އޮސްލޯ، ނޯވޭ (މޭ 30) - ސްވިޑަން ނޭޓޯއާ ގުޅޭނެކަމުގެ ފުރިހަމަ ޔަގީންކަން އެބަ އޮތް ކަމަށް ނޭޓޯގެ ޗީފް ޖެންސް ސްޓޮލްޓެންބާގް ވިދާޅުވެއްޖެ އެވެ.
ސްވިޑަންއަށް ނޭޓޯގެ މެމްބަރުކަން ނުލިބިގެން އުޅެނީ ތުރުކީން ނުރުހޭތީ އެވެ. ތުރުކީގެ ރައީސް ތައްޔިބް އުރުދުގާން ވަނީ އިތުރު ދައުރަކަށް ވެރިކަން ކަށަވަރު ކުރައްވައިފަ އެވެ.
"ނޭޓޯގެ ފުރިހަމަ މެމްބަރުކަން ސްވިޑަންއަށް ލިބޭނެކަމާ މެދު އަޅުގަނޑުގެ ފުރިހަމަ ޔަގީންކަން އެބަ އޮޔް،" ނޭޓޯ ފޮރިން މިނިސްޓަރުންގެ ނުރަސްމީ ބައްދަލުވުމެއްގެ ތެރެއިން ސްޓޮލްޓެންބާގް ވިދާޅުވި އެވެ.
އެމެރިކާ އިސްވެ އުފެއްދި އަސްކަރީ ކޯލިޝަން ނޭޓޯގެ 31 މެމްބަރުންގެ ރުހުން ލިބިގެން ނޫނީ އާ ގައުމަކަށް މެމްބަރުކަމެއް ނުލިބޭނެ އެވެ. ސްވިޑަންގެ ހުށަހެޅުމާ ދެކޮޅު ހަދަނީ ތުރުކީ އަދި ހަންގޭރީ އެވެ.
ފިންލޭންޑްގެ ހުށަހެޅުމާ ދެކޮޅަށް ވެސް ތުރުކީން މަސައްކަތް ކުރި އެވެ. އެކަމަކު ދެ ގައުމުން އެއްބަސްވުމަކަށް ގޮސް، ތުރުކީގެ ރުހުމާ އެކު ފިންލޭންޑަށް ނޭޓޯގެ މެމްބަރުކަން ލިބުނީ އެޕްރީލް މަހު އެވެ.
އަސްކަރީ ގޮތުން ވަކި އަތަކަށް ނުޖެހި އޮންނަތާ ޒަމާންތަކެއް ފަހުން އުތުރު ޔޫރަޕްގެ ދެ ގައުމުން ނޭޓޯގެ މެމްބަރުކަން ބޭނުންވީ ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުންނެވެ.
ތުރުކީގެ ރައީސް އުރުދުގާން ތުހުމަތު ކުރައްވާ ގޮތުގައި ސްވިޑަންއިން ދަނީ ތުރުކީގެ ކުރުދިސްތާން ވޯކާޒް ޕާޓީ (ޕީކޭކޭ) ގެ ޓެރަރިސްޓުންނަށް ރައްކާތެރިކަން ފޯރުކޮށްދެމުންނެވެ.
