ނ. މަނަދޫ، އަންނާރުމާގޭ، ނައީމާ މޫސާއަށް ހަމަލާދީ އަނިޔާވެރި ގޮތަކަށް މަރާލި މައްސަލައިގެ ތަހުގީގު ކުރިއަށްދާ ގޮތް ބެއްލެވުމަށް ކޮމިޝަނާ އޮފް ޕޮލިސް މުހައްމަދު ހަމީދު އާއި ފުލުހުންގެ އިސް ބޭފުޅުން ހިމެނޭ ޓީމެއް އެ ރަށަށް ވަޑައިގެންފި އެވެ.
އޭޕްރީލް 7، ގައި ހިނގި އެ މަރުގެ ހާދިސާގެ ތަހުގީގު މޮނީޓާކުރަން މަނަދޫއަށް މިއަދު ވަޑައިގެން އުޅުއްވާ ޓީމުގައި ޕޮލިސް ކޮމިޝަނަރު ހަމީދުގެ އިތުރުން އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު ވެސް ހިމެނިވަޑައިގަންނަވަ އެވެ.
ނައީމާ، 62، މަރުގެ ތަހުގީގަށް ގިނަ އަދަދެއްގެ ފޮރެންސިކް އެކްސްޓާޕުން އެ ރަށުގައި ދަނީ ހަރަކާތްތެރިވަމުންނެވެ. ރަށުގެ ބައެއް ސަރަހައްދުތައް ބަލައިފާސްކޮށްފައި ވެސް ވެ އެވެ.
ކޮންމެ ދުވަހަކު ގޮތަކަށް ރަށުގެ މީހުންގެ ސާމްޕަލް ނެގުމުގެ މަސައްކަތް ކުރިއަށް ގެންދެ އެވެ. އެނގިފައިވާ ގޮތުގައި ނައީމާ މަރާލާފައިވާ އޮތް ތަނުން އިތުރު މީހެއްގެ ޑީއެންއޭ ވަނީ ފެނިފަ އެވެ. އެހެންވެ ފުލުހުން ދަނީ ޑީއެންއޭ ދިމާވާނެ ސާމްޕަލް ހޯދުމުގެ މަސައްކަތް ކުރަމުންނެވެ.
ނައީމާ ދިރިއުޅޭ ގެ ކައިރިއަށް އޭނާ ހޯދަން ދިޔަ ބައެއް މީހުންނާއި އެ ދުވަހު އެ ގެ ކައިރީ ހަރަކާތްތެރި ކަމަށް ބެލެވޭ މީހުންގެ ހަށިގަނޑުން ޑީއެންއޭ ސާމްޕަލް އާއި އިނގިލީގެ ނިޝާން ވެސް ވަނީ ނަގައިފަ އެވެ. ނައީމާގެ އާއިލާގެ ބައެއް މީހުންގެ ހަށިގަނޑުން ވެސް ޑީއެންއޭ ސާމްޕަލް އާއި އިނގިލީގެ ނިޝާން ނަގާފައިވެ އެވެ.
ނަމަވެސް މިހާތަނަށް ނެގި ސާމްޕަލްތަކުން، ނައީމާ މަރާލާފައި އޮއްވާ ފެނުނު އޭނާގެ ކޮޓަރިން ފެނުނު ޑީއެންއޭ ސާމްޕަލްއާ ދިމާނުވާ ކަމަށް މައުލޫމާތު ލިބެ އެވެ.
ނައީމާގެ ހަށިގަނޑު ފެނުނު އޭނާ ދިރިއުޅޭ ގެ ހިމެނޭ ސަރަހައްދު، އާންމުންނަށް ނުވަދެވޭ ގޮތަށް ހަފުތާއެއްހާ ދުވަސް ވަންދެން ބަންދުކޮށްފައި ވެސް ބެހެއްޓި އެވެ. ނަމަވެސް މިހާރު ބަންދުކޮށްފައި ވަނީ ހަމައެކަނި އެ ގެ ކަމަށް ރަށު ކައުންސިލުން ބުންޏެވެ. ގެ ބަންދުކޮށްފައި ހުންނަތާ ތިން ހަފުތާއެއްހާ ދުވަސް ވެއްޖެ އެވެ.
ނައީމާގެ މަރުގައި އިތުރަށް ބަލަން ޖެހޭ ކަންތައްތަކެއް ހުރުމުން، ފުލުހުންނަށް ނާންގާ އެއްވެސް އުޅަނދެއް މަނަދޫއިން ބޭރަށް ނުދިއުމަށް އެރަށު ކައުންސިލުން ވަނީ އާންމުކޮށް އަންގާފަ އެވެ. ހަމައެއާއެކު ރަށަށް ދާ މީހުން ވެސް ފުލުހުންނަށް އަންގާފައި ދިއުމަށް ވެސް ކައުންސިލުން އަންގާފައިވެ އެވެ.
މި ނޫހަށް މައުލޫމާތު ލިބިފައިވާ ގޮތުގައި އޭނާ މަރުވެފައި އޮއްވާ ފެނުނުއިރު ކޮޓަރީގެ ބިންމަތީގައި ގިނަ އަދަދަކަށް ލޭ ހުއްޓެވެ. އޭނާގެ ހަށިގަނޑުގެ އެކި ތަންތަނަށް ވަޅި ހަރާފައިވާކަން އެނގިފައިވެ އެވެ.
ނައީމާ މަރުވި އިރު ދުނިޔޭގައި އޭނާގެ ތިން ދަރިން އެބަ ތިއްބެވެ. ދެ ކައިވެންޏެއް ކުރިިއިރު، ކައިވެނިކުރި ދެ މީހުން ވެސް މިހާރު ދުނިޔޭގައި ނެތެވެ.
