ވޮޝިންޓަން، އެމެރިކާ (މޭ 2) - ޖޫން މަސް ފެށުމާ އެކު އެމެރިކާއިން ފައިސާ ހުސްވެ، ދަރަނިތައް ޑީފޯލްޓުވެދާނެކަމުގެ އިންޒާރު ޓްރެޝަރީ ސެކެޓްރީ ޖެނެޓް ޔެލެން ދެއްވައިފި އެވެ.
ޑިމޮކްރެޓިކް ޕާޓީގެ ސަރުކާރުން ބޭކާރު ހަރަދު ކުރާ ކަމަށް އިދިކޮޅު ރިޕަބްލިކަން ޕާޓީއިން ބުނެ އެވެ. ރިޕަބްލިކަނުން ކޮންޓްރޯލް ކުރާ ހައުސް އޮފް ރެޕްރެޒެންޓޭޓިވްސްގައި ވަނީ އެކަމާ ކަންބޮޑުވުން ފާޅުކޮށްފަ އެވެ.
އެމެރިކާއިން ދަރަނި ނެގޭނެ ލިމިޓެއް ކަނޑައަޅާފައިވާ އިރު، ހަރަދުތައް މަދުކުރަން ރައީސް ޖޯ ބަައިޑެންއަށް ޕްރެޝަރު ބޮޑެވެ.
ރިޕަބްލިކަނުން ބޭނުންވަނީ "ލިމިޓް، ސޭވް، ގްރޯ" ބިލް ހައުސް އޮފް ރެޕްރެޒެންޓޭޓިވްސްއިން ފާސްކޮށް، ހަރަދު ކުޑަކުރަން ސަރުކާރަށް މަޖުބޫރު ކުރުވުމަށެވެ.
އެކަމަކު ގާނޫނު ހަދާ މަތިގެ އާއި ސަރުކާރު ކޮންޓްރޯލް ކުރާ ޑިމޮކްރެޓުން އެ ބިލާ ދެކޮޅެވެ. އެހެންކަމުން، އެ ބިލް ގާނޫނަކަށް ހެދުމުގެ ފުރުސަތު ކުޑަ އެވެ.
އެ ކޯޅުމާ ހެދި އެމެރިކާގެ ތާރީހުގައި ފުރަތަމަ ފަހަރަށް ދަރަނި ޑީފޯލްޓުވުމުގެ ނުރައްކާ އޮތީ އުފެދިފަ އެވެ.
"އަޅުގަނޑުމެންނަށް ލަފާކުރެވެނީ ދަރަނީގެ ލިމިޓު މަތިނުކުރާ ނަމަ، ޖޫން އެއް ވަނަ ދުވަހުން ފެށިގެން ދަރަނި ޑީފޯލްޓުވެދާނެ ކަމަށް،" ހައުސް އޮފް ރެޕްރެޒެންޓޭޓިވްސްއަށް ފޮނުވި ސިޓީއެއްގައި ޓްރެޝަރީ ސެކެޓްރީ ޔެލެން ވިދާޅުވި އެވެ.
އެމެރިކާގެ ދަރަނީގެ ލިމިޓު 31.4 ޓްރިލިއަން ޑޮލަރަށް އެރީ މިދިޔަ ޖެނުއަރީ މަހު އެވެ. އޭގެ ފަހުން ސަރުކާރުގެ ހަރަދުތަކަށް ފައިސާ ހޯދަން ޓްރެޝަރީ ސެކެޓްރީ ވަނީ ހާއްސަ ފިޔަވަޅުތަކެއް އަޅުއްވައިފަ އެވެ.
އެ ފިޔަވަޅުތައް އިތުރަށް ފުޅާކުރެވެން ނެތުމުން، ދަރަނި ނެގޭނެ މިންވަރު އިތުރު ނުކުރާ ނަމަ، ސަރުކާރަށް ފައިސާ ހުސްވެ، އިގުތިސާދީ ބޮޑެތި ލޮޅުންތަކެއް އަންނާނެ އެވެ.
