ރާއްޖޭގެ ތާރީހުގައި ވެސް އަލަށް، އަހަރުގެ ފުރަތަމަ ހަތަރު މަހުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު 650،000 އިން މައްޗަށް ހިނގައްޖެ އެވެ.
ޓޫރިޒަމް މިނިސްޓަރީން އާންމުކޮށްފައިވާ ތަފާސް ހިސާބުތަކަށް ބަލާއިރު، މިއަހަރުގެ ފުރަތަމަ ހަތަރު މަހުގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ ޖުމުލަ އަދަދަކީ 688,284 އެވެ.
މީގެ ކުރިން އެ މުއްދަތުގައި އެންމެ ގިނަ ފަތުރުވެރިން ރާއްޖެއަށް ޒިޔާރަތް ކުރީ 2019 ގައެވެ. އެ އަހަރުގެ އޭޕްރިލް މަހާ ހަމައަށް ރާއްޖެ އައި ފަތުރުވެރިންގެ ޖުމުލައަކީ 646,093 އެވެ.
އެ އަހަރަކީ ފަތުރުވެރިކަމުގެ ތާރީހުގައި ވެސް އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި އަހަރެވެ.
އެ ހިސާބުތައް މިދިޔަ ހުކުރު ދުވަހާ އަދާ ހަމަކޮށްލުމުން މިހާތަނަށް ރާއްޖެއައި ފަތުރުވެރިންގެ އަދަދު ވަނީ 710،645 އަށް އަރައިފަ އެވެ. އެއީ މިދިޔަ އަހަރުގެ އެ މުއްދަތާ އަޅާ ބަލާއިރު 17.5 އިންސައްތައިގެ ކުރިއެރުމެކެވެ. މިދިޔަ އަހަރު، މެއި 5، އާ ހަމައަށް ރާއްޖެއަށް ޒިޔާރަތް ކުރީ 604،730 ފަތުރުވެރިންނެވެ. އޭގެ ކުރީ އަހަރު 403،304 ފަތުރުވެރިންނެވެ.
ޓޫރިޒަމް މިނިސްޓަރީން އާންމުކޮށްފައިވާ ތަފާސް ހިސާބު --
ރާއްޖެއަށް ޒިިޔާރަތް ކުރާ ފަތުރުވެރިންގެ އަދަދު 2013 ވަނަ އަހަރު، އެއް މިލިއަނުން މައްޗަށް އަލަށް އެރުމާ ހަމައިން ކޮންމެ އަހަރަކު ވެސް ކުރިއެރުންތަކެއް ހޯދަމުން އައިސް އެއްކޮށް ވަޅުޖެހުނީ 2019 ގައި ކުރިމަތިވި އާލަމީ ވަބާއާ ގުޅިގެންނެވެ. ކޮވިޑާ ގުޅިގެން ދުނިޔޭގެ އެކި ގައުމުތަކުން ގެންގުޅުނު ހަރުކަށި ސިޔާސަތުތަކަށް ލުއިދޭން ފެށުމާ އެކު ރާއްޖޭގެ ފަތުރުވެރިކަމަށް ކިރިޔާ ހަމަ ނޭވައެއް ލެވުނީ މިދިޔަ އަހަރު އެވެ. މިދިޔަ އަހަރު ރާއްޖެއަށް ޖުމުލަ 1.6 މިލިއަން ފަތުރުވެރިން ޒިޔާރަތް ކުރި އެވެ.
ކޮވިޑާ ގުޅިގެން ކުރިމަތިވި އިގުތިސާދީ ހީނަރުކަމުން އަރައިގަތުމަށް ސަރުކާރުން ގެންގުޅޭ ސިޔާސަތުގެ ތެރެއިން ޓޫރިޒަމް މިނިސްޓަރީން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އެ މިނިސްޓަރީން ވަނީ މިއަހަރުހެ ނިޔަލަށް 1.8 މިލިއަން ފަތުރުވެރިން ރާއްޖެއަށް ގެނެސް ރިކޯޑެއް ހެދުމަށް އަމާޒު ހިފައިފަ އެވެ.
ފަތުރުވެރިކަން ކުރިއެރުވުމަށްޓަކައި ކުރަމުން އަންނަ މަސައްކަތުގެ ތެރެއިން ރާއްޖޭން ވަނީ ވޯލްޑު ލީޑިން ޑެސްޓިނޭޝަނުގެ މަގާމު ވެސް މިދިޔަ ތިން އަހަރު ޖެހިޖެހިގެން ހޯދައި އެ އެވޯޑު މިލްކުކޮށްފަ އެވެ. އެއީ ދުނިޔޭގެ ފަތުރުވެރިކަމުގެ ސިނާއަތުގައި ދޭ އެންމެ ޝަރަފުވެރި އެވޯޑުތަކެވެ.
މިއަހަރުގެ މިހާތަނަށް ރާއްޖެއަށް ފަތުރުވެރިން އަންނަމުންދާ އަދަދު މިހައި އިތުރުވުމަކީ މިއަހަރަށް ކަނޑައެޅި ލަނޑުދަނޑި ފަހަނައަޅައި ދެވޭނެ ކަމުގެ އުއްމީދު ބޮޑުކަމަށް ސަރުކާރުން ވެސް ދަނީ ބުނަމުންނެވެ.
