ޖޮހަނެސްބާގް، ދެކުނު އެފްރިކާ (މޭ 30) - މި އަހަރުގެ ފުރަތަމަ ތިން މަހުގެ ތެރޭގައި ދެކުނު އެފްރިކާގައި ކޮންމެ ގަޑިއިރަކު ތިން މީހުން މަރާލި ކަމަށް އެ ގައުމުގެ ފުލުހުން އާއްމުކުރި ތަފާސްހިސާބުން ދައްކައިފި އެވެ.
ދުނިޔޭގައި ނިސްބަތުން އެންމެ ގިނައިން މީހުން މަރާ އެއް ގައުމަކީ ދެކުނު އެފްރިކާ އެވެ. ޖެނުއަރީ މަހުން ފެށިގެން މާޗް މަހުގެ ނިޔަލަށް އެ ގައުމުގައި 6،289 މީހުން މަރާލި އެވެ. އެއީ މިދިޔަ އަހަރުގެ އެ މުއްދަތާ އަޅާ ބަލާއިރު، 3.4 ޕަސެންޓުގެ އިތުރުވުމެކެވެ.
ޖިނާއީ ކުށްތައް ގިނަވުމުން ފުލުހުންގެ މިނިސްޓަރު ބޭކީ ސެލޭއަށް ފާޑުކިޔުން އަމާޒުވަމުން ދިޔަ ނަމަވެސް، އޭނާ ވިދާޅުވީ ޖުމްލަ ގޮތެއްގައި ހާލަތު ރަނގަޅުވަމުންދާ ކަމަށެވެ.
"މަޑުމަޑުން މުޖުރިމުންގެ ބާރު ކަނޑުވާލެވެމުން އެބަދޭ،" ޕްރެސް ކޮންފެރެންސެއްގައި އޭނާ ވިދާޅުވި އެވެ.
ކުޑަކުދިންގެ މަރުތައް 20 ޕަސެންޓު ދަށްވެފައިވާ ކަމަށް ވެސް އޭނާ ފާހަގަކުރެއްވި އެވެ. އޭގެ އިތުރުން ރޭޕްގެ މައްސަލަތައް ވެސް ވަނީ 2.8 ޕަސެންޓު ދަށްވެފަ އެވެ.
އެއް ތަނުން އަނެއް ތަނަށް ފައިސާ އުފުލަނިކޮށް ފޭރިގަތުމުގެ މައްސަލަތައް 20 ޕަސެންޓު އިތުރުވި އެވެ. އޭގެ އިތުރުން އާދައިގެ ވައްކަމާއި މާރާމާރީ އާއި މީހުން މެރުމަށް މަސައްކަަތް ކުރުމުގެ މައްސަލަތައް ވެސް އިތުރުވި އެވެ.
އިދިކޮޅު ޑިމޮކްރެޓިކް އެލަޔަންސް (ޑީއޭ) ޕާޓީއިން ގޮވާލީ ސެލޭ މަގާމުން ވަކިކުރުމަށެވެ. އެ ޕާޓީގެ ބަޔާނުގައި ބުނީ ކުށްތައް ކޮންޓްރޯލުން ނެއްޓިފައިވާ ކަމަށެވެ.
