މަލިންދީ، ކެންޔާ (އެޕްރީލް 24) - ކެންޔާގެ ދީނީ "ކަލްޓަކާ" ގުޅުން ހުރި 51 ގަބުރު ޖަންގަލީގެ ތެރެއިން ފެނުމުން އެ ސަރަހައްދު ބަލައި ފާސްކުރުމުގެ ބޮޑު އޮޕަރޭޝަނެއް ފަށައިފި އެވެ.
ފުލުހުން ބުނީ އޮޕަރޭޝަނުގެ މަގުސަދަކީ ގަބުރުތައް ހޯދުމުގެ އިތުރުން "ކަލްޓް" މެމްބަރުންގެ ތެރެއިން ދިރިހުރި ބަޔަކު ތިބި ނަމަ އެ މީހުން ސަލާމަތް ކުރުން ކަމަށެވެ.
ރިޕޯޓުތައް ބުނާ ގޮތުން ނަސާރާ ދީނުގެ ގްރޫޕެއްގެ ގޮތުގައު ހިންގި "ކަލްޓު"ގެ ލީޑަރު މެމްބަރުންނަށް އެންގީ "އީސާގެފާނާ ބައްދަލުކުރުމަށް" ނުކައި ތިބުމަށެވެ.
ގުޑް ނިއުސް އިންޓަނޭޝަނަލް ޗާޗްގެ ނަމުގައި ހިންގި ކަލްޓްގެ ހަގީގަތް ހޯދަން ބޮޑު ތަހުގީގެއް ފެށީ ޝަކަހޯލާ ޖަންގަލީގެ ތެރެއިން މިދިޔަ ހަފުތާގައި ފުރަތަމަ ގަބުރުތައް ފެނުމުންނެވެ.
ފާއިތުވި ހަފުތާ ބަންދުގައި 800 އޭކަރުގެ ސަރަހައްދަކުން އިތުރު ގަބުރުތަައް ފެނުނެވެ. ކަލްޓުގެ ބައެއް މެމްބަރުން އެ ސަރަހައްދުގައި ފިލައި ތިބި ކަމަށް ފުލުހުން ގަބޫލުކުރެ އެވެ.
އޭގެ ތެރެއިން ބައެއް މީހުން ސަލާމަތްކޮށް ފަރުވާ ދިނުމަށް ހޮސްޕިޓަލަށް ގެންގޮސްފައިވާ އިރު، އިތުރު މީހުން ހޯދުމުގެ މަސައްކަތް ދަނީ ކުރިއަށެވެ.
ގުޑް ނިއުސް އިންޓަނޭޝަނަލް ޗާޗްއާ ގުޅޭ ގޮތުން ފުލުހުންނަށް ޝަކުވާ ހުށަހެޅީ އިންސާނީ ހައްގުތަކަށް މަސައްކަތް ކުރާ ގްރޫޕަކުންނެވެ.
ރިޕޯޓުތައް ބުނާ ގޮތުން ކަލްޓުގެ މެމްބަރުންގެ ތެރެއިން ސަލާމަތްކޮށްފައިވާ ބައެއް މީހުންގެ ގައިން ވަރު ދެރަވެ ހާލު ގޯސްވަމުން ދިޔަ ނަމަވެސް ކެއުމަށް ދެކޮޅު ހަދަ އެވެ.
ކެންޔާގެ ރެޑް ކްރޮސްއިން ބުނީ އެ ކަލްޓު ހަރަކާތްތެރިވި މަލިންދީގެ ހިސާބުގައި 112 މީހުން ގެއްލިގެން އެ ޖަމިއްޔާއަށް ރިޕޯޓުކޮށްފައިވާ ކަމަށެވެ.
ކަލްޓުގެ ލީޑަރު މެކެންޒީ ންތެންގޭ ފުލުހުންނާ ހަވާލުވީ އަމިއްލައަށެވެ. މިދިޔަ މަހު އޭނާއާ ދެކޮޅަށް ދައުވާ އުފުލީ ކަލްޓު މެމްބަރުންގެ ގޮތުގައި ހިމެނޭ ބަޔެއްގެ ދެ ދަރިން ނުކައި ތިބެ މަރުވުމުންނެވެ. މިހާރު މެކެންޒީ ންތެންގޭ ހުރީ ކަފާލާތުގެ ދަށުން ދޫކޮށްލައިފަ އެވެ.
