އިސްތަންބޫލް، ތުރުކީ (މޭ 15) - ތުރުކީގެ ރިޔާސީ އިންތިހާބުގައި މިހާރުގެ ރައީސް ތައްޔިބް އުރުދުގާންއަށް މެޖޯރިޓީ ކަށަވަރު ނުވެ، ވޯޓުލުމުން ދެ ވަނަ ބުރަކަށް ދާން ޖެހިއްޖެ އެވެ.
ދެ ވަނަ ބުރަކަށް ނުގޮސް އިންތިހާބުން މޮޅުވެވޭނީ 50 ޕަސެންޓު ޔަގީންވުމުންނެވެ. އެހެން ނަމަވެސް 20 އަހަރު ވެރިކަން ކުރައްވާފައިވާ އުރުދުގާން އާއި އިދިކޮޅު ކެމާލް ކިލިޗްދަރޯލޫއަށް ވެސް 50 ޕަސެންޓު ލިބިވަޑައިނުގެންނެވި އެވެ.
އިންތިހާބުގެ ދެ ވަނަ ބުރުގެ ވޯޓުލުން އޮންނާނީ މޭ 28 ގަ އެވެ.
ކިލިޗްދަރޯލޫ ސަޕޯޓަރުންނަށް ވިދާޅުވީ ދެ ވަނަ ބުރުން ކާމިޔާބު ހޯއްދަވާނެ ކަމަށާއި ވޯޓު ގުނުމާއި ނަތީޖާ ރިޕޯޓު ކުރުމުގެ ކަންކަމަށް އުރުދުގާންގެ ޕާޓީއިން ހުރަސް އެޅިކަމުގެ ތުހުމަތު ކުރެވޭ ކަމަށެވެ.
އެހެން ނަމަވެސް އިންތިހާބުގެ ކުރިން ލަފާ ކުރި ވަރަށް ވުރެ އުރުދުގާންގެ ނަތީޖާ ރަނގަޅެވެ. އެމަނިކުފާނު ވިދާޅުވީ އެންމެ ވާދަވެރި ކެންޑިޑޭޓާ ވެސް 2.6 މިލިއަން ވޯޓުގެ ތަފާތު އެބަ އޮތް ކަމަށެވެ.
ވޯޓު ފޮށިތަކުގެ 97 ޕަސެންޓު ގުނައި ނިމުނު އިރު، އުރުދުގާން ކުރީގައި އުޅުއްވަނީ 49.39 ޕަސެންޓާ އެކު އެވެ. ކިލިޗްދަރޯލޫއަށް ލިބިވަޑައިގެންނެވީ 44.92 ޕަސެންޓެވެ.
ތިން ވަނަ ކެންޑިޑޭޓް ސިނާން އޯގަންއަށް 5.3 ޕަސެންޓު ވޯޓު ލިބުނު އިރު، ދެ ވަނަ ބުރުގައި އޭނާއަކީ "ކިންގްމޭކާ" އަށް ވެދާނެ ކަމަށް އެނެލިސްޓުން ބުނެ އެވެ. އެއީ އޭނާ ތާއީދުކުރައްވާ ކެންޑިޑޭޓަކަށް އޭނާގެ ސަޕޯޓަރުންގެ ވޯޓު ލިބޭނެ ކަމަށް ފެންނާތީ އެވެ.
