިންނެވޭނީ މައްސަލައިގެ ނޯޓިސް ހަމަވުމުންނެވެ. އެހަންކަމުން، އީވާގެ މައްސަލައިގައި ނަޝީދަށް ރިޔާސަތު ބެލެހެއްޓޭނެ ކަމަށް އެ މެމްބަރުން ބުނެ އެވެ.
ރައްޔިތުންގެ މަޖިލީހުގެ ގަވާއިދުގައިވާ ގޮތުން ނައިބު ރައީސް އީވާ ވަކި ކުރަން ހުށަހަޅާފައި އޮތް ގަރާރު މާދަމާ އިއްވަން ޖެހުނު ނަމަވެސް އަދިވެސް އެ މައްސަލަ އެޖެންޑާކޮށްފައެއް ނުވެ އެވެ. އެއީ އެ ޖަލްސާގެ އިންތިޒާމުތައް އާންމު ކޮމެޓީން ކަނޑައަޅަންޖެހޭއިރު އެ ކޮމެޓީ އެކުލަވާލެވިފައި ނުވާތީ އެވެ.
ވެރިކަން ހިންގާ އެމްޑީޕީގެ މެމްބަރުންތަކެއް އެ ޕާޓީން ވަކިވުމުން ކޮމެޓީތަކުގެ ހަމަ ބަދަލުވެފައިވާ ކަމަށް ބުނެ އަމީން އާންމު ވަނީ އީވާގެ މައްސަލަ އެޖެންޑާ ނުކުރެވޭނެ ކަމަށް އަންގައިފަ އެވެ. ނަމަވެސް އެމްޑީޕީން ބުނަނީ ދާއިމީ ކޮމެޓީތައް އަބަދުވެސް ދެމި އޮންނާނެ ކަމަށާއި ކޮމެޓީތަކަށް ގޮވާލުމަކީ އަމީން އާންމުގެ މަސްއޫލިއްޔަތެއް ކަމަށެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
ރާއްޖެޓީވީގެ "ފަލަސުރުހީ" ޕްރޮގްރާމްގައި ރޭ ވާހަކަ ދައްކަވަމުން އެމްޑީޕީގެ ޕާލިމެންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުވީ މަޖިލީހުގެ މަސައްކަތް ނުފެށި ލަސްވާ މައްސަލަ މަޖިލީހުގެ ތެރެއިން ހައްލުވޭތޯ އެމްޑީޕީން ބަލާނީ ވަކިވަރަކަށް ކަމަށެވެ. އެކަން ފާހަގަ ކުރައްވައި އޭނާ އިތުރަށް ވިދާޅުވީ،
"އެއަށް ހައްލެއް ނުހޯދޭ ނަމަ އަޅުގަނޑުމެންނަށް އަދި ހަމަ ގާނޫނީ ފޮތުގެ ތެރޭން އަދި އެޅޭނެ އެހެނިހެން ފިޔަވަޅުތައް ވެސް އެބަހުރި. ސުޕްރީމްކޯޓަކީ ވެސް ހަމަ އޮތް އޮޕްޝަނެއް. ޕާސަނަލީ އަޅުގަނޑަކަށް އެހާ ކޮމްފޮޓަބުލް އެއް ނޫން ތިން ބާރު މިހެން ވަކިވެފައި އޮންނަ އިރު މަޖިލީހުގެ މަސައްކަތްތައް ތަރުތީބުނުކުރެވިގެން، ގަވައިދަށް ބަދަލު ނުގެނެވިގެން ސުޕްރީމްކޯޓަށް ދާން ޖެހުން އެއީ އަޅުގަނޑު ޕާސަނަލީ އެހާ ހިތާވާ ކަމެއްނޫން. އެހެން ނަމަވެސް ކުރަން ޖެހިއްޖެއްޔާ އަޅުގަނޑަށް ޔަގީން އެމްޑީޕީ ޕާލަމެންޓްރީ ގްރޫޕުން އެކަން ވެސް ކުރާނަން،"
ދުވަހުގެ ފޮޓޯ
ތޭރަ އަހަރު ދަށުގެ ފުޓްބޯޅަ މުބާރާތުގެ ޗެމްޕިއަންކަން ހޯދި ކަލާފާނު ސްކޫލުގެ ދަރިވަރުން ތައްޓާއެކު އުފާފާޅުކުރަނީ. -- ފޮޓޯ: އަބްދުﷲ އިޔާން
